മാര്ച്ച് മാസം നിങ്ങൾക്ക് ആരോഗ്യപരമോ? നിങ്ങളുടെ ആരോഗ്യരാശിയെ കുറിച്ചറിയൂ..
ആരോഗ്യത്തോടെ ജീവിക്കാനാണ് എല്ലാവർക്കും ആഗ്രഹം. മാര്ച്ച് മാസം നിങ്ങൾക്ക് ആരോഗ്യപരമോ? നിങ്ങളുടെ ആരോഗ്യരാശിയെ കുറിച്ചറിയൂ..
മേടക്കൂറ് (അശ്വതി, ഭരണി, കാര്ത്തിക ¼)
പലവിധ അസുഖങ്ങള് വരാം. പകര്ച്ചവ്യാധികളെ സൂക്ഷിക്കുക. ഭക്ഷണത്തിലൂടെ പകരുന്ന മഞ്ഞപ്പിത്തം, ടൈഫോയ്ഡ് തുടങ്ങിയവ പിടിപെടാതെ ശ്രദ്ധപാലിക്കുക. കാലാവസ്ഥാവ്യതിയാനവും പലവിധ അസ്വസ്ഥതകള്ക്ക് ഇടയാക്കും. കര്മ്മരംഗത്ത് അസുഖങ്ങള് കാരണം മന്ദത ഉണ്ടാകാം. സര്ക്കാര് ഉദ്യോഗസ്ഥര്ക്ക് മാനസിക സമ്മര്ദ്ദങ്ങള് വര്ദ്ധിക്കും. പ്രതികൂലമായ സ്ഥലംമാറ്റവും മനസ്സിനു ടെന്ഷനുണ്ടാക്കും. നിങ്ങളുടെ ഗൃഹാരൂഡസ്ഥിതി രോഗകാരണമായേക്കാം. ഗൃഹാവസ്ഥ ശരിയായി പരിശോധിച്ച് ഉചിതമായ മാറ്റങ്ങള് വരുത്തേണ്ടത് ആവശ്യമായി കാണുന്നു. സകല ദോഷശാന്തിക്കായി മഹാധന്വന്തരീപൂജ നടത്തുകയും ധന്വന്തരി ഏലസ്സ് ധരിക്കുകയും ചെയ്യുന്നത് ഉത്തമമായി കാണുന്നു.
ഇടവക്കൂറ് (കാര്ത്തിക ¾, രോഹിണി, മകയിരം ½)
ആരോഗ്യസ്ഥിതി മോശമായിട്ടു വരാം. പ്രവര്ത്തനരംഗത്ത് അതു നിമിത്തം മാന്ദ്യം അനുഭവപ്പെടും. തൊഴില് രംഗത്ത് മാനസിക സംഘര്ഷങ്ങള് വര്ദ്ധിക്കും. നൂതന സംരംഭങ്ങളെ ബാധിക്കും. ഉദ്യോഗസ്ഥര്ക്ക് ശാരീരിക അസ്വസ്ഥതകള് നിമിത്തം പ്രശ്നങ്ങള് അധികരിക്കും. സ്ത്രീകളുടെ അവശതകള് കൂടുതലാകും. മധ്യപ്രായമെത്തിയവര് ഗൗരവമേറിയ രോഗങ്ങളെ സൂക്ഷിക്കുക. മനസ്സിന്റെ സംഘര്ഷവും പിരിമുറുക്കവും വര്ദ്ധിക്കാതെയിരിക്കുന്നതിന് യോഗ, മെഡിറ്റേഷന് ഇവ ശീലിക്കുക. നിങ്ങളുടെ ജീവിതത്തില് ആരോഗ്യപരമായ ഒരു വഴിത്തിരിവന്റെ സമയം അടുത്തുകൊണ്ടിരിക്കുന്നു. വളരെ ശ്രദ്ധയും സൂക്ഷ്മതയും എല്ലാ കാര്യത്തിലും പാലിക്കുക. മഹാസഞ്ജീവനി പൂജ നടത്തുന്നത് ഏറ്റവും ഉത്തമമായി കാണുന്നു.
