ബഷീര് പുരസ്ക്കാരം വികെഎന്
കോഴിക്കോട് : ഈ വര്ഷത്തെ ബഷീര് പുരസ്ക്കാരം വി. കെ. എന്.
35,000 രൂപയും ആര്ട്ടിസ്റ് നമ്പൂതിരി രൂപകല്പന ചെയ്ത ശില്പവുമാണ് അവാര്ഡ്. കഥയുടെ സുല്ത്താനായ വൈക്കം മുഹമ്മദ് ബഷീറിന്റെ പേരില് ദോഹയിലെ പ്രവാസി മലയാളികള് ഏര്പ്പെടുത്തിയതാണ് ബഷീര് പുരസ്ക്കാരം.
മലയാള സാഹിത്യത്തിന് നല്കിയ സംഭാവനകള് പരിഗണിച്ചാണ് പുരസ്ക്കാരം വി. കെ. എന്നിന് സമ്മാനിക്കുന്നതെന്ന് അവാര്ഡ് വിവരം പ്രഖ്യാപിച്ച ബഷീറിന്റെ ഭാര്യ ഫാബി ബഷീര് അറിയിച്ചു.
എം. ടി. വാസുദേവന് നായര്, പ്രൊഫ. എം. എന്. വിജയന്, കെ. കെ. സുധാകരന് തുടങ്ങി ഏഴുപേരടങ്ങിയ കമ്മിറ്റിയാണ് അവാര്ഡ് ജേതാവിനെ തിരഞ്ഞെടുത്തത്. ആഗസ്റ് രണ്ടാം വാരം കൊച്ചിയില് നടക്കുന്ന ചടങ്ങില് വച്ച് അവാര്ഡ് സമ്മാനിക്കും.
ഏട്ടാമത്തെ ബഷീര് പുരസ്ക്കാരമാണ് വി. കെ. എന്നിന് സമ്മാനിക്കുന്നത്. ഇ. എം. എസ്., ബാലന് കെ. നായര്, കോവിലന്, ആര്ട്ടിസ്റ് നമ്പൂതിരി എന്നിവര് ഈ അവാര്ഡിന് അര്ഹരായിട്ടുണ്ട്.
നിശിതവും ലക്ഷ്യവേധിയുമായ പരിഹാസമാണ് മലയാളിയ്ക്ക് വടക്കേ കൂട്ടാലെ നാരായണന് നായര് എന്ന വി. കെ. എന്. ദില്ലിയില് ഏറെക്കാലം പത്രപ്രവര്ത്തകായി ജോലി നോക്കിയ അദ്ദേഹം 25 ഓളം സാഹിത്യകൃതികള് രചിച്ചിട്ടുണ്ട്. കേന്ദ്ര സാഹിത്യ അക്കാദമി, കേരള സാഹിത്യ അക്കാദമി, എം. പി. പോള് പുരസ്ക്കാരം, കേന്ദ്ര മാനവ ശേഷി വകുപ്പിന്റെ ഫെലോഷിപ്പ്, ഹാര്മണി അവാര്ഡ് എന്നിങ്ങനെ ഒട്ടേറെ പുരസ്ക്കാരങ്ങള് അദ്ദേഹത്തിന് ലഭിച്ചിട്ടുണ്ട്.