മഴക്കാലത്ത്, പ്രത്യേകിച്ച് കൃഷിയിടങ്ങൾക്കോ തോട്ടങ്ങൾക്കോ ജലാശയങ്ങൾക്കോ അടുത്ത് താമസിക്കുന്നവരുടെ വീടുകളിൽ പാമ്പുകൾ കയറാനുള്ള സാധ്യത കൂടുതലാണ്. ഈയിടെ വാഷിംഗ് മെഷീനുള്ളിൽ പാമ്പ് കയറിയ സംഭവം ഇതിനൊരു ഉദാഹരണമാണ്.
സാധാരണയായി പാമ്പുകൾ മനുഷ്യരെ ഉപദ്രവിക്കാൻ ബോധപൂർവ്വം വരുന്നതല്ല. തണുപ്പിൽ നിന്ന് രക്ഷപ്പെടാനും, സുരക്ഷിതമായ ഒരിടം തേടിയും, അല്ലെങ്കിൽ എലി, തവള തുടങ്ങിയ ഇരകളെ തിരഞ്ഞുമാണ് അവ വീടുകളിൽ എത്തുന്നത്. നിങ്ങളുടെ വീട്ടിലും പരിസരത്തും ചില മുൻകരുതലുകൾ എടുത്താൽ ഈ അപകടം ഒഴിവാക്കാം. അതിനുള്ള 7 വഴികൾ ഇതാ:
1. ഉപയോഗിക്കുന്നതിന് മുൻപ് മെഷീനുകൾ പരിശോധിക്കുക
നിങ്ങളുടെ വാഷിംഗ് മെഷീൻ വീടിന് പുറത്തോ, ബാൽക്കണിയിലോ, ഗാരേജിലോ ആണ് വെച്ചിരിക്കുന്നതെങ്കിൽ, ഓരോ തവണ ഉപയോഗിക്കുന്നതിന് മുൻപും അത് നന്നായി പരിശോധിക്കുന്ന ശീലം ഉണ്ടാക്കിയെടുക്കുക. മെഷീന്റെ അടപ്പ് തുറന്നാണ് കിടന്നിരുന്നതെങ്കിൽ അതിന്റെ ഉള്ളിലും, മെഷീന്റെ അടിഭാഗത്തും, പൈപ്പുകളിലും പാമ്പുകളോ മറ്റ് ജീവികളോ ഇല്ലെന്ന് ഉറപ്പുവരുത്തുക. ഇരുണ്ടതും തണുപ്പുള്ളതുമായ സ്ഥലങ്ങൾ പാമ്പുകൾക്ക് ഒളിച്ചിരിക്കാൻ പ്രിയപ്പെട്ട ഇടങ്ങളാണ്.
2. വീട്ടുസാധനങ്ങൾ വെക്കുന്ന സ്ഥലം എപ്പോഴും വൃത്തിയായി സൂക്ഷിക്കുക മറ്റ് ഉരഗങ്ങളെപ്പോലെ പാമ്പുകളും ആരും ശല്യപ്പെടുത്താത്ത സ്ഥലങ്ങളിൽ ഒളിച്ചിരിക്കാനാണ് ഇഷ്ടപ്പെടുന്നത്. കാർഡ്ബോർഡ് പെട്ടികൾ, പഴയ പത്രങ്ങൾ, ഉപയോഗിക്കാത്ത ബക്കറ്റുകൾ, ചാക്കുകൾ, തോട്ടപ്പണിക്കുപയോഗിക്കുന്ന ഉപകരണങ്ങൾ എന്നിവയെല്ലാം പാമ്പുകൾക്ക് ഒളിച്ചിരിക്കാൻ പറ്റിയ ഇടങ്ങളാണ്. മെഷീനുകളുടെ പുറകുവശം എപ്പോഴും വൃത്തിയാക്കി സൂക്ഷിക്കുക. അനാവശ്യമായ സാധനങ്ങൾ മാറ്റുന്നത് വഴി പാമ്പുകൾക്ക് ഒളിച്ചിരിക്കാനുള്ള ഇടങ്ങൾ ഇല്ലാതാക്കാം. 