രാജ്യത്തെ ഹരിതോർജ്ജ കുതിപ്പിൽ ഒരു സുപ്രധാന നാഴികക്കല്ല് കുറിച്ച് അദാനി ഗ്രീൻ എനർജി ലിമിറ്റഡ്. കമ്പനിയുടെ പ്രവർത്തനക്ഷമമായ പുനരുപയോഗ ഊർജ്ജ ശേഷി 20 ജിഗാവാട്ട് പിന്നിട്ടതായി കമ്പനി ചൊവ്വാഴ്ച അറിയിച്ചു. ഗ്രീൻഫീൽഡ് പ്രൊജക്റ്റ് ഡെവലപ്മെന്റിലൂടെ ഈ നേട്ടം കൈവരിക്കുന്ന ഇന്ത്യയിലെ ആദ്യത്തെ പുനരുപയോഗ ഊർജ്ജ കമ്പനിയായി അദാനി ഗ്രീൻ എനർജി ലിമിറ്റഡ് മാറി
ഈ നേട്ടത്തോടെ ഇന്ത്യയിലെ യൂട്ടിലിറ്റി സ്കെയിൽ സൗരോർജ്ജ ഇൻസ്റ്റാളേഷനുകളുടെ ഏകദേശം 14 ശതമാനവും, രാജ്യത്തെ മൊത്തം യൂട്ടിലിറ്റി സ്കെയിൽ സൗരോർജ്ജ-കാറ്റാടി ഊർജ്ജ ശേഷിയുടെ 12 ശതമാനവും ഇപ്പോൾ അദാനി ഗ്രീൻ എനർജി ലിമിറ്റഡിന്റെ കീഴിലാണെന്ന് കമ്പനി വ്യക്തമാക്കുന്നു.
കമ്പനി നിലവിൽ പ്രതിവർഷം 52 ബില്യൺ യൂണിറ്റിലധികം ശുദ്ധമായ വൈദ്യുതി ഉത്പാദിപ്പിക്കുന്നുണ്ട്. ഇത് ഇന്ത്യയിലെ മൊത്തം വൈദ്യുതി ഉപഭോഗത്തിന്റെ ഏകദേശം 3 ശതമാന വരും. ഈ ഉത്പാദനം ന്യൂയോർക്ക് നഗരത്തിന് ഒരു വർഷത്തേക്ക് ആവശ്യമുള്ള വൈദ്യുതിക്കോ, അല്ലെങ്കിൽ മുംബൈയുടെയും ന്യൂഡൽഹിയുടെയും സംയുക്ത വാർഷിക വൈദ്യുതി ആവശ്യകതയ്ക്കോ തുല്യമാണെന്ന് അദാനി ഗ്രീൻ എനർജി ലിമിറ്റഡ് അറിയിച്ചു.
2016ൽ തമിഴ്നാട്ടിലെ കമുതിയിൽ അദാനി ഗ്രീൻ എനർജി ലിമിറ്റഡ് തങ്ങളുടെ ആദ്യത്തെ പുനരുപയോഗ ഊർജ്ജ പദ്ധതി ആരംഭിച്ചതിന് ശേഷം ഒരു പതിറ്റാണ്ട് പിന്നിടുമ്പോഴാണ് ഈ ചരിത്ര നേട്ടം കൈവരിക്കുന്നത്. 2026 സാമ്പത്തിക വർഷത്തിൽ കമ്പനി 5051 മെഗാവാട്ട് പുനരുപയോഗ ഊർജ്ജ ശേഷി കൂട്ടിച്ചേർത്തു. ചൈനയ്ക്ക് പുറത്തുള്ള ഒരു കമ്പനി ഒരു വർഷം നേടുന്ന ഏറ്റവും ഉയർന്ന പുനരുപയോഗ ഊർജ്ജ ശേഷി വർദ്ധനവാണിതെന്ന് കമ്പനി അറിയിച്ചു.
