യുഎസിലെ എഡിറ്റര് ടൂണ്സിലേക്ക്
തിരുവനന്തപുരം: ലോസ് ഏഞ്ചല്സ് കേന്ദ്രമായി പ്രവര്ത്തിക്കുന്ന എഡിറ്ററും നിര്മ്മാതാവുമായ അതുല് റാവു തിരുവനന്തപുരത്തെ ടൂണ്സ് കേന്ദ്രത്തിലേക്ക്. ടൂണ്സ് അടുത്തുതന്നെ നിര്മ്മിക്കാന് പോകുന്ന ഹനുമാന്റെ വീരകൃത്യങ്ങള് എന്ന അനിമേഷന് ചിത്രത്തില് പ്രവര്ത്തിക്കാനാണ് അതുല് റാവു എത്തുന്നത്. ഈ ചിത്രത്തിന്റെ കഥയുടെ ചുമതലയും സഹ-ആര്ട്ട് ഡയറക്ടറും അതുല് റാവുവായിരിക്കും.
ഫോക്സ് കിഡ്സ്, ഫോക്സ് ഫാമിലി വേള്ഡ് വൈഡ്, നിക്കെലോഡിയോണ്, ഫിലിം റോമന്, വാര്ണര് ബ്രദേഴ്സ്, ഡിസ്നി ചാനല് എന്നീ അമേരിക്കന് കേന്ദ്രമായി പ്രവര്ത്തിക്കുന്ന അന്താരാഷ്ട്ര അനിമേഷന് സ്റുഡിയോകളില് പ്രവര്ത്തിച്ചിട്ടുള്ള കലാകാരനാണ് അതുല് റാവു. സ്വരൂപ് എന്ന ഇന്ത്യന്-അമേരിക്കന് കാര്ട്ടൂണര് ഹ്രസ്വചിത്രത്തിലൂടെ ഈ രംഗത്ത് പുതിയ മേഖലകള് വെട്ടിത്തുറന്ന ആളാണ് അതുല് റാവു.
ടൂണ്സ് സംഘത്തില് അതുല് റാവുവിനെ കിട്ടിയതില് അതിയായി സന്തോഷിക്കുന്നു. അതുല് വളരെ പ്രതിഭാശാലിയായ കലാകാരനാണ്. ഇന്ത്യന് ഐതിഹ്യങ്ങളിലുള്ള അതുല് റാവുവിന്റെ അറിവ് അപാരമാണ്.- ടൂണ്സ് സിഇഒ ബില് ഡെന്നീസ് പറഞ്ഞു.
ടൂണ്സിനൊപ്പം പ്രവര്ത്തിക്കാന് ഞാന് എന്നും ആഗ്രഹിച്ചിരുന്നു. ഹനുമാന് എന്ന കഥാപാത്രം ലോകത്തിലെ മുഴുവന് കുട്ടികളെയും കയ്യിലെടുക്കുമെന്ന് ഞാന് കരുതുന്നു. - അതുല് റാവു പറയുന്നു.
തിരുവനന്തപുരത്ത് ടെക്നോപാര്ക്കില് പ്രവര്ത്തിക്കുന്ന ടൂണ്സ് അനിമേഷന് സ്റുഡിയോ 2ഡി, 3ഡി അനിമേഷന് ചിത്രങ്ങള് നിര്മ്മിക്കുന്നതിലാണ് ശ്രദ്ധകേന്ദ്രീകരിച്ചിരിക്കുന്നത്. ടൂണ്സിന്റെ രണ്ടാമത്തെ ശാഖ മുംബൈയില് കഴിഞ്ഞ വര്ഷമാണ് പ്രവര്ത്തനം തുടങ്ങിയത്.