കുവൈത്തിലേക്ക് ജോലിക്കാരെ എടുക്കുന്നു

മുംബൈ: കുവൈത്തിലേക്ക് വന്‍തോതില്‍ ജോലിക്കാരെ റിക്രൂട്ട് ചെയ്യുന്നു. യുഎസ് നേതൃത്വത്തില്‍ ഇറാഖിന് നേരെ ആക്രമണം തുടങ്ങിയതിന് ശേഷം കുവൈത്തിലേക്ക് എമിഗ്രേഷന്‍ കാര്യങ്ങളില്‍ നിയന്ത്രണം ഏര്‍പ്പെടുത്തിയിരുന്നു.

ഇപ്പോള്‍ നിയന്ത്രണം നീക്കിയതോടെയാണ് റിക്രൂട്ട്മെന്റ് വീണ്ടും സജീവമായിരിക്കുന്നത്. മുംബൈയിലെ റിക്രൂട്ട്മെന്റ് ഏജന്‍സികളാണ് കൂടുതലായി തൊഴിലാളികളെ കുവൈത്തിലേക്ക് അയയ്ക്കുന്നത്.

പ്രത്യേക വൈദഗ്ധ്യം ആവശ്യമില്ലാത്ത ജോലികള്‍ക്കാണ് മുംബൈയിലെ റിക്രൂട്ട്മെന്റ് ഏജന്‍സികള്‍ ആളുകളെ അയയ്ക്കുന്നത്. എമിഗ്രേഷന്‍ നിയന്ത്രണം നീക്കിയതിനാലുള്ള സ്വാഭാവിക തിരക്കായിരിക്കാം ഇതെന്ന് കരുതുന്നു. ബസ് ഡ്രൈവര്‍മാര്‍, പാചകക്കാര്‍, സര്‍വീസ് അസിസ്റന്റ്മാര്‍, അക്കൗണ്ടന്റുമാര്‍, ഫിനാന്‍ഷ്യല്‍ സൂപ്പര്‍വൈസര്‍മാര്‍, ബസ് ബോയ്സ് തുടങ്ങി ഒട്ടേറെ തസ്തികകളിലേക്കാണ് ജീവനക്കാരെ എടുക്കുന്നത്.