എഐ സെർച്ച് മോഡ് ഇന്ത്യയിലും അവതരിപ്പിച്ച് ഗൂഗിൾ, ഇനി ലിങ്കുകൾ തിരഞ്ഞ് സമയം കളയേണ്ട

Updated: Thursday, July 10, 2025, 19:58 [IST]

ഇന്ത്യൻ ഉപയോക്താക്കൾക്കായി എഐ മോഡ് സെർച്ച് ലഭ്യമാക്കി ഗൂഗിൾ. തുടക്കത്തിൽ ഇംഗ്ലീഷിൽ മാത്രമാണ് ഈ സേവനം ലഭ്യമാകുക. ഗൂഗിളിന്റെ സാധാരണ സെർച്ച് എഞ്ചിനിൽ സംയോജിപ്പിച്ചിട്ടുള്ള ഈ പുതിയ ടൂൾ നിങ്ങൾക്ക് ചോദ്യങ്ങൾ ചോദിക്കാനും, സമഗ്രവും, ഉള്ളടക്കത്തെ അടിസ്ഥാനമാക്കിയുള്ളതുമായ ഉത്തരങ്ങൾ സെർച്ച് റിസൾട്ടിൽ നിന്ന് നേരിട്ട് ലഭിക്കാനും സഹായിക്കുന്നു.

ലിങ്കുകളുടെ ഒരു ലിസ്റ്റ് നൽകുന്നതാണ് പരമ്പരാഗത സെർച്ച് രീതി. ഇതിൽ നിന്ന് വ്യത്യസ്തമായി, എഐ ടൂൾ ആർട്ടിഫിഷ്യൽ ഇന്റലിജൻസ് ഉപയോഗിച്ച് വിശദമായ ഉത്തരം നിങ്ങൾക്ക് നൽകുന്നു. അതായത് ഇനി ലിങ്കുകൾ ഓരോന്നായി പരതി സമയം കളയേണ്ടതില്ല എന്നർത്ഥം.

ഈ വർഷം ആദ്യം യു.എസിൽ ആരംഭിച്ച ശേഷം, ഗൂഗിൾ പിന്നീട് ജൂണിൽ സെർച്ച് ലാബ്സ് വഴി ഇന്ത്യയിൽ എഐ മോഡ് ലഭ്യമാക്കി. ആദ്യഘട്ട പരീക്ഷണങ്ങൾക്കും ഉപയോക്താക്കളിൽ നിന്നുള്ള ഫീഡ്‌ബാക്കിനും ശേഷം, ലാബ്സ് വഴി സൈൻ-അപ്പുകൾ ആവശ്യമില്ലാതെ തന്നെ ഗൂഗിൾ ഇപ്പോൾ ഇന്ത്യയിലുടനീളം ഇത് വ്യാപിപ്പിക്കുകയാണ്. എന്നിരുന്നാലും, ഈ ഫീച്ചർ തൽക്കാലം ഇംഗ്ലീഷിൽ മാത്രമായിരിക്കും ലഭ്യമാകുക.

സാധാരണയായി ഒന്നിലധികം സെർച്ചുകൾ വേണ്ടിവരുന്ന വിശദമായ ചോദ്യങ്ങൾക്കും, വിവിധ ഭാഗങ്ങളുള്ള അന്വേഷണങ്ങൾക്കും മറുപടി നൽകാനാണ് ഗൂഗിൾ എഐ മോഡ് രൂപകൽപ്പന ചെയ്തിരിക്കുന്നത്. ചോദ്യങ്ങളെ ഉപചോദ്യങ്ങളായി വിഭജിച്ച് വെബിൽ നിന്ന് വിവരങ്ങൾ ശേഖരിക്കാൻ ഗൂഗിളിന്റെ ജെമിനി 2.5 മോഡലിന്റെ ഒരു പതിപ്പ് ഇത് ഉപയോഗിക്കുന്നു. തുടർന്ന് ലഭിക്കുന്ന പ്രതികരണം സംഗ്രഹിച്ച ഉത്തരമായി ദൃശ്യമാവും. കൂടുതൽ വായനയ്‌ക്കായി ലിങ്കുകളും, തുടർ ചോദ്യങ്ങൾക്കുള്ള ഓപ്ഷനുകളും ഇതിൽ ഉണ്ടാകും. ഇന്ത്യൻ ഉപയോക്താക്കൾക്ക് ഗൂഗിൾ സെർച്ച് റിസൾട്ടുകളിലെ പുതിയ "എഐ മോഡ്" ടാബ് വഴിയോ അല്ലെങ്കിൽ ഗൂഗിൾ ആപ്പിന്റെ സെർച്ച് ബാർ വഴിയോ ഈ ഫീച്ചർ ഉപയോഗിക്കാൻ കഴിയും.

