ചലച്ചിത്ര പുരസ്‌കാരദാന വേദിയില്‍ സ്ത്രീകളെ പിന്നിലിരുത്തി; അഹാനയുടെ വിമര്‍ശനത്തില്‍ പ്രതികരിച്ച് കനി കുസൃതി

കൊച്ചി: സംസ്ഥാന ചലച്ചിത്ര പുരസ്‌കാര സമര്‍പ്പണ വേദിയിലെ ഇരിപ്പിട ക്രമീകരണത്തെ വിമര്‍ശിച്ച് നടി അഹാന കൃഷ്ണ രംഗത്ത് വന്നത് സമൂഹ മാധ്യമങ്ങളില്‍ വലിയ ചര്‍ച്ചയായിരുന്നു. വേദിയില്‍ പുരസ്‌കാര ജേതാക്കളായ സ്ത്രീകളെ ഒഴിവാക്കി പുരുഷന്മാരെ മാത്രം മുന്നില്‍ ഇരുത്തിയതിന് എതിരെയായിരുന്നു അഹാനയുടെ വിമര്‍ശനം. പുരസ്‌കാര ചടങ്ങിലെ സീറ്റിംഗ് ക്രമീകരണം തനിക്ക് അസ്വസ്ഥത ഉണ്ടാക്കിയെന്നാണ് അഹാന ഇന്‍സ്റ്റഗ്രാമില്‍ പങ്കുവെച്ചത്. സ്ത്രീകളെ വേദിയിലെ ഒന്നാം നിരയില്‍ നിന്ന് ഒഴിവാക്കി പിന്നിലുള്ള നിരകളില്‍ ഇരുത്തിയത് ആകസ്മികമായി സംഭവിച്ചതാണോ എന്നും അഹാന ചോദിച്ചിരുന്നു.

അഹാനയുടെ ഇന്‍സ്റ്റഗ്രാം പോസ്റ്റ് സമൂഹ മാധ്യമങ്ങളില്‍ വലിയ ചര്‍ച്ചയ്ക്ക് തിരികൊളുത്തി. അഹാനയുടെ സ്റ്റോറി ചര്‍ച്ചയായതോടെ നിരവധി പേര്‍ തങ്ങളുടെ അഭിപ്രായങ്ങള്‍ പങ്കുവച്ചു. സര്‍ക്കാര്‍ നടത്തുന്ന സാംസ്‌കാരിക പരിപാടികളില്‍ എങ്കിലും ഇത്തരം ലിംഗപരമായ വേര്‍തിരിവുകള്‍ പ്രോത്സാഹിപ്പിക്കരുതെന്നാണ് അഭിപ്രായങ്ങള്‍ ഉയര്‍ന്നത്. സിനിമയില്‍ തുല്യതയെ കുറിച്ച് ചര്‍ച്ചകള്‍ നടക്കുമ്പോള്‍ തന്നെ ഔദ്യോഗിക വേദികളില്‍ പോലും സ്ത്രീകള്‍ തഴയപ്പെടുന്നത് ഒഴിവാക്കണം എന്നും പലരും അഭിപ്രായം പങ്കുവെച്ചു.

ഇപ്പോഴിതാ, ഈ വിഷയത്തില്‍ അന്ന് പരിപാടിയില്‍ പങ്കെടുത്ത നടി കനി കുസൃതി പ്രതികരിച്ചു. അഹാനയുടെ വിമര്‍ശനത്തെ കുറിച്ചുള്ള ഓണ്‍ലൈന്‍ മാധ്യമങ്ങളുടെ ചോദ്യത്തിന് മറുപടിയായിട്ടായിരുന്നു കനിയുടെ പ്രതികരണം. മികച്ച നടിക്കുള്ള അവാര്‍ഡ് ലഭിച്ചത് ഷംല ഹംസയ്ക്കാണ്. ഞാന്‍ അവിടെ പോയത് പായലിന് ലഭിച്ച അവാര്‍ഡ്, പായലിന് വരാന്‍ പറ്റാത്തത് കൊണ്ട് ഏറ്റുവാങ്ങാന്‍ പോയതാണ്. ഷംലയായിരുന്നു മികച്ച നടി.

ഷംല മുന്‍നിരയില്‍ തന്നെ ഇരിക്കുന്നുണ്ടായിരുന്നു. നിങ്ങള്‍ ചോദിച്ചത് ഫ്രണ്ടില്‍ ആണുങ്ങള്‍ മാത്രമാണോ ഇരുന്നത് എന്നാണ്. മികച്ച നടിക്കുള്ള പുരസ്‌കാരം ലഭിച്ച ഷംല അവിടെ ഇരിപ്പുണ്ടായിരുന്നു. അത്രയേ എനിക്ക് പറയാന്‍ അറിയൂ. വിവാദത്തെക്കുറിച്ച് തനിക്ക് അറിയില്ലെന്നും കനി കുസൃതി കൂട്ടിച്ചേര്‍ത്തു. തിരുവനന്തപുരം നിശാഗന്ധിയില്‍ കഴിഞ്ഞ ജനുവരി 25ന് നടന്ന ചടങ്ങില്‍ വച്ചാണ് ചലച്ചിത്ര അവാര്‍ഡുകള്‍ വിതരണം ചെയ്തത്.