മിഥുനക്കൂറ് (മകയിരം ½ , തിരുവാതിരം, പുണര്തം 3/4)
രോഗസാധ്യതകള് കാണുന്നു. അപ്രതീക്ഷിതമായ വീഴ്ച, പരിക്കുകള് ഇവ ഉണ്ടാകുന്നതിനു സാധ്യതയുള്ളതിനാല് ശ്രദ്ധിക്കുക. യാത്രാക്ലേശവും അലച്ചിലും അസുഖങ്ങള് കാരണമാകാം. നിരന്തരമായ ശരീരവേദന, വാതരോഗങ്ങള് ഇവ ഉണ്ടാകുന്നതിനിടയുണ്ട്. വിദേശത്തു ജോലി ചെയ്യുന്നവര് ശാരീരിക അവശതകളെ കരുതിയിരിക്കുക. ഐ.ടി. രംഗത്തു പ്രവര്ത്തിക്കുന്നവര്ക്കും പലവിധ പ്രയാസങ്ങള് ഉണ്ടാകുന്നതിനു സാധ്യത കാണുന്നു. നിങ്ങളുടെ പ്രയാസങ്ങളെ ശരിയായി മനസ്സിലാക്കി ഉചിതമായ പ്രതിവിധികള് ചെയ്യുന്നതിനു കഴിവുള്ള ഒരു ആചാര്യനുമായി അടുത്തുതന്നെ കൂടിക്കാഴ്ചയ്ക്കു സാധ്യത കാണുന്നു. സമ്പൂര്ണ്ണമായ രാശിചിന്ത നടത്തി വേണ്ടതായ പരിഹാരം ചെയ്യുന്നത് ഉത്തമം. കൂടാതെ സമുദ്രനീലം ധരിക്കുന്നതും ഗുണകരം.
കര്ക്കടകക്കൂറ് (പുണര്തം 1/4, പൂയം, ആയില്യം)
ആരോഗ്യപരമായി ഗുണദോഷസമ്മിശ്രാവസ്ഥ അനുഭവപ്പെടും. സാമാന്യമായി ശാരീരികമാവസ്ഥകളില് ദോഷകരമായ പരിവര്ത്തനങ്ങള് അനുഭവപ്പെടുന്നതാണ്. യാത്രാക്ലേശവും അലച്ചിലും വര്ദ്ധിക്കും. ഏതു കാര്യത്തിലും വളരെ ശ്രദ്ധ പാലിക്കുക. ഉദരസംബന്ധമായ വിഷമങ്ങള്ക്ക് സാധ്യത കാണുന്നു. ഭക്ഷണ സംബന്ധമായ കാര്യങ്ങളില് ജാഗ്രത വേണം. നിങ്ങളുടെ രാശിവീഥിയില് വളരെ ദോഷാത്മകമായ ഒരു സാന്നിദ്ധ്യം കാണുന്നതിനാല് വളരെ ശ്രദ്ധിക്കുക. ശരിയായി രാശിവിചിന്തനം നടത്തി, ഉചിതമായ പരിഹാരങ്ങള് ചെയ്യുന്നത് നല്ലത്. മനസ്സിന്റെ പിരിമുറുക്കം നിയന്ത്രിക്കുന്നതിന് യോഗാ, മെഡിറ്റേഷന് ഇവ ശീലിക്കുക. നിങ്ങളുടെ ഗൃഹത്തില്വെച്ച് മഹാനവഗ്രഹശാന്തി നടത്തി ദോഷാത്മകകലകളെ ഒരു നഗ്രഹപ്രതിമയില് ആവാഹിച്ചുമാറ്റുന്നത് ഉത്തമം.