ഉപയോക്താക്കൾക്ക് ചോദ്യങ്ങൾ ടൈപ്പ് ചെയ്യാനോ, വോയിസ് ഇൻപുട്ട് ഉപയോഗിക്കാനോ അല്ലെങ്കിൽ ഗൂഗിൾ ലെൻസ് ഉപയോഗിച്ച് ചിത്രങ്ങൾ അപ്‌ലോഡ് ചെയ്യാനോ കഴിയും. ഉദാഹരണത്തിന്, ഒരു ചെടിയുടെ ചിത്രം എടുത്ത് അതിനെ എങ്ങനെ പരിപാലിക്കാമെന്ന് ചോദിച്ചാൽ, എഐ മോഡൽ ഘട്ടം ഘട്ടമായുള്ള നിർദ്ദേശങ്ങളും തിരിച്ചറിയാനുള്ള വിവരങ്ങളും നൽകും.

എഐ മോഡിന്റെ പ്രയോജനങ്ങൾ

ഉൽപ്പന്നങ്ങൾ താരതമ്യം ചെയ്യുക, യാത്രാ പദ്ധതികൾ തയ്യാറാക്കുക, സാങ്കേതിക വിഷയങ്ങൾ മനസിലാക്കുക തുടങ്ങിയ ദൈർഘ്യമേറിയതും വിശാലവുമായ സെർച്ചുകൾക്ക് ഈ പുതിയ എഐ മോഡ് വളരെ പ്രയോജനകരമാണെന്ന് ഗൂഗിൾ പറയുന്നു. സാധാരണ സെർച്ചുകളേക്കാൾ രണ്ടും മൂന്നും ഇരട്ടി ദൈർഘ്യമുള്ള ചോദ്യങ്ങളാണ് ആദ്യ ഉപയോക്താക്കൾ ചോദിച്ചത്. വിശദമായ മാർഗ്ഗനിർദ്ദേശമോ ഉപദേശമോ ആണ് അവർ പ്രധാനമായും തേടിയത്. എളുപ്പത്തിൽ തന്നെ വേണ്ട ഉത്തരം കണ്ടെത്താൻ അവർക്ക് സാധിച്ചു

"ക്വറി ഫാൻ-ഔട്ട്" എന്ന സാങ്കേതികതയാണ് ഈ ഫീച്ചർ ഉപയോഗിക്കുന്നത്. ഇവിടെ ഗൂഗിളിന്റെ സിസ്റ്റം ഒരു ചോദ്യത്തെ പല ഭാഗങ്ങളായി തിരിക്കുകയും ഒന്നിലധികം സെർച്ചുകൾ നടത്തുകയും ഒടുവിൽ ഒരു പ്രതികരണം സമാഹരിക്കുകയും ചെയ്യുന്നു. ഇത് വിഷയത്തെക്കുറിച്ച് ആഴത്തിലുള്ള വിവരങ്ങൾ നൽകാനും സാധാരണ സെർച്ച് റിസൾട്ടുകളിൽ വരാൻ സാധ്യതയില്ലാത്ത ഉള്ളടക്കം കണ്ടെത്താനും സഹായിക്കുന്നു.

നിലവിലെ പരിമിതികൾ

നിലവിൽ ഇന്ത്യയിൽ എഐ മോഡ് ഇംഗ്ലീഷ് ഭാഷയിൽ മാത്രമേ ഉപയോഗിക്കാൻ കഴിയൂ. മറ്റ് ഭാഷകൾക്ക് ഭാവിയിൽ പിന്തുണ നൽകുമെന്ന് ഗൂഗിൾ വാഗ്ദാനം ചെയ്തിട്ടുണ്ട്. കൂടാതെ, ഈ എഐ ടൂൾ ഇപ്പോഴും പരീക്ഷണ ഘട്ടത്തിലാണ്. എഐയിൽ നിന്ന് ലഭിക്കുന്ന ഉത്തരങ്ങളിൽ വിശ്വാസമില്ലെങ്കിൽ സാധാരണ സെർച്ച് റിസൾട്ടുകൾ കാണിക്കുമെന്നും കമ്പനി അറിയിച്ചു.