സ്വര്ണത്തിന്റെയും വെള്ളിയുടെയും വിലകള് സര്വകാല റെക്കോര്ഡുകളില് നിന്ന് താഴേക്ക് വീണ് തുടങ്ങിയതോടെ രാജ്യത്തെ സ്വര്ണാഭരണ വിപണി വീണ്ടും ഉണര്വിലേക്ക്. പശ്ചിമേഷ്യയിലെ രാഷ്ട്രീയ സംഘര്ഷങ്ങളില് അനുഭവപ്പെട്ട നേരിയ അയവാണ് വലിയ കുതിപ്പിലായിരുന്ന സ്വര്ണവില കുറയാന് ആഗോള വിപണിയില് വഴിയൊരുക്കിയത്. ഉത്സവ-കല്യാണ സീസണുകള്ക്ക് മുന്നോടിയായി സ്വര്ണവിലയിലുണ്ടായ ഇടിവ് ഉപഭോക്താക്കള്ക്ക് ആശ്വാസമാണ്.
കഴിഞ്ഞ ജൂണ് മാസം തൊട്ട് സ്വര്ണ വില താഴേക്ക് പതിക്കാന് തുടങ്ങിയിരുന്നു. ഇത് സ്വര്ണത്തോടുള്ള ഡിമാന്ഡ് വലിയ തോതില് ഉയരാന് ഇടയാക്കിയിട്ടുണ്ട്. ഇതിനു മുന്പുള്ള മാസങ്ങളില് സ്വര്ണവില കുതിച്ചുയര്ന്നതും ഒപ്പം ഇറക്കുമതി തീരുവ വര്ധിപ്പിച്ചതും കാരണം വിപണി നേരിട്ട തളര്ച്ചയ്ക്കാണ് ഇതോടെ വിരാമമായത്. ഡല്ഹിയിലെ പ്രമുഖ സ്വര്ണക്കച്ചവട കേന്ദ്രമായ ദരിബ കലാനില് ഉള്പ്പെടെ സ്വര്ണ വ്യാപാരം ഇതിനകം ഇരുപത് ശതമാനത്തിലധികം വര്ധിച്ചു
കഴിഞ്ഞ ഏതാനും മാസങ്ങളായി കടുത്ത മന്ദത നേരിട്ട ശേഷമാണ് രാജ്യത്തെ പ്രധാന നഗരങ്ങളിലെല്ലാം ഇപ്പോള് വിപണി സജീവമാകുന്നത്. സ്വര്ണ്ണവില ഉയര്ന്നു നിന്ന സമയത്ത് കമ്പോളങ്ങളില് സന്ദര്ശകരുടെ എണ്ണത്തില് ഗണ്യമായ കുറവുണ്ടായിരുന്നു. എന്നാല് ഭാരം കുറഞ്ഞ ആഭരണങ്ങള്ക്കും നിക്ഷേപ ആവശ്യങ്ങള്ക്കുമുള്ള വാങ്ങലുകള് സാധാരണ നിലയിലേക്ക് തിരികെ വന്നിട്ടുണ്ട്. ഉപഭോക്താക്കള് നേരിട്ട് കടകളില് എത്തി സ്വര്ണം വാങ്ങുന്ന നിരക്കില് ഇതിലൂടെ മികച്ച പുരോഗതിയാണ് രേഖപ്പെടുത്തുന്നത്. സ്വര്ണ ഇറക്കുമതി രംഗത്ത് ഏര്പ്പെടുത്തിയ 9 ശതമാനത്തോളം വരുന്ന കസ്റ്റംസ് ഡ്യൂട്ടി വര്ദ്ധനവാണ് മുന്പ് വിപണിയില് താല്ക്കാലിക തളര്ച്ചയുണ്ടാക്കിയത്. നികുതി ഭാരം ഉയര്ന്നതോടെ ഉപഭോക്താക്കള് വിപണിയില് നിന്നും താല്ക്കാലികമായി അകലം പാലിച്ചു. എന്നാല് കഴിഞ്ഞ രണ്ടാഴ്ചയോളമായി വിപണി ഈ പ്രവണതകളെ മറികടന്ന് മുന്നോട്ട് പോകുകയാണെന്ന് ആദിത്യ ബിര്ള ഗ്രൂപ്പിന് കീഴിലുള്ള ഇന്ഡ്രിയ ജ്വല്ലറി ചീഫ് എക്സിക്യൂട്ടീവ് ഓഫീസര് സന്ദീപ് കോഹ്ലി വ്യക്തമാക്കുന്നു. സാധാരണക്കാര് വീണ്ടും വന്തോതില് സ്വര്ണം വാങ്ങാന് തുടങ്ങി എന്ന് ദരിബ കലാന് വിപണിയിലെ പ്രമുഖ ജ്വല്ലറി ഉടമയും അവിടുത്തെ മര്ച്ചന്റ് അസോസിയേഷന് ഭാരവാഹിയുമായ ഗൗരവ് ഗുപ്ത പറഞ്ഞു. വേനല്ച്ചൂടിന് നേരിയ ശമനമുണ്ടായതും ഉപഭോക്താക്കള്ക്ക് കൂടുതല് ആശ്വാസത്തോടെ കടകളിലേക്ക് എത്താന് സഹായകരമായി. ഉത്സവങ്ങള്ക്കും കല്യാണങ്ങള്ക്കുമുള്ള ആഭരണങ്ങള്ക്ക് പുറമെ നിക്ഷേപ ആവശ്യങ്ങള്ക്കായി സ്വര്ണ നാണയങ്ങള്ക്കും ബിസ്കറ്റുകള്ക്കും ഇപ്പോള് വലിയ ആവശ്യക്കാരുണ്ട്. കല്യാണ് ജ്വല്ലേഴ്സ് ജൂണ് പാദത്തില് 38 ശതമാനത്തിലധികം വരുമാന വളര്ച്ച കൈവരിച്ചതായാണ് റിപ്പോര്ട്ട് ചെയ്യുന്നത്. രാജ്യത്തുടനീളമുള്ള എല്ലാ പ്രധാന വിപണികളിലും വില്പനയില് സ്ഥിരതയാര്ന്ന മികച്ച പുരോഗതി നേടാന് കമ്പനിക്ക് ഈ കാലയളവില് സാധിച്ചിട്ടുണ്ട്. കമ്പനിയുടെ ഒരേ ശാഖകളിലെ വില്പന വളര്ച്ചാ നിരക്ക് മാത്രം പരിശോധിച്ചാല് 28 ശതമാനത്തിന്റെ വര്ധനവാണ് ഈ റീട്ടെയില് ഭീമന് രേഖപ്പെടുത്തിയിരിക്കുന്നത്. ഉത്സവ സീസണുകളിലെയും അക്ഷയ തൃതീയ പോലുള്ള സവിശേഷ ദിനങ്ങളിലെയും അനുകൂല വിപണി സാഹചര്യം പരമാവധി പ്രയോജനപ്പെടുത്താന് രാജ്യവ്യാപകമായ ശൃംഖലയുള്ള കല്യാണ് ജ്വല്ലേഴ്സിന് കഴിഞ്ഞു. അതാത് പ്രദേശങ്ങളിലെ ഉപഭോക്താക്കളുടെ താല്പര്യങ്ങള്ക്ക് അനുസരിച്ച് ആഭരണങ്ങളുടെ സവിശേഷമായ ശേഖരം ലഭ്യമാക്കാന് കഴിഞ്ഞതും വിപണിയില് തുണയായി.