വില 30 ലക്ഷം; രശ്മിക മന്ദാനയും വിജയ്‌യുടെയും മാച്ചിങ് വിവാഹമോതിരത്തിന്റെ പ്രത്യേകത അറിയണ്ടേ?

തെന്നിന്ത്യന്‍ സൂപ്പര്‍ ജോഡികളായ രശ്മിക മന്ദാനയും വിജയ് ദേവരകൊണ്ടയും തമ്മിലുള്ള വിവാഹവും അതിനു ശേഷമുള്ള വിശേഷങ്ങളുമാണ് ദേശീയ വാര്‍ത്തകളില്‍ നിറഞ്ഞു നില്‍ക്കുന്നത്. ഫെബ്രുവരി 26-ന് ഉദയ്പൂരിലാണ് രാജകീയമായ ശൈലിയിലുള്ള വിവാഹം നടന്നത്. ഇവരുടെ വിവാഹ ചിത്രങ്ങളും വസ്ത്രങ്ങളും ആഭരണങ്ങളും സോഷ്യല്‍ മീഡിയയില്‍ വലിയ ചര്‍ച്ചയായിരുന്നു. രാജാവിനെയും രാജ്ഞിെയയും അനുസ്മരിപ്പിക്കുന്ന രീതിയിലുള്ള വേഷവിധാനങ്ങളാണ് ഇരുവരും ധരിച്ചിരുന്നത്. നവദമ്പതികള്‍ സോഷ്യല്‍ മീഡിയയില്‍ പങ്കുവെച്ച ചിത്രങ്ങള്‍ നിമിഷങ്ങള്‍ക്കകമാണ് ലക്ഷക്കണക്കിന് പ്രേക്ഷകരിലേക്ക് എത്തിയത്.

വിവാഹ ചിത്രങ്ങളില്‍ രശ്മികയും വിജയ്‌യും നിരവധി ആഭരണങ്ങള്‍ ധരിച്ചിരുന്നതായി കാണാം. എന്നാലിപ്പോള്‍ ആരാധകരുടെ ശ്രദ്ധ മുഴുവന്‍ പോയത് ഇരുവരും വിരലുകളില്‍ അണിഞ്ഞിരിക്കുന്ന മാച്ചിങ്ങായിട്ടുള്ള മനോഹരമായ വിവാഹ മോതിരങ്ങളിലാണ്. പ്രമുഖ ജ്വല്ലറി വിദഗ്ധരുടെ അഭിപ്രായത്തില്‍ ലോകപ്രശസ്ത ബ്രാന്‍ഡായ ടിഫാനി ആന്‍ഡ് കോയുടെ കളക്ഷനില്‍ നിന്നുള്ള മോതിരങ്ങളാണ് ഇരുവരും തിരഞ്ഞെടുത്തത്.

ടിഫാനിയുടെ 'സിക്സ്റ്റീന്‍ സ്റ്റോണ്‍' (16 ടീേില) എന്ന ആഡംബര ശേഖരത്തിലുള്ളതാണ് ഈ മോതിരങ്ങള്‍. വജ്രങ്ങള്‍ പതിപ്പിച്ച പ്ലാറ്റിനം ബാന്‍ഡും മഞ്ഞ സ്വര്‍ണ്ണവും ചേര്‍ന്നതാണ് ഇതിന്റെ നിര്‍മ്മാണം. ഇതിഹാസ ഡിസൈനര്‍ ജീന്‍ ഷ്‌ളംബര്‍ഗര്‍ 1959-ല്‍ രൂപകല്‍പ്പന ചെയ്ത ഈ മോതിരം സ്‌നേഹത്തിന്റെ പ്രതീകമായിട്ടാണ് കണക്കാക്കപ്പെടുന്നത്. തുണിത്തരങ്ങളിലെ ക്രോസ്-സ്റ്റിച്ച് മാതൃകയില്‍ നിന്നാണ് ഇതിന്റെ ഡിസൈന്റെ പ്രചോദനം ഉള്‍ക്കൊണ്ടിരിക്കുന്നത്. റിപ്പോര്‍ട്ടുകള്‍ പ്രകാരം ഈ രണ്ട് മോതിരങ്ങള്‍ക്കുമായി ഏകദേശം 30 ലക്ഷം രൂപയോളം വില വരും. ഇതില്‍ പ്ലാറ്റിനം-യെല്ലോ ഗോള്‍ഡ് പതിപ്പിന് മാത്രം ഏകദേശം 15.6 ലക്ഷം രൂപയാണ് വില കണക്കാക്കുന്നത്. ഇതിന്റെ തീരെ കനം കുറഞ്ഞ മോഡലിന് തന്നെ 10 ലക്ഷത്തിലേറെ രൂപ വില വരും.

സാധാരണയായി ഇന്ത്യന്‍ വരന്മാര്‍ സാധാരണ സ്വര്‍ണ മോതിരങ്ങള്‍ തിരഞ്ഞെടുക്കുമ്പോള്‍, ഇവിടെ വിജയ് ദേവരകൊണ്ട വജ്രങ്ങള്‍ പതിച്ച മോതിരമാണ് തിരഞ്ഞെടുത്തത്. ഇരുവരും ഒരേ പോലെയുള്ള മോതിരങ്ങള്‍ അണിഞ്ഞത് തങ്ങളുടെ പരസ്പരമുള്ള സ്‌നേഹവും ആധുനികമായ കാഴ്ചപ്പാടും വ്യക്തമാക്കുന്നുവെന്ന് വിദഗ്ധര്‍ പറയുന്നു. വിവാഹത്തിനായുള്ള ടെംപിള്‍ ജ്വല്ലറി ആഭരണങ്ങള്‍ ഒരുക്കാന്‍ 'ശ്രീ ജ്വല്ലേഴ്‌സ്' ഏകദേശം 10 മാസത്തോളം സമയമെടുത്തതായും റിപ്പോര്‍ട്ടുകളുണ്ട്. പാരമ്പര്യവും ആധുനികതയും ഒത്തുചേര്‍ന്ന ഈ വിവാഹം സിനിമാ ലോകത്തെ ഏറ്റവും ആഘോഷിക്കപ്പെട്ട ഒന്നായി മാറിയിരിക്കുകയാണ്.