ഈ നേട്ടത്തെക്കുറിച്ച് അദാനി ഗ്രീൻ എനർജി എക്സിക്യൂട്ടീവ് ഡയറക്ടർ സാഗർ അദാനി പറഞ്ഞത് ഈ നേട്ടം കമ്പനിയുടെ ദീർഘകാല തന്ത്രങ്ങളുടെയും നടപ്പാക്കൽ ശേഷിയുടെയും പ്രതിഫലനമാണെന്നാണ്. "20 ജിഗാവാട്ട് മറികടക്കുക എന്നത് കൃത്യമായ ആസൂത്രണത്തിലൂടെയും ദീർഘകാല വീക്ഷണത്തിലൂടെയും എന്തെല്ലാം കൈവരിക്കാമെന്ന് കാണിച്ചുതരുന്നു. ഇന്ന് അദാനി ഗ്രീൻ എനർജി ലിമിറ്റഡ് ഞങ്ങളുടെ കാര്യക്ഷമമായ ടീമും ദീർഘകാല പങ്കാളികളും ചേർന്ന് മുംബൈയുടെയും ന്യൂഡൽഹിയുടെയും സംയുക്ത വാർഷിക വൈദ്യുതി ആവശ്യത്തിന് തുല്യമായ പുനരുപയോഗ വൈദ്യുതി നൽകുന്നു. ഇത് രാജ്യത്തിന്റെ ഊർജ്ജ സുരക്ഷ ശക്തിപ്പെടുത്തുന്നതോടൊപ്പം ശുദ്ധമായ ഊർജ്ജത്തിലേക്കുള്ള മാറ്റത്തിന് വേഗത കൂട്ടുകയും ചെയ്യുന്നു," അദ്ദേഹം പറഞ്ഞു. കമ്പനിയുടെ നിലവിലെ പുനരുപയോഗ ഊർജ്ജ പോർട്ട്ഫോളിയോയിൽ ഏകദേശം 14.2 ജിഗാവാട്ട് സൗരോർജ്ജം, 2.7 ജിഗാവാട്ട് കാറ്റാടി ഊർജ്ജം, 3.3 ജിഗാവാട്ട് വിൻഡ്-സോളാർ ഹൈബ്രിഡ് പ്രൊജക്റ്റുകൾ എന്നിവ ഉൾപ്പെടുന്നു. കൂടാതെ ചൈനയ്ക്ക് പുറത്തുള്ള ലോകത്തിലെ ഏറ്റവും വലിയ ബാറ്ററി സ്റ്റോറേജ് വിന്യാസമെന്ന് വിശേഷിപ്പിക്കാവുന്ന 3.55 ജിഗാവാട്ട് അവർ ബാറ്ററി എനർജി സ്റ്റോറേജ് സിസ്റ്റംസും അദാനി ഗ്രീൻ എനർജി ലിമിറ്റഡ് കമ്മീഷൻ ചെയ്തിട്ടുണ്ട്. 2030ഓടെ 50 ജിഗാവാട്ട് പുനരുപയോഗ ഊർജ്ജ ശേഷി കൈവരിക്കുക എന്ന ലക്ഷ്യത്തിന്റെ ഭാഗമായി, 2027 സാമ്പത്തിക വർഷത്തിൽ 10 ജിഗാവാട്ട് അവർ ബാറ്ററി സ്റ്റോറേജ് കൂടി കൂട്ടിച്ചേർക്കാനും അടുത്ത അഞ്ച് വർഷത്തിനുള്ളിൽ സ്റ്റോറേജ് പോർട്ട്ഫോളിയോ 50 ജിഗാവാട്ട് അവർ ആയി ഉയർത്താനും കമ്പനി പദ്ധതിയിടുന്നു. ഗുജറാത്തിലെ കമ്പനിയുടെ മുൻനിര പദ്ധതിയായ ഖാവ്ദ റിന്യൂവബിൾ എനർജി പാർക്ക് ഈ വിപുലീകരണ പദ്ധതികളിൽ പ്രധാന പങ്കുവഹിക്കുന്നു. കച്ച് ജില്ലയിൽ 538 ചതുരശ്ര കിലോമീറ്ററിലായി വ്യാപിച്ചുകിടക്കുന്ന ഈ പ്രൊജക്റ്റ് 30 ജിഗാവാട്ട് ശേഷിയോടെ ലോകത്തിലെ ഏറ്റവും വലിയ പുനരുപയോഗ ഊർജ്ജ പ്ലാന്റായി മാറുമെന്നാണ് പ്രതീക്ഷിക്കുന്നത്. ഈ സൈറ്റിൽ ഇതിനകം 9.5 ജിഗാവാട്ട് സൗരോർജ്ജ ശേഷി കമ്പനി കമ്മീഷൻ ചെയ്തിട്ടുണ്ട്, ഇത് പദ്ധതിയുടെ ആകെ ലക്ഷ്യത്തിന്റെ 30 ശതമാനത്തിലധികം വരും. അദാനി ഗ്രീൻ എനർജി ലിമിറ്റഡിന്റെ കണക്കുകൾ പ്രകാരം, അവരുടെ 20 ജിഗാവാട്ട് പുനരുപയോഗ ഊർജ്ജ പോർട്ട്ഫോളിയോയ്ക്ക് പ്രതിവർഷം 9 ദശലക്ഷത്തിലധികം വീടുകൾക്ക് വൈദ്യുതി നൽകാൻ കഴിയും. അതോടൊപ്പം ഓരോ വർഷവും 37 ദശലക്ഷം ടണ്ണിലധികം കാർബൺ പുറന്തള്ളൽ കുറയ്ക്കാനും ഇതിന് സാധിക്കും; ഇത് ഏകദേശം 8.1 ദശലക്ഷം കാറുകൾ റോഡിൽ നിന്ന് മാറ്റുന്നതിന് തുല്യമാണ്. അദാനി ഗ്രീൻ എനർജി നിലവിൽ ഇന്ത്യയിലെ 12 സംസ്ഥാനങ്ങളിലായി പുനരുപയോഗ ഊർജ്ജ പദ്ധതികൾ നടത്തുന്നുണ്ട്. ഇന്ത്യയുടെ ശുദ്ധമായ ഊർജ്ജ, ഡീകാർബണൈസേഷൻ ലക്ഷ്യങ്ങൾക്ക് അനുസൃതമായി 2030-ഓടെ 50 ജിഗാവാട്ട് പ്രവർത്തന ഊർജ്ജ ശേഷി കൈവരിക്കുക എന്ന ലക്ഷ്യത്തിലേക്കാണ് കമ്പനി നീങ്ങുന്നത്.