പശ്ചിമേഷ്യയിലെ സംഘര്ഷം സ്വര്ണത്തിന് വലിയ തിരിച്ചടിയാണ് നല്കിയിരിക്കുന്നത്. ഇക്കാലയളവില് മഞ്ഞലോഹത്തിന്റെ വില 27% വും വെള്ളിയുടെ വില 52% വും കുറഞ്ഞു. 2025-ലും 2026-ന്റെ തുടക്കത്തിലും ഈ രണ്ട് ലോഹങ്ങളുടെയും വിലയില് വന് വര്ധനവുണ്ടായിരുന്നു. എന്നാല് സംഘര്ഷം ആ നേട്ടങ്ങളെ ഇല്ലാതാക്കുക മാത്രമല്ല, അതിലും വലിയ നഷ്ടമുണ്ടാക്കുകയും ചെയ്തു.
പ്രതിസന്ധി ഘട്ടങ്ങളില് സുരക്ഷിതമായ നിക്ഷേപമാര്ഗമാണ് വിലയേറിയ ലോഹങ്ങള്, പ്രത്യേകിച്ച് സ്വര്ണം. എന്നിട്ടും സ്വര്ണത്തിന് വിലയിടിവ് സംഭവിച്ചതാണ് എല്ലാവരേയും ആശങ്കയിലാക്കുന്നത്. കഴിഞ്ഞ അഞ്ച് മാസത്തിനിടെ ആഗോള സാമ്പത്തിക പ്രതിസന്ധിക്കുള്ള സാധ്യത വര്ധിച്ചിട്ടുണ്ട്. ഏപ്രിലില് ഏഷ്യയിലുടനീളം എണ്ണയ്ക്കും പ്രകൃതിവാതകത്തിനും ക്ഷാമം അനുഭവപ്പെട്ടു.
ജൂണില് സംഘര്ഷത്തിന് താല്ക്കാലിക വിരാമമായത് ആശ്വാസം നല്കിയെങ്കിലും, ഇപ്പോള് വീണ്ടും പ്രതിസന്ധി സാധ്യത വര്ധിച്ചിരിക്കുകയാണ്. പൊതുവെ, സാമ്പത്തിക പ്രതിസന്ധികളെ രണ്ടായി തിരിക്കാം. ഒന്നാമത്തേത് ധനകാര്യ വിപണികളില് നിന്നുണ്ടാകുന്ന പ്രതിസന്ധിയാണ്. രണ്ടാമത്തേത് ഭൗതികമായ വിഭവങ്ങളുടെയോ ഉല്പ്പന്നങ്ങളുടെയോ ക്ഷാമം മൂലം ഉണ്ടാകുന്ന പ്രതിസന്ധി. നിലവില്, രണ്ടാമത് പറഞ്ഞ തരത്തിലുള്ള പ്രതിസന്ധിക്കുള്ള സാധ്യതയാണ് കൂടുതലായിട്ടുള്ളത്. സ്വര്ണവും മറ്റ് വിലയേറിയ ലോഹങ്ങളും പ്രധാനമായും ആദ്യത്തെ തരം പ്രതിസന്ധികളില് നിന്നാണ് സംരക്ഷണം നല്കുന്നത്. അമിതമായ കടബാധ്യതയോടെയാണ് സാമ്പത്തിക വിപണിയിലെ പ്രതിസന്ധിയുടെ തുടക്കം; ഇത് സ്വകാര്യ മേഖലയിലോ പൊതുമേഖലയിലോ സംഭവിക്കാം. കടം വര്ധിക്കുമ്പോള്, അത് കൈകാര്യം ചെയ്യാവുന്ന നിലയിലാക്കാന് പണനയം കൂടുതല് ഉദാരമാക്കുന്നു. പലിശനിരക്ക് കുറയുന്നത് ഊഹക്കച്ചവടത്തിനായുള്ള വായ്പകള്ക്ക് ആക്കം കൂട്ടുന്നു. കമ്പനികളുടെ കടബാധ്യത അമിതമാകുമ്പോള് ബാങ്കുകള്ക്ക് നഷ്ടം സംഭവിക്കുന്നു. തകരാന് അനുവദിക്കാനാവാത്തത്ര വലുതായ കമ്പനികളെയും ബാങ്കുകളെയും രക്ഷിക്കാന് സര്ക്കാരുകള് ഇടപെടുന്നു. സ്വകാര്യ മേഖലയില് തുടങ്ങുന്ന കടബാധ്യതകള് ഒടുവില് പൊതുമേഖലയിലെ ബാധ്യതയായി