തൃഷ ഒരു സിനിമയ്ക്ക് വാങ്ങുന്നത് 12 കോടി വരെ! കോടികളുടെ വീടുകളും ആഢംബര കാറുകളും, ആസ്തി ഇത്ര

സിനിമകളേക്കാളുപരി നടനും ടിവികെ നേതാവുമായ വിജയുമായുളള പ്രണയ ബന്ധത്തിന്റെ പേരിലാണ് നടി തൃഷ കൃഷ്ണൻ ഇപ്പോൾ വാർത്തകളിൽ നിറയുന്നത്. രണ്ടാം വരവിന് ശേഷം സിനിമകളിലും തൃഷയ്ക്ക് തിരക്കുകൾ ഏറെയാണ്. മുൻനിര താരങ്ങളുടെ വമ്പൻ പ്രൊജക്ടുകളാണ് തൃഷയെ തേടി വരുന്നത്.

അതിനിടെയാണ് വിജയുമായുളള പ്രണയത്തെ കുറിച്ചുളള ആരോപണങ്ങൾ വരുന്നത്. ദക്ഷിണേന്ത്യൻ സിനിമാ ലോകത്ത് രണ്ട് പതിറ്റാണ്ടിലേറെയായി സജീവമാണ് തൃഷ. ഇപ്പോഴും തെന്നിന്ത്യയിലെ മുൻനിര സൂപ്പർ നായികമാരിലൊരാൾ.

തൃഷയ്ക്ക് ഏകദേശം 85 കോടി രൂപയുടെ ആസ്തിയുള്ളതായി റിപ്പോർട്ടുകൾ പറയുന്നു. സിനിമകളിൽ നിന്നുള്ള വരുമാനം, പരസ്യങ്ങൾ, നിക്ഷേപങ്ങൾ എന്നിവയാണ് ഈ സമ്പാദ്യത്തിന് പിന്നിൽ.

1999ൽ 'ജോഡി'യിലൂടെ സിനിമാ രംഗത്തെത്തിയ തൃഷ, 2000കളുടെ തുടക്കത്തിൽ ജനപ്രിയ നായികയായി മാറി. 'വർഷം', 'ഗില്ലി', 'സാമി', 'ആടവാരി മാറ്റലകു അർദാലു വെരുലെ' തുടങ്ങിയ ചിത്രങ്ങൾ തമിഴിലും തെലുങ്കിലും തൃഷയെ പ്രിയ നായികയാക്കി. 'വിണ്ണൈത്താണ്ടി വരുവായാ', 'പൊന്നിയിൻ സെൽവൻ' പോലുള്ള ചിത്രങ്ങളിലൂടെ തൃഷ തെന്നിന്ത്യൻ സിനിമയിലെ താരറാണിപ്പട്ടം ഉറപ്പിച്ചു.

തൃഷയുടെ വരുമാനത്തിൽ സിനിമാ പ്രതിഫലത്തിനാണ് പ്രധാന പങ്ക്. 'ലിയോ'യ്ക്കായി 5 കോടി രൂപ ഈടാക്കിയ തൃഷയുടെ താരമൂല്യം 'പൊന്നിയിൻ സെൽവൻ' വിജയശേഷം ഗണ്യമായി വർധിച്ചു. നിലവിൽ ഒരു സിനിമയ്ക്ക് ഏകദേശം 10-12 കോടി രൂപയാണ് പ്രതിഫലമെന്ന് ഇൻഡസ്ട്രി കണക്കുകൾ സൂചിപ്പിക്കുന്നു.

സിനിമകൾ കൂടാതെ, പരസ്യങ്ങളും തൃഷയുടെ വരുമാനത്തിൽ കാര്യമായ സംഭാവന നൽകുന്നു. വിവിധ ബ്രാൻഡ് ഡീലുകളിലൂടെ പ്രതിവർഷം ഏകദേശം 9 കോടി രൂപ നേടുന്നതായി റിപ്പോർട്ടുകളുണ്ട്. നിരവധി പരസ്യങ്ങളെക്കാൾ, തിരഞ്ഞെടുക്കുന്ന ഉയർന്ന മൂല്യമുള്ള ബ്രാൻഡുകളുമായി സഹകരിക്കുന്നതാണ് തൃഷയുടെ തന്ത്രം. തൃഷയുടെ ആസ്തിയുടെ ഒരു പ്രധാന ഭാഗം റിയൽ എസ്റ്റേറ്റ് നിക്ഷേപങ്ങളാണ്. ചെന്നൈയിൽ 10-12 കോടി രൂപ വിലമതിക്കുന്ന ഒരു ആഡംബര വസതി അവർക്കുണ്ട്. കൂടാതെ ഹൈദരാബാദിൽ 6-7 കോടി രൂപ വിലവരുന്ന മറ്റൊരു വസ്തുവുമുണ്ട്.

തൃഷ പൊതുസ്ഥലങ്ങളിൽ ലളിതമായ ജീവിതശൈലിയാണ് പിന്തുടരുന്നത്. എന്നാൽ വാഹന ശേഖരം പ്രീമിയം ആണ്. മെഴ്‌സിഡസ് ബെൻസ് എസ്-ക്ലാസ്, ബിഎംഡബ്ല്യു 5-സീരീസ്, റേഞ്ച് റോവർ ഇവോക്ക്, മെഴ്‌സിഡസ് ബെൻസ് ഇ-ക്ലാസ് എന്നിവ തൃഷയുടെ ശേഖരത്തിലുണ്ട്. ഈ വാഹനങ്ങൾക്ക് ഏകദേശം 3-4 കോടി രൂപ വിലവരുമെന്നാണ് കണക്കാക്കുന്നത്.