തീവണ്ടികളില്‍ ഗ്രീന്‍ ബോഗി വേണം

കൊച്ചി കേരളത്തില്‍ നിന്നും പുറപ്പെടുന്ന തീവണ്ടികളില്‍ പഴം-പച്ചക്കറികള്‍ കേടുകൂടാതെ സൂക്ഷിക്കാന്‍ കഴിയുന്ന ഗ്രീന്‍ ബോഗികള്‍ ഘടിപ്പിക്കണമെന്ന് പി.സി.തോമസ് എം.പി.ആവശ്യപ്പെട്ടു. ദീര്‍ഘദൂര തീവണ്ടികളിലെല്ലാം പഴങ്ങളും പച്ചക്കറികളും മറ്റ് കാര്‍ഷിക ഉല്പന്നങ്ങളും കേടുകൂടാതെ സൂക്ഷിക്കാന്‍ സൗകര്യമുളള ബോഗികള്‍ ഘടിപ്പിച്ചാല്‍ സംസ്ഥാനത്തെ കാര്‍ഷികോല്പന്നങ്ങല്‍ക്ക് കൂടുതല്‍ വില കിട്ടുമെന്ന് അദ്ദേഹം പറഞ്ഞു.

പാര്‍ലമെന്റിലും ഇതു സംബന്ധിച്ച് സബ്മിഷന്‍ അവതരിപ്പിച്ചതായി അദ്ദേഹം ഡിസംബര്‍ എട്ട് ശനിയാഴ്ച വാര്‍ത്താലേഖകരോടു പറഞ്ഞു.

കേരളത്തില്‍ രണ്ടു രൂപ വിലയുളള തേങ്ങയ്ക്ക് ദില്ലിയില്‍ 12 രൂപയാണ് വില. കേരളത്തില്‍ നിന്നും തേങ്ങ ദില്ലിയിലെത്തിക്കാന്‍ മാര്‍ഗ്ഗമുണ്ടെങ്കില്‍ അതു സംസ്ഥാനത്തെ നാളികേര കര്‍ഷകര്‍ക്ക് ആശ്വാസമാകും.

ശീതീകരണ സൗകര്യങ്ങളുളള ബോഗികളാണ് ഘടിപ്പിക്കേണ്ടത്. കേന്ദ്രം ഇക്കാര്യത്തില്‍ അനുകൂലമായ തീരുമാനമെടുക്കുമെന്ന് പ്രതീക്ഷിക്കുന്നതായി അദ്ദേഹം പറഞ്ഞു.

റബര്‍ കര്‍ഷകര്‍ അനുഭവിക്കുന്ന ദുരിതങ്ങള്‍ ദേശീയശ്രദ്ധയില്‍ കൊണ്ടു വരുന്നതിനായി ഐഎഫ്ഡിപി(ഇന്ത്യന്‍ ഫെഡറല്‍ ഡമോക്രാറ്റിക് പാര്‍ട്ടി) ഡിസംബര്‍ 14 ന് പുതിയൊരു സമരം സംഘടിപ്പിക്കുമെന്ന് തോമസ് അറിയിച്ചു. സംസ്ഥാനത്തിന്റെ പലഭാഗങ്ങളില്‍ നിന്നും ശേഖരിക്കുന്ന റബര്‍ ഷീറ്റുകള്‍ അന്ന് പാര്‍ലമെന്റിനു മുന്നില്‍ കൂമ്പാരമായി കൂട്ടി ഒരു റബര്‍മല സൃഷ്ടിക്കും. കര്‍ഷകര്‍ ഡിസംബര്‍ 10നുളള കേരളാ എക്സ്പ്രസില്‍ റബര്‍ ഷീറ്റുകള്‍ ദില്ലിയിലേയ്ക്ക് അയയ്ക്കും.

അടുത്ത വര്‍ഷം ജനുവരി 7 മുതല്‍ 14 വരെ അങ്കമാലിയില്‍ നിന്നും കോട്ടയം വരെ റബര്‍ മാര്‍ച്ച് നടത്താനും പാര്‍ട്ടി തീരുമാനിച്ചതായി പി.സി.തോമസ് എംപി അറിയിച്ചു.