ചിങ്ങക്കൂറ് (മകം, പൂരം, ഉത്രം 1/4)
ഉദ്ദേശിക്കുന്ന രീതിയില് ആരോഗ്യപുരോഗതിയുണ്ടാകില്ല. പലവിധ വിഷമതകള് വര്ദ്ധിച്ചുവരുന്നതായി കാണാം. പകര്ച്ചവ്യാധികള് ഉണ്ടാകുന്നതിനു സാധ്യത വളരെ കൂടുതലാണ്. ദേഹവേദനകളും അധികരിക്കും. ഐ.ടി. രംഗത്ത് ജോലി ചെയ്യുന്നവര് കണ്ണിന് അസുഖങ്ങള്, കഴുത്തിനു വേദനകള് ഇവ കൂടുതലാകാതെ സൂക്ഷിക്കുക. മനസ്സിന്റെ ചിന്താക്കുഴപ്പങ്ങളും ആശങ്കകളും അകറ്റുന്നതിന് ആവശ്യമായതു ചെയ്യുക. രാശിമണ്ഡലത്തില് വളരെ ദോഷകരമായ ഒരു താരകയോഗമാണ് കാണുന്നു. ഇത് രോഗവിഷമങ്ങള് കൂടുതലാകുന്നതിനു കാരണമായിത്തീര്ത്തേക്കാം. ഗൃഹരൂഡത്തിനു ചില ന്യൂനതകള് ഉണ്ടെന്നതിന്റെ സൂചനയുണ്ട്. ഇത് ശരിയായി പരിശോധിച്ച് വേണ്ടതു ചെയ്യുന്നത് ഉത്തമമാകുന്നു.
കന്നിക്കൂറ് (ഉത്രം 3/4, അത്തം, ചിത്തിര 1/2)
ആരോഗ്യരാശിയില് മാറ്റങ്ങളുണ്ടാകും. ആരോഗ്യസംരക്ഷണത്തില് കൂടുതല് അവബോധമുണ്ടാകും. ഗൗരവമേറിയ ചിന്തകളും ഉല്ക്കണ്ഠകളും ആകുലതകളും ദോഷകരമാണെന്നും, ലാളിത്യമാര്ന്ന ചിന്തകളും സരളമായ ജീവിതരീതിയുമാണ് ഉത്തമം എന്നുമുള്ള തിരിച്ചറിവ് കൈവരും. ജീവിതത്തില് കൃത്യനിഷ്ഠയും ഊര്ജ്ജിതമായ പ്രവൃത്തിമേഖലയും കാത്തുസൂക്ഷിക്കും. ആശങ്കകളെ അകറ്റുന്നതാണ്. നിങ്ങളുടെ രാശിവീഥിയില് പൊതുവെ ഗുണകരമായ പ്രധാനമാറ്റങ്ങളാണ് കാണുന്നത്. ഇത് ജീവിതത്തില് വളരെയധികം നേട്ടങ്ങളും അനുഭവങ്ങളും നേടിത്തരുന്നതാണ്. ഇപ്പോഴത്തെ ദശാസന്ധിയും അനുഭവകാലവും ശരിയായി നോക്കി മനസ്സിലാക്കി ഉചിതമായ പ്രതിവിധി ചെയ്യുന്നത് വളരെ ഉത്തമമായി കാണുന്നു.
തുലാക്കൂറ് (ചിത്തിര 1/2, ചോതി, വിശാഖം 3/4)
പൊതുവെ കാര്യതടസ്സങ്ങള് വര്ദ്ധിക്കുന്നതോടൊപ്പം ടെന്ഷനും അധികരിക്കും. മനസ്സിന്റെ ആകുലതകള് ഉല്ക്കണ്ഠകള് ഇവ കൂടുതലാകും. ജീവിതശൈലീരോഗങ്ങള് കൂടുതല് തീവ്രമായിത്തീരും. പകര്ച്ചവ്യാധികളെ സൂക്ഷിക്കേണ്ടതാണ്. ശിരസ്സ് സംബന്ധമായ രോഗങ്ങള്, ഇ.എന്.ടി. രോഗങ്ങള് ഇവയക്കും സാധ്യതയുള്ളതിനാല് വളരെ ശ്രദ്ധിക്കുക. നിങ്ങളുടെ ഗൃഹരാശിയില് വളരെ ദോഷാത്മകമായ ഒരു സാന്നിദ്ധ്യസ്ഥിതി തെളിഞ്ഞുകാണുന്നുണ്ട്. അത് ഒരു സമ്പൂര്ണ്ണ രാശിപ്രശ്നത്തിലൂടെ മനസ്സിലാക്കി ഉചിതമായ പ്രതിവിധി ചെയ്യുന്നത് ഉത്തമം. ദോഷപരിഹാരമായി ഗൃഹാരൂഡത്തില് മഹാനവഗ്രഹശാന്തിക്രിയ, സഞ്ജീവനി പൂജ ഇവ നടത്തുന്നത് വളരെ ഫലപ്രദമായി കാണുന്നു.
