വിവാഹചിത്രങ്ങള്‍ പുറത്തുവിട്ട് വിറോഷ് ദമ്പതികള്‍; ഹൃദയം തൊടുന്ന കുറിപ്പുമായി വിജയും രശ്മികയും

സിനിമാ ലോകവും ആരാധകരും ഒരുപോലെ കാത്തിരുന്ന ആ മംഗള കര്‍മത്തിന് ഒടുവില്‍ ശുഭപര്യവസാനം. ഇന്ത്യന്‍ സിനിമാ ലോകം ആകാംക്ഷയോടെ ഉറ്റുനോക്കിയിരുന്ന താരജോഡികളായ വിജയ് ദേവരകൊണ്ടയും രശ്മിക മന്ദാനയും വിവാഹിതരായി. രാജസ്ഥാനിലെ ഉദയ്പൂരില്‍ ആഡംബര ഹോട്ടലിലായിരുന്നു വിവാഹച്ചടങ്ങുകള്‍. മാധ്യമങ്ങള്‍ക്കു പ്രവേശനമില്ലാതിരുന്ന ചടങ്ങില്‍ ഉറ്റ ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്. ഇന്നു രാവിലെ മുതല്‍ നടക്കുന്ന വിവാഹച്ചടങ്ങിന്റെ ചിത്രങ്ങളൊന്നും പുറത്തുവന്നിരുന്നില്ല.

ഇപ്പോഴിതാ, ചടങ്ങിന്റെ ചിത്രങ്ങള്‍ പങ്കുവെച്ചുകൊണ്ട് നവദമ്പതികള്‍ കുറിച്ച വാക്കുകളാണ് ഇപ്പോള്‍ സോഷ്യല്‍ മീഡിയയില്‍ തരംഗമാകുന്നത്. 'എന്റെ ഭര്‍ത്താവിനെ നിങ്ങള്‍ക്ക് പരിചയപ്പെടുത്തുന്നു, മിസ്റ്റര്‍ വിജയ് ദേവരകൊണ്ട' എന്നായിരുന്നു രശ്മിക തന്റെ ഇന്‍സ്റ്റാഗ്രാമില്‍ കുറിച്ചത്. തന്റെ ഉറ്റ സുഹൃത്തിനെ ജീവിതപങ്കാളിയാക്കിയതിന്റെ സന്തോഷം വിജയ് പങ്കുവെച്ചപ്പോള്‍ അത് ആരാധകരുടെ ഹൃദയം കവര്‍ന്നു. തന്റെ ദിവസം പൂര്‍ണ്ണമാകാന്‍ രശ്മികയുടെ സാന്നിധ്യം അനിവാര്യമാണെന്നാണ് വിജയ് വികാരാധീനനായി കുറിച്ചത്.

വിജയ്യുടെ തെലുങ്ക് പാരമ്പര്യവും രശ്മികയുടെ കൂര്‍ഗ് പൈതൃകവും ഒത്തുചേര്‍ന്ന മനോഹരമായ ചടങ്ങുകളിലാണ് ഇരുവരും വിവാഹിതരായത്. സാധാരണ ഹിന്ദു വിവാഹങ്ങളില്‍ നിന്ന് വ്യത്യസ്തമായി, പൂര്‍വ്വികര്‍ക്കും കുടുംബാംഗങ്ങളുടെ അനുഗ്രഹത്തിനും പ്രാധാന്യം നല്‍കുന്ന കൊടവ ആചാരങ്ങള്‍ വിവാഹത്തിന് മാറ്റുകൂട്ടി. സൈനിക പാരമ്പര്യത്തിന് പേരുകേട്ട കൊടവ സമൂഹത്തിന്റെ വേറിട്ട സംസ്‌കാരം വിവാഹചടങ്ങുകളില്‍ പ്രതിഫലിച്ചു.

'ഗീത ഗോവിന്ദം', 'ഡിയര്‍ കോമ്രേഡ്' എന്നീ ചിത്രങ്ങളിലൂടെ വെള്ളിത്തിരയില്‍ പ്രണയിച്ച ഇരുവരും ജീവിതത്തിലും ഒന്നിച്ചതിന്റെ ആവേശത്തിലാണ് ആരാധകര്‍. വര്‍ഷങ്ങള്‍ നീണ്ട അഭ്യൂഹങ്ങള്‍ക്കും കാത്തിരിപ്പിനും ഇതോടെ മനോഹരമായ ഒരു ശുഭപര്യവസാനം ലഭിച്ചിരിക്കുകയാണ്.