കുങ്കുമപ്പൂവ് സീരിയലിന് അന്ന് കിട്ടിയ പ്രതിഫലം; ഫ്‌ളൈറ്റില്‍ വന്നിരുന്നത് സ്വന്തം ചെലവില്‍: ആശ ശരത്

മലയാളി പ്രേക്ഷകരുടെ ഇഷ്ട നടിയാണ് ആശ ശരത്. ചെറുപ്പം മുതല്‍ നൃത്തം അഭ്യസിച്ച ആശ മക്കള്‍ വലുതായ ശേഷമാണ് സിനിമ-സീരിയല്‍ അഭിനയത്തിലേക്ക് എത്തുന്നത്. സീരിയലുകളില്‍ അഭിനയ ജീവിതം തുടങ്ങി ഹിറ്റ് സിനിമകളില്‍ മുഖ്യ വേഷങ്ങളില്‍ അഭിനയിക്കാന്‍ ആശ ശരത്തിന് അവസരം ലഭിച്ചു. മമ്മൂട്ടി, മോഹന്‍ലാല്‍, ബിജു മേനോന്‍ ഉള്‍പ്പെടെ എല്ലാ പ്രമുഖ താരങ്ങള്‍ക്കൊപ്പം അഭിനയിക്കാന്‍ ആശയ്ക്ക് കഴിഞ്ഞിട്ടുണ്ട്. ആശ ഏറ്റവും ഒടുവില്‍ പ്രധാന വേഷത്തില്‍ അഭിനയിച്ച ആശകള്‍ ആയിരം എന്ന് ചിത്രത്തിന് മികച്ച പ്രതികരണമാണ് തിയേറ്ററില്‍ നിന്ന് ലഭിക്കുന്നത്

2011 മുതല്‍ 2014 വരെയുള്ള കാലഘട്ടത്തിലാണ് കുങ്കുമപ്പൂവ് ഏഷ്യാനെറ്റില്‍ സംപ്രേക്ഷണം ചെയ്തത്. അക്കാലത്ത് ഏറ്റവും ജനപ്രിയമായ സീരിയലുകളില്‍ ഒന്നായിരുന്നു കുങ്കുമപ്പൂവ്. ആശാ ശരത് അഭിനയിച്ച പ്രൊഫസര്‍ ജയന്തി എന്ന കഥാപാത്രം ഒന്ന് വലിയ തോതില്‍ പ്രേക്ഷക പ്രീതി നേടിയിരുന്നു. ഇപ്പോഴിതാ, ആദ്യമായി അഭിനയിച്ച കുങ്കുമപ്പൂവ് എന്ന സീരിയലിനു ലഭിച്ച പ്രതിഫലം വെളിപ്പെടുത്തിരിക്കുകയാണ് ആശ ശരത്.

'കുങ്കുമപ്പൂവില്‍ അഭിനയിക്കുമ്പോള്‍ അന്ന് ലഭിച്ചിരുന്ന പ്രതിഫലം ഒരു ദിവസം 4000, 4500 രൂപയാണ്. അവര്‍ക്ക് ദുബായില്‍ നിന്നും വന്നു പോകുന്ന ടിക്കറ്റ് നിരക്ക് താങ്ങാന്‍ കഴിയുമായിരുന്നില്ല. പണം നോക്കിയല്ല ആ സീരിയല്‍ ചെയ്തത്. ദുബായില്‍ നിന്ന് വന്നു പോകാന്‍ ബിസിനസ് ക്ലാസില്‍ വരാന്‍ എങ്ങനെ ആയാലും ഒരു ലക്ഷത്തോളം രൂപ ചെലവാകും. എട്ടു ദിവസത്തെ ഷെഡ്യൂളിനായിരിക്കും അവിടെ നിന്നു വരുന്നത്. അവര്‍ക്ക് ഇക്കണോമി ക്ലാസില്‍ വരാന്‍ പരമാവധി 10000 അല്ലെങ്കില്‍ 12000 രൂപയാണ് തരാന്‍ പറ്റുക. ഞാന്‍ അങ്ങനെയൊന്നും ആലോചിച്ചിട്ടില്ല. ഞാനെന്റെ സ്വന്തം ടിക്കറ്റ് എടുത്താണ് വന്നുകൊണ്ടിരുന്നത്. ഏകദേശം നാല് വര്‍ഷത്തോളം എല്ലാ മാസവും ഞാനെന്റെ ടിക്കറ്റ് എടുത്തുകൊണ്ടാണ് വന്നുകൊണ്ടിരുന്നത്.

എനിക്ക് കിട്ടിയിരുന്നത് നാലായിരത്തോളം രൂപയാണ്. കോസ്റ്റ്യൂം നമ്മള്‍ എടുക്കണം. ജൂവല്ലറി തന്നെ എടുക്കണം. കുങ്കുമപ്പൂ കഴിയാറായപ്പോള്‍ 5500 രൂപയായിരുന്നു പ്രതിഫലം. ആ സീരിയലിനോട് കമ്മിറ്റിഡ് ആയിരുന്നു. പണം ഉണ്ടാക്കുക എന്റെ ലക്ഷ്യമായിരുന്നില്ല. ജയന്തി എന്ന കഥാപാത്രം ഒരിക്കലും ഞാന്‍ പ്രതീക്ഷിക്കാത്ത ഉയരങ്ങളിലേക്ക് എന്നെ എത്തിച്ചു. വന്ന വഴികളൊന്നും മറക്കാറില്ല. എല്ലാം ഓര്‍മ്മയുണ്ട്' - ആശ ശരത് കൂട്ടിച്ചേര്‍ത്തു.