വൃശ്ചികക്കൂറ് (വിശാഖം 1/4, അനിഴം, തൃക്കേട്ട)
ഉദ്ദേശിക്കുന്ന കാര്യങ്ങളില് തടസ്സമുണ്ടാകും. ആരോഗ്യപരമായ വിഷമതകള് വര്ദ്ധിക്കും. തലവേദന ഇടയ്ക്കിടെ അനുഭവപ്പെടും. ഇ.എന്.ടി. സംബന്ധമായ പ്രശ്നങ്ങള് ഉണ്ടാകുന്നതിനു സാധ്യത. യാത്രാക്ലേശവും അലച്ചിലും വര്ദ്ധിക്കുന്നത് അസ്വസ്ഥതകളെ സൃഷ്ടിക്കും. വിദേശത്തു ജോലി ചെയ്യുന്നവര് വളരെ സൂക്ഷ്മത പാലിക്കുക. അവിചാരിത പ്രശ്നങ്ങള് വരാം. ഐ.ടി. രംഗത്തുള്ളവര്ക്ക് നേത്രരോഗങ്ങളോ കഴുത്തുവേദനയോ വര്ദ്ധിക്കാതെ ശ്രദ്ധിക്കുക. മനസ്സിന്റെ പിരിമുറുക്കം നിയന്ത്രിക്കുന്നതിനു വ്യാകുലതകള് കുറയ്ക്കുന്നതിനുമായി അതിന്ദ്രീയധ്യാനം, ജപയോഗം ഇവ ശീലിക്കുന്നതിനു സാധ്യത. മഹാസഞ്ജീവിനിപൂജ നടത്തി, രോഗസൂചകകലകളെ ആവാഹിച്ച് ശുദ്ധി ചെയ്യുന്നത് ഉത്തമമായിരിക്കും.
ധനുക്കൂറ് (മൂലം, പൂരാടം, ഉത്രാടം 1/4)
ആരോഗ്യപരമായി വളരെ ശ്രദ്ധിക്കണം. അപ്രതീക്ഷിതമായ രോഗക്ലേശങ്ങള്ക്കു സാധ്യതയുണ്ട്. പകര്ച്ചവ്യാധികള് പിടിപെട്ടേക്കാം. ഡെങ്കിപ്പനി തുടങ്ങിയ കാലാവസ്ഥാമാറ്റത്തിലൂടെയും കൊതുകുകളിലൂടെയും പകരുന്ന രോഗങ്ങളുടെ സാധ്യതയുള്ളതിനാല് ശ്രദ്ധിക്കുക. മധ്യവയസ്സ് കഴിഞ്ഞവര് ബി.പി., പ്രമേഹം തുടങ്ങിയവ നിയന്ത്രണം. അനാവശ്യമായ ചിന്തകളും, മനസ്സിന്റെ പിരിമുറുക്കവും വര്ദ്ധിച്ചേക്കാം. ഭക്ഷ്യവിഷബാധയേല്ക്കാതെ ശ്രദ്ധിക്കുക. നിങ്ങളുടെ രാശി വീഥിയില് ദോഷാത്മകമായ ഗ്രഹയോഗം കാണുന്നതിനാല് വളരെ ജാഗ്രത പാലിക്കുക. സമ്പൂര്ണ്ണ രാശിചിന്ത നടത്തി വസ്തുതകള് അറിയുക. നവഗ്രഹശാന്തി എന്ന ജ്യോതിശാസ്ത്രകര്മ്മം നടത്തുന്നത് ഉത്തമം.