മാറുന്നു. കാലക്രമേണ, പൊതുമേഖലാ കടം അമിതമായി വര്ധിക്കുന്നു. തുടര്ന്ന് സര്ക്കാരിന് ആ കടം മോണിറ്റൈസ് ചെയ്യേണ്ടി വരുന്നു. അതായത്, പണം അച്ചടിച്ച് വിപണിയിലിറക്കി പണപ്പെരുപ്പം സൃഷ്ടിച്ചുകൊണ്ട് കടത്തിന്റെ യഥാര്ത്ഥ മൂല്യം കുറയ്ക്കുന്നു. ഇതിന്റെ ഫലമായി ഉയര്ന്ന പണപ്പെരുപ്പം ഉണ്ടാകുന്നു. യഥാര്ത്ഥ മൂല്യത്തില് കടം കുറയുന്നു. ഉയര്ന്ന പണപ്പെരുപ്പം കടബാധ്യത എന്ന പ്രശ്നം പരിഹരിക്കുന്നു. അതേസമയം മറ്റ് പല പ്രശ്നങ്ങളും സൃഷ്ടിക്കുകയും ചെയ്യുന്നു. പണപ്പെരുപ്പത്തെ നേരിടാനുള്ള ഏറ്റവും മികച്ച മാര്ഗം സ്വര്ണം പോലുള്ള വിലയേറിയ ലോഹങ്ങളില് നിക്ഷേപിക്കുക എന്നതാണ്. പണപ്പെരുപ്പം കൂടുമ്പോള് സ്വര്ണത്തിന്റെയും വെള്ളിയുടെയും വിലയും വര്ദ്ധിക്കാറുണ്ട്. പണപ്പെരുപ്പം ഉണ്ടാകുമെന്ന സാധ്യത പോലും സ്വര്ണവില ഉയരാന് കാരണമാകുന്നു. ആഭ്യന്തര സാമ്പത്തിക നയങ്ങളിലെ പിഴവുകളാണ് ഇത്തരമൊരു പ്രതിസന്ധിക്ക് കാരണമാകുന്നത്. അവശ്യവസ്തുക്കളുടെ ലഭ്യതയിലുണ്ടാകുന്ന കുറവ് മൂലമാണ് രണ്ടാമത്തെ തരം സാമ്പത്തിക പ്രതിസന്ധി ഉണ്ടാകുന്നത്. എണ്ണയുടെയും പ്രകൃതിവാതകത്തിന്റെയും ക്ഷാമം വീണ്ടും ഉണ്ടാകാനുള്ള വലിയ സാധ്യത നിലവിലുണ്ട്. ആദ്യഘട്ട പ്രതിസന്ധി മൂര്ച്ഛിച്ച ഏപ്രിലില് എണ്ണവില 135 ഡോളര് കടന്നിരുന്നു. ഊര്ജ്ജ ഉല്പ്പന്നങ്ങള്ക്ക് വില കൂടുമ്പോള് ഡിമാന്ഡ് കുറയും. അതുവഴി ഉല്പ്പാദനം കുറയുകയും സാമ്പത്തിക പ്രവര്ത്തനങ്ങള് മന്ദഗതിയിലാവുകയും ചെയ്യുന്നു. ഇത് സ്വര്ണത്തെയും വെള്ളിയെയും ബാധിക്കുന്നു. കാരണം ഊര്ജ്ജം ഒരു അവശ്യവസ്തുവാണ്, എന്നാല് സ്വര്ണം അങ്ങനെയല്ല. ഊര്ജ്ജ വില കൂടുമ്പോള് അതിനായി കൂടുതല് പണം ചെലവഴിക്കേണ്ടി വരുന്നു. തല്ഫലമായി, സ്വര്ണത്തില് നിക്ഷേപിക്കാന് ലഭ്യമായ തുക കുറയുന്നു. കഴിഞ്ഞ അഞ്ച് മാസത്തിനിടെ ഊര്ജ്ജ ഇറക്കുമതിക്കുള്ള ചെലവ് വര്ധിച്ചിട്ടുണ്ട്. നികുതി വര്ധിപ്പിച്ചുകൊണ്ട് സ്വര്ണ ഇറക്കുമതിക്കുള്ള ചെലവ് കുറയ്ക്കാന് സര്ക്കാര് പ്രത്യേക നടപടികള് സ്വീകരിച്ചിട്ടുമുണ്ട്. ഉയര്ന്ന ഊര്ജ്ജ ചെലവും വര്ധിച്ച നികുതിയും ചേര്ന്നുള്ള സാഹചര്യം സ്വര്ണ ഇറക്കുമതിയില് വലിയ കുറവുണ്ടാക്കി.