തലമുറകളുടെ ഹൃദയം കവർന്ന സ്വരമാധുര്യം ഇനി ഓർമ്മ. തെന്നിന്ത്യയുടെ വാനമ്പാടിയായ വിഖ്യാത ഗായിക എസ്. ജാനകിയുടെ വേർപാടിൽ സംഗീത-ചലച്ചിത്ര മേഖലയും രാഷ്ട്രീയ രംഗവും ഒന്നടങ്കം അനുശോചനവുമായി എത്തുകയാണ്. ആറ് പതിറ്റാണ്ടിലേറെക്കാലം ഇന്ത്യൻ ചലച്ചിത്ര സംഗീത ലോകത്തെ തൻ്റെ അസാധാരണമായ ശബ്ദം കൊണ്ട് വിസ്മയിപ്പിച്ച പ്രതിഭയായിരുന്നു ജാനകി. മാതൃഭാഷ മലയാളമല്ലായിരുന്നിട്ടും, മലയാളികൾക്ക് അവരുടെ സ്വന്തം 'ജാനകിയമ്മ'യായിരുന്നു ഈ ഗായിക. ജാനകിയമ്മ പാടിത്തീർത്ത ഓരോ ഗാനവും ഭാവസാന്ദ്രത കൊണ്ടും ഉച്ചാരണശുദ്ധി കൊണ്ടും എന്നും മലയാളിയുടെ നെഞ്ചോട് ചേർന്നുനിൽക്കുന്നവയാണ്. ഗായികയുടെ വിയോഗവാർത്ത പുറത്തുവന്നതിന് പിന്നാലെ സമൂഹത്തിന്റെ വിവിധ തുറകളിലുള്ള ഒട്ടേറെ പ്രമുഖരാണ് തങ്ങളുടെ പ്രിയപ്പെട്ട ഗായികയ്ക്ക് വൈകാരികമായ വാക്കുകളിലൂടെ ആദരാഞ്ജലികൾ അർപ്പിച്ചു രംഗത്തെത്തുന്നത്.
എസ്. ജാനകിയുടെ വിയോഗത്തിൽ മുഖ്യമന്ത്രി വി.ഡി. സതീശൻ കടുത്ത ദുഃഖവും അനുശോചനവും രേഖപ്പെടുത്തി. തെന്നിന്ത്യയുടെ വാനമ്പാടി എന്ന വിശേഷണത്തിനും അപ്പുറമാണ് എസ്. ജാനകി ഇന്ത്യൻ ചലച്ചിത്ര ഗാന ശാഖയ്ക്ക് നൽകിയ സംഭാവനകളെന്ന് അദ്ദേഹം ഓർമ്മിപ്പിച്ചു. ആറ് പതിറ്റാണ്ടിലേറെ നീണ്ട സംഗീത സപര്യയിലൂടെ അവർ കോടിക്കണക്കിന് മനുഷ്യരുടെ ഹൃദയങ്ങളെയാണ് കീഴടക്കിയത്. മാതൃഭാഷ മലയാളമല്ലെങ്കിൽ പോലും, ഒരു മലയാളി പാടുന്നതിനേക്കാൾ കൃത്യതയോടെയും അത്രമേൽ ഭാവത്തോടെയും അവർ പാടിയ പാട്ടുകൾ നമ്മുടെ സംസ്കാരത്തിന്റെ ഭാഗമാണെന്നും മുഖ്യമന്ത്രി തൻ്റെ അനുശോചന കുറിപ്പിൽ വ്യക്തമാക്കി.
കോടിക്കണക്കിന് മനുഷ്യരുടെ ഹൃദയങ്ങളിൽ സ്വന്തമായൊരു സ്ഥാനം നേടിയെടുത്ത അതുല്യ ഗായികയാണ് എസ്. ജാനകിയെന്ന് പ്രതിപക്ഷ നേതാവ് പിണറായി വിജയൻ അനുസ്മരിച്ചു. ജാനകിയമ്മയുടെ വേർപാട് ഇന്ത്യൻ സംഗീത ലോകത്തിന് ഒട്ടും നികത്താനാവാത്ത തീരാനഷ്ടമാണെന്നും അവരുടെ മനോഹരമായ ശബ്ദവും ഗാനങ്ങളും വരും തലമുറകളിലും നിലനിൽക്കുമെന്നും അദ്ദേഹം തൻ്റെ സന്ദേശത്തിൽ പറഞ്ഞു. തമിഴ്നാട് മുഖ്യമന്ത്രി ജോസഫ് വിജയും ഗായികയുടെ മരണത്തിൽ അനുശോചനം രേഖപ്പെടുത്തി. ശ്രുതിമധുരമായ ശബ്ദം കൊണ്ടും, സംഗീതത്തോടുള്ള തികഞ്ഞ സമർപ്പണം കൊണ്ടും ആരാധകഹൃദയങ്ങളിൽ അവർ എന്നും ജീവിക്കുമെന്ന് വിജയ് എക്സിൽ കുറിച്ചു. വേർപാടിന്റെ ഈ ദുഃഖസമയത്ത് ജാനകിയമ്മയുടെ കുടുംബത്തെയും സഹപ്രവർത്തകരെയും ആരാധകരെയും തൻ്റെ അനുശോചനം അറിയിക്കുന്നതായും തമിഴ്നാട് മുഖ്യമന്ത്രി കൂട്ടിച്ചേർത്തു.
