'പൊട്ടക്കിണറ്റിലെ തവള, അടിച്ച് പുറത്താക്കി വിട്ടതിന്റെ വിഷമം കാണും, ഒന്നര ലക്ഷം കൊടുത്തതല്ലേ', മാരാരുടെ മറുപടി

ബിഗ് ബോസ് മലയാളം സീസണ്‍ 7 താരം ശൈത്യ സന്തോഷിന് മറുപടിയുമായി അഖില്‍ മാരാര്‍ രംഗത്ത്. കഴിഞ്ഞ ദിവസം സോഷ്യല്‍ മീഡിയയില്‍ പോസ്റ്റ് ചെയ്ത വീഡിയോയില്‍ അഖില്‍ മാരാരെ ശൈത്യ പരിഹസിച്ചിരുന്നു. പിആര്‍ വിനുവിന്റെ സഹായത്തോടെയാണ് അഖില്‍ മാരാര്‍ ബിഗ് ബോസ് വിജയിച്ചതെന്നും മാരാര്‍ പേടിപ്പിച്ചാല്‍ മാക്രി കരയും പക്ഷേ ശൈത്യ കരയില്ല എന്നുമടക്കമായിരുന്നു പറഞ്ഞിരുന്നത്.

ഈ വീഡിയോ വൈറലായതോടെയാണ് മറുപടിയുമായി അഖില്‍ മാരാര്‍ രംഗത്ത് വന്നിരിക്കുന്നത്. ശൈത്യയെ പേരെടുത്ത് പറയാതെ പരിഹാസ രൂപത്തിലാണ് മാരാരുടെ മറുപടി. അഖില്‍ മാരാരുടെ വാക്കുകള്‍ ഇങ്ങനെ: '' രണ്ട് ദിവസമായി കുറച്ച് പേര്‍ ഒരു പെണ്‍കുട്ടി ഉണ്ടക്കണ്ണും തള്ളിപ്പിടിച്ച് മാരാരെപ്പറ്റി പറയുന്ന വീഡിയോ അയച്ച് തന്ന് പ്രതികരിക്കാന്‍ പറയുന്നു. നിങ്ങള്‍ക്ക് ആള്‍ മാറിയതാണെന്ന് തോന്നുന്നു. ആ കുട്ടി എന്തോ കണ്ട് പേടിച്ചതാണെന്ന് തോന്നുന്നു. പ്രിയപ്പെട്ട ആര്‍ക്കെങ്കിലും എന്തെങ്കിലുമൊക്കെ കിട്ടുന്നത് കണ്ട് സഹിക്കാന്‍ വയ്യാതെ പേടിച്ച സമയത്ത് ഉണ്ടായിട്ടുളളതാണെന്ന് തോന്നുന്നു. ചുറ്റുമുളളതൊന്നും കാണാനും കേള്‍ക്കാനും പറ്റാത്ത ഒരു പാവം പെണ്‍കുട്ടിയുടെ വീഡിയോ ആണ്.

മാരാര്‍ മാക്രികളെ പേടിപ്പിച്ചാല്‍ മതി എന്നൊക്കെയാണ് പറയുന്നത്. ഷഡ്കാല ഗോവിന്ദ മാരാര്‍ രാത്രി തംബുരു മീട്ടുമ്പോള്‍ മാക്രികള്‍ കരഞ്ഞു. അദ്ദേഹത്തിന് ദേഷ്യം വന്ന് കല്ലെടുത്ത് തവളകളെ എറിഞ്ഞു. ഇത് കണ്ടിട്ടാവാം ഷഡ്കാല ഗോവിന്ദ മാരാര്‍ മാക്രികളെ പേടിപ്പിച്ചാല്‍ മതിയെന്ന് ഇയാള്‍ പറഞ്ഞത്. അല്ലെങ്കില്‍ രാഷ്ട്രീയ വിരോധം ആകാനും സാധ്യതയുണ്ട്.

കാരണം തിരുവനന്തപുരത്തെ ബിജെപി ഓഫീസിന്റെ പേര് മാരാര്‍ജി ഭവന്‍ എന്നാണ്. അവരോടുളള വിരോധം കൊണ്ടാകാനും നേരിയ സാധ്യത കാണുന്നുണ്ട്. കേരളത്തിലെ 90 ശതമാനം വരുന്ന ഇടത്-മതേതര അനുകൂലികളുടെ പിന്തുണ നമുക്ക് ലഭിക്കും. ബിജെപിയുടെ സ്ഥാപക നേതാവായ മാരാര്‍ മാക്രികളെ പേടിപ്പിച്ചാല്‍ മതി, ഞങ്ങള്‍ കമ്മ്യൂണിസ്റ്റുകാരെ പേടിപ്പിക്കണ്ട എന്ന ഒരു ധ്വനിയും അതിധീരയായ ഈ പെണ്‍കുട്ടിയുടെ ശബ്ദത്തിലൂടെ ഉണ്ടായിട്ടുണ്ടോ എന്നാണ് വ്യാഖ്യാനിക്കുന്നത്.

ശരീരത്തിലുണ്ടാകുന്ന കുരു പഴുത്ത് പൊട്ടിപ്പോകുമ്പോള്‍ ഒരു ആശ്വാസം കിട്ടും. അത് പോലെ ഇങ്ങനെയൊരു വീഡിയോ ചെയ്യുമ്പോള്‍ അതിനൊരു ആശ്വാസം കിട്ടിക്കാണും. പൈസ ചെറിയ പൈസയൊന്നും അല്ലല്ലോ. ഒന്നര ലക്ഷം രൂപ കുരു പൊട്ടിക്കാനായി കൊടുത്തിട്ടുണ്ടായിരുന്നു. അപ്പോള്‍ അടിച്ച് പുറത്താക്കി വിട്ടതിന്റെ വിഷമം കാണും.

തവളകളുടെ ഒരു പ്രത്യേകതയാണ്, തവളകള്‍ക്ക് തവളകളേയും തിരിച്ചറിയാന്‍ പറ്റില്ല, അപ്പുറത്ത് നില്‍ക്കുന്ന ആള്‍ക്കാരെയും തിരിച്ചറിയാന്‍ പറ്റുന്നില്ല. ലോറി വരുമ്പോള്‍ ഓപ്പോസിറ്റ് തവള വയറൊക്കെ പെരുപ്പിച്ച് നില്‍ക്കുന്നത് കാണാം. ലോറിയെ നോക്കി പറയും, നീ ഒന്ന് പോയി നോക്ക് എന്ന്. കൂപമണ്ഡൂകം എന്നൊരു വാക്ക് ഉണ്ട്, പൊട്ടക്കിണറ്റിലെ തവള. കിണറിന് പുറത്തുളള ലോകം അതിന് അറിയില്ല. അത് മനസ്സിലാക്കാനുളള ബോധം ഇല്ലാത്ത മനുഷ്യരുണ്ട്. അവരുടെയൊക്കെ ജീവിതത്തില്‍ വിജയിക്കട്ടെ, ഇല്ലെങ്കില്‍ പൊട്ടിപ്പൊട്ടി കരഞ്ഞ് ജീവിതം വിജയിക്കുന്നത് വരെ ഓടിക്കൊണ്ടിരിക്കട്ടെ''.