3. വീട്ടിലേക്കുള്ള പ്രവേശന ദ്വാരങ്ങൾ അടയ്ക്കുക വാതിലുകൾ, ജനലുകൾ, പ്ലംബിംഗ് പൈപ്പുകൾ, ഡ്രെയിനേജ് ഔട്ട്ലെറ്റുകൾ എന്നിവയുടെ അരികിലുള്ള ചെറിയ സുഷിരങ്ങളിലൂടെയും ചുവരുകളിലെ വിള്ളലുകളിലൂടെയും പാമ്പുകൾക്ക് അകത്തുകടക്കാം. വീടിന്റെ പുറംഭാഗം കൃത്യമായി പരിശോധിച്ച് ഇത്തരം ദ്വാരങ്ങൾ നെറ്റ് , സിമന്റ് അല്ലെങ്കിൽ മറ്റ് പശകൾ ഉപയോഗിച്ച് അടയ്ക്കുക. മഴക്കാലത്തിന് മുൻപും മഴക്കാലത്തും ഇത് പ്രത്യേകം ശ്രദ്ധിക്കുക. 4. എലികളെ നിയന്ത്രിക്കുക പാമ്പുകൾ വീട്ടിലേക്ക് വരുന്നത് പ്രധാനമായും ഭക്ഷണത്തിന് വേണ്ടിയാണ്. എലി, തവള, പല്ലി എന്നിവയാണ് പാമ്പുകളെ വീടുകളിലേക്ക് ആകർഷിക്കുന്നത്. ആഹാരസാധനങ്ങൾ കൃത്യമായി അടച്ചുസൂക്ഷിക്കുക, ദിവസവും മാലിന്യങ്ങൾ മാറ്റുക, അടുക്കള വൃത്തിയായി സൂക്ഷിക്കുക എന്നിവ വഴി എലികളെ അകറ്റാം. ഇത് പാമ്പുകൾ വരുന്നത് തടയും. 5. ഗാർഡൻ (തോട്ടം) കൃത്യമായി പരിപാലിക്കുക വളർന്നു പന്തലിച്ച പുല്ലുകൾ, കാടുകയറിയ ചെടികൾ, വിറകുകൂനകൾ, ഇഷ്ടികകൾ, ഉപയോഗിക്കാത്ത ചട്ടികൾ എന്നിവ പാമ്പുകളുടെ പ്രധാന ഒളിത്താവളങ്ങളാണ്. പുല്ലുകൾ കൃത്യമായി വെട്ടിനിർത്തുകയും തോട്ടം വൃത്തിയാക്കി വെക്കുകയും ചെയ്യുക. കാടിനോടും കൃഷിയിടങ്ങളോടും ചേർന്ന് താമസിക്കുന്നവർ വീടിന് ചുറ്റുമുള്ള ഭാഗം എപ്പോഴും വൃത്തിയായി സൂക്ഷിക്കാൻ ശ്രദ്ധിക്കണം. 6. ഓടകൾ മൂടിവെക്കുക, ഈർപ്പമുള്ള സ്ഥലങ്ങൾ ഒഴിവാക്കുക തുറന്നുകിടക്കുന്ന ഓടകളും പൊട്ടിയ ഡ്രെയിനേജ് മൂടികളും വെള്ളം കെട്ടിക്കിടക്കുന്ന സ്ഥലങ്ങളും തവളകളെയും പ്രാണികളെയും ആകർഷിക്കും. ഇത് വഴി പാമ്പുകളും എത്തും. ഓടകൾ കൃത്യമായി മൂടുകയും, പൊട്ടിയ പൈപ്പുകൾ നന്നാക്കുകയും, വെള്ളം കെട്ടിക്കിടക്കുന്നത് ഒഴിവാക്കുകയും ചെയ്യുക. 7. പരിഭ്രാന്തരാകാതെ ഇരിക്കുക, പാമ്പുപിടുത്തക്കാരെ വിളിക്കുക വീട്ടിലോ ഏതെങ്കിലും വീട്ടുസാധനങ്ങളിലോ പാമ്പിനെ കണ്ടാൽ സ്വയം മാറ്റാൻ ശ്രമിക്കരുത്. പേടിച്ചോടുന്ന പാമ്പ് ആക്രമിക്കാൻ സാധ്യതയുള്ളതിനാൽ അതിനെ അടിക്കാനോ പിടിക്കാനോ ശ്രമിക്കരുത്. കുട്ടികളെയും വളർത്തുമൃഗങ്ങളെയും അവിടെനിന്ന് മാറ്റുക. പാമ്പുള്ള മുറി ഒറ്റപ്പെടുത്തിയ ശേഷം വനംവകുപ്പിനെയോ അംഗീകൃത പാമ്പുപിടുത്തക്കാരെയോ വിവരമറിയിക്കുക.