സിനിമാ ലോകത്തുനിന്നും വൻ താരനിരയാണ് ജാനകിയമ്മയ്ക്ക് അനുശോചനവുമായി എത്തുന്നത്. അതി വൈകാരികമായ വാക്കുകളിലൂടെയാണ് കമൽഹാസൻ എസ്. ജാനകിയെ അനുസ്മരിച്ചത്. "പാട്ട് എന്നും ഇവിടെ മുഴങ്ങിക്കൊണ്ടിരിക്കും, പക്ഷേ ആ സ്നേഹം ഇനി ഞാൻ എവിടെ തേടും അമ്മേ..." എന്നായിരുന്നു അടക്കിവെക്കാൻ കഴിയാത്ത സങ്കടത്തോടെ കമൽഹാസൻ എക്സിൽ കുറിച്ചത്. ഈ വലിയ ദുഃഖം പേറുന്ന എല്ലാവരുടെയും സങ്കടത്തിൽ താനും പങ്കുചേരുന്നതായി അദ്ദേഹം പറഞ്ഞു. നടൻ മമ്മൂട്ടിയും ഫേസ്ബുക്കിലൂടെ വിഖ്യാത ഗായികയ്ക്ക് ആദരാഞ്ജലികൾ അർപ്പിച്ചു. തൻ്റെ സിനിമാ കരിയറിലെ നാഴികക്കല്ലായ പല ചിത്രങ്ങളിലും ജാനകിയമ്മ പാടിയ ഗാനങ്ങൾ കഥാപാത്രങ്ങൾക്ക് നൽകിയ ജീവനെക്കുറിച്ച് മമ്മൂട്ടി കുറിപ്പിൽ ഓർമ്മിപ്പിച്ചു. പ്രത്യേകിച്ച്, ഐ.വി. ശശി സംവിധാനം ചെയ്ത് 1981-ൽ പുറത്തിറങ്ങിയ 'തൃഷ്ണ' എന്ന ചിത്രത്തിലെ "മൈനാകം കടലിൽ നിന്നുയരുന്നുവോ..." എന്ന വിഖ്യാത പ്രണയഗാനം മമ്മൂട്ടി എന്ന നടന്റെ കരിയറിലെ തന്നെ ഏറ്റവും വലിയ ഹിറ്റുകളിൽ ഒന്നാണ്. ശ്യാമിന്റെ സംഗീതത്തിൽ ബിച്ചു തിരുമല രചിച്ച ഈ ഗാനം എസ്. ജാനകി എന്ന ഗായികയുടെ അസാധാരണമായ ശബ്ദഭംഗി കൊണ്ടാണ് ഇന്നും മലയാളികളുടെ മനസ്സിൽ അമരമായി നിൽക്കുന്നത്. ഈ ഗാനം മമ്മൂട്ടി എന്ന യുവനടനെ പ്രേക്ഷകർക്കിടയിൽ കൂടുതൽ പ്രിയങ്കരനാക്കുന്നതിൽ വലിയ പങ്കുവഹിച്ചിരുന്നു. ഗായിക എസ്. ജാനകിയുടെ വേർപാടിൽ പ്രശസ്ത ഗാനരചയിതാവ് ശ്രീകുമാരൻ തമ്പി പങ്കുവെച്ച ഓർമ്മകൾ ഏറെ ശ്രദ്ധേയമായിരുന്നു. ജാനകിയമ്മ യഥാർത്ഥത്തിൽ സംഗീതത്തിന്റെ അവതാരമാണെന്ന് അദ്ദേഹം വിശേഷിപ്പിച്ചു. സംഗീതത്തിന്റെ അടിസ്ഥാന പാഠങ്ങൾ ഔദ്യോഗികമായി പഠിക്കാതെയാണ് അവർ ഇന്ത്യൻ സംഗീത ലോകത്തിന്റെ നെറുകയിൽ എത്തിയതെന്ന അത്ഭുതപ്പെടുത്തുന്ന കാര്യവും അദ്ദേഹം പങ്കുവെച്ചു. ജാനകിയമ്മയ്ക്ക് കേരള സംസ്ഥാന അവാർഡ് നേടിക്കൊടുത്ത മൂന്ന് ഗാനങ്ങളിൽ രണ്ടെണ്ണം തന്റേതായിരുന്നു എന്ന അപൂർവ്വ ഭാഗ്യവും തനിക്കുണ്ടെന്ന് അദ്ദേഹം അനുസ്മരിച്ചു. സംഗീതമുള്ളിടത്തോളം കാലം ജാനകിയമ്മയുടെ ശബ്ദം ഇവിടുത്തെ കാറ്റിലും കോടിക്കണക്കിന് മനുഷ്യരുടെ മനസ്സിലും മായാതെ നിലനിൽക്കുമെന്ന കാര്യത്തിൽ സംശയമില്ല.