എയര്‍ ഇന്ത്യ ദുബായ്നിരക്ക് കൂട്ടി; മറ്റ് കമ്പനികളും കൂട്ടിയേക്കും

കൊച്ചി: എയര്‍ ഇന്ത്യ ദുബായിലേയ്ക്കുള്ള വിമാന നിരക്ക് കൂട്ടി. വിദേശത്ത് തൊഴില്‍ തേടിപ്പോകുന്നവര്‍ മടക്കയാത്രയ്ക്കുള്ള വിമാനക്കൂലി അടയ്ക്കേണ്ടതില്ലെന്ന് വന്നതോടെ യാത്രക്കാരുടെ തിരക്ക് കണക്കിലെടുത്താണ് ഈ നീക്കം.

10 ദിവസത്തേക്കാണ് നിരക്ക് കൂട്ടിയത്. ജനുവരി 1 മുതല്‍ 10 വരെ യാത്രക്കാരില്‍ നിന്നും കൂട്ടിയ നിരക്ക് ഈടാക്കും.

ദുബായിലേക്ക് 11,970 രൂപയാണ് കൂടിയ നിരക്ക്. മടക്കയാത്ര ഉള്‍പ്പെടെയുള്ള ടിക്കറ്റിന് 19,630 രൂപയും. മൂന്നു മാസത്തെ കാലാവധിയാണ് ടിക്കറ്റിനുള്ളത്. കേരളത്തില്‍ നിന്നും ഏറ്റവും കൂടുതല്‍ യാത്രക്കാര്‍ ഉള്ളത് ദുബായിലേക്കായതിനാലാണ് അവസരം മുതലാക്കി എയര്‍ ഇന്ത്യ നിരക്ക് വര്‍ധിപ്പിച്ചിരിക്കുന്നത്.

ദുബായ് ഒഴികെ മറ്റൊരു ഗള്‍ഫ് രാജ്യങ്ങളിലേക്കുമുള്ള യാത്രാനിരക്കില്‍ എയര്‍ ഇന്ത്യ മാറ്റം വരുത്തിയിട്ടില്ല. നിലവിലുള്ള നിരക്ക് മാര്‍ച്ച് 31 വരെ തുടരും. അയാട്ട നിരക്കില്‍ നിന്നും 20 മുതല്‍ 30 ശതമാനം വരെ ഇളവ് നല്‍കിയാണ് എയര്‍ ഇന്ത്യ ടിക്കറ്റ് അനുവദിച്ചിരുന്നത്. ദുബായ് ഒഴികെ മറ്റിടങ്ങളിലേക്ക് ഈ ഇളവ് തുടരും. ഖത്തര്‍ എയര്‍വേയ്സ് നിലവിലുള്ള യാത്രാനിരക്ക് ഡിസംബര്‍ 31 വരെ തുടരും. ദോഹയ്ക്കാണ് ഖത്തര്‍ എയര്‍വേയ്സ് സര്‍വീസ് നടത്തുന്നത്. തടസ്സം നീങ്ങിയതോടെ ഗള്‍ഫ് രാജ്യങ്ങളിലേക്ക് വരുംദിവസങ്ങളില്‍ തിരക്ക് ഉണ്ടാകുമെന്നതിനാല്‍ നിലവിലുള്ള യാത്രാനിരക്കിന്റെ കാലാവധി നീട്ടാന്‍ മറ്റ് വിമാന കമ്പനികളൊന്നും തയ്യാറായിട്ടില്ല. ഇവരും വിമാന യാത്രക്കൂലി കൂട്ടുമെന്ന സൂചനയാണ് ഇത് വ്യക്തമാക്കുന്നത്.