മകരക്കൂറ് (ഉത്രാടം 1/2, തിരുവോണം, അവിട്ടം 3/4)
പൊതുവെ ആരോഗ്യകാര്യങ്ങളില് പുരോഗതിയുണ്ടാകും. മനസ്സിന് ലാളിത്യവും സന്തോഷവും വര്ദ്ധിക്കുന്ന അനുഭവങ്ങള് ഉണ്ടാകും. പരിശ്രമങ്ങള് ഫലപ്രദമായിത്തീരും. കൂടുതല് സ്വസ്ഥത അനുഭവപ്പെടും. പ്രകൃതിയോടിണങ്ങിയ ജീവിതരീതി, ചികിത്സാരീതി ഇവ സ്വീകരിക്കുന്നതാണ്. പുതിയ പ്രവൃത്തി മേഖലയില് ഇറങ്ങുന്നതോടെ ഉന്മേഷം വര്ദ്ധിക്കുന്നതാണ്. നിങ്ങളുടെ ജീവിതത്തില് ആരോഗ്യപരമായ ഒരു വഴിത്തിരിവിന്റെ സമയം ആയിരിക്കുന്നതായി കാണുന്നു. അതിനാല് ശരിയായി പ്രയത്നിക്കുക, നന്നായി മുന്നോട്ടു പോകാം. ഇപ്പോഴത്തെ ഗ്രഹസ്ഥിതി ശരിയായി പരിശോധിച്ച് ഉചിതമായ പ്രതിവിധികള് ചെയ്യുന്നത് ഉത്തമം. സമുദ്രനീലക്കല്ല് ധരിക്കുക.
കുംഭക്കൂറ് (അവിട്ടം 1/2, ചതയം, പൂരുരുട്ടാതി 3/4)
ആരോഗ്യസ്ഥിതിയില് ഗുണദോഷസമ്മിശ്രസ്ഥിതി ഉണ്ടാകും. ഇടയ്ക്കിടെ ചില അസ്വസ്ഥതകള് ഉണ്ടാകുമെങ്കിലും അത് തീവ്രത പ്രാപിക്കില്ല. ദീര്ഘകാലമായി ചെയ്യുന്ന ചില ചികിത്സകള്ക്ക് ഫലമുണ്ടാകും. ജീവിതശൈലീ രോഗങ്ങളെ പ്രതിരോധിക്കുവാനായി പ്രകൃതിജീവന രീതി സ്വീകരിക്കും. പ്രകൃതിയോടിണങ്ങിയ ഭക്ഷണരീതി, മറ്റു കാര്യങ്ങള് ഇവയിലൂടെ പ്രയാസങ്ങളെ ഒരു പരിധിവരെ തരണം ചെയ്യുവാനാകും. നിങ്ങളുടെ രാശിവീഥിയില് ചില ദോഷഭാവങ്ങള് നിലനില്ക്കുന്ന സമയമാണിപ്പോള്. അതിനാല് വളരെ ശ്രദ്ധാപൂര്വ്വം കാര്യങ്ങള് ചെയ്യുക. രാശിചിന്തയിലൂടെ കാര്യങ്ങള് കണ്ടെത്തി ഉചിതമായ പരിഹാരം ചെയ്യേണത് ആവശ്യമായി കാണുന്നു.
മീനക്കൂറ് (പൂരുരുട്ടാതി 1/4, ഉതൃട്ടാതി, രേവതി)
പലവിധത്തിലുള്ള മാറ്റങ്ങള് വന്നുചേരും. ആരോഗ്യപരമായ കാര്യങ്ങളില് ചില പുതിയ തുടക്കങ്ങള് കുറിക്കുന്നതാണ്. ജീവിതശൈലീരോഗങ്ങള്ക്ക് തടയിടുന്നതിനായി പ്രകൃതിചികിത്സാരീതി, പ്രകൃതിജീവന സമ്പ്രദായം ഇവ സ്വീകരിക്കുന്നതാണ്. മനസ്സിന്റെ കാടുകയറിയ ചിന്തകളും ആകുലതകളും രോഗകാരണമായേക്കാവുന്നതാണ്. ഇവയെ പ്രതിരോധിക്കുന്നതിനാല് അതീന്ദ്രിയധ്യാനം, ജപയോഗം ഇവ ശീലിക്കുവാന് ആരംഭിക്കും. യാത്രാക്ലേശം, അലച്ചില് ഇവ ഒഴിവാക്കുന്നതിന് ശ്രമിക്കുക. പുതിയ ചിന്താഗതികള് ഉയര്ത്തിക്കൊണ്ടുവരിക. മനസംഘര്ഷം കുറയ്ക്കുംവിധമുള്ള ഉത്തമമായ കാഴ്ചപ്പാടുകള് സ്വീകരിക്കുവാന് വൈകരുത്. സഞ്ജീവനിപൂജ നടത്തുന്നത് ഗുണകരം.