അരകളേ നിങ്ങൾ ഞങ്ങൾക്ക് ഇരകളല്ല... മഞ്ഞയിട്ട് ഇറങ്ങല്ലേ, മങ്ങിപ്പോകും.. ഫ്ലക്സ് ഫാൻഫൈറ്റ് ചിത്രങ്ങൾ!!
ലോകകപ്പിൽ ഇന്ത്യൻ ടീമില്ലെങ്കിലും കേരളത്തില് ഫുട്ബോള് ആവേശത്തിന് ഒരു കുറവുമില്ല. ഏറ്റവും കൂടുതല് ഫുട്ബോള് ആരാധകരുള്ള ടീം ഏതെന്ന് ചോദിച്ചാൽ ബ്രസീലും അര്ജന്റീനയും എന്ന് ഉത്തരം. സോഷ്യൽ മീഡിയയിലും പുറത്തും തിരതല്ലുകയാണ് ആവേശവും ഫാന് ഫൈറ്റും. ഇരുടീമുകളുടെയും ആരാധകരാകട്ടെ പലപ്പോഴും തമ്മിൽത്തല്ലും എന്ന അവസ്ഥയിലും. കളമശ്ശേരിയില് ബ്രസീല്-അര്ജന്റീന ആരാധകര് തല്ല് കൂടി ഒരു വിവാഹം മുടങ്ങുന്നത് വരെയെത്തി കാര്യങ്ങൾ.
കേരളത്തിലെ റോഡുകൾ മുഴുവനും ഫുട്ബോൾ ആരാധകർ കയ്യടക്കിക്കഴിഞ്ഞു. ഇരുവശവും ഇരു ടീമികളുടേയും ആരാധകർ ഫ്ലക്സ് ബോർഡുകൾ കൊണ്ട് നിറച്ചിരിക്കുകയാണ്. വയലാറും കുമാരനാശാനും പോലും തോറ്റുപോകുന്ന കവിതകളാണ് ഫ്ലക്സുകളിൽ. ചിലർ ആവേശം കൂട്ടാനായി സന്തോഷ് പണ്ഡിറ്റിനെ വരെ കൂട്ടുപിടിച്ചിരിക്കുന്നു. ബ്രസീൽ - അര്ജന്റീന ആരാധകർ സ്ഥാപിച്ച ഫ്ലക്സുകളിൽ ചിലത് സോഷ്യൽ മീഡിയയിൽ പങ്കുവെക്കുകയാണ് മാധ്യപ്രവർത്തകയായ ഷാഹിന നഫീസ. അവയിൽ ചിലത്....
ഇനിയും കാത്തിരിക്കും
20 അല്ല 200 വർഷം കപ്പടിക്കാതിരുന്നാലും ഇട്ടിട്ട് പോകാൻ മനസ് സമ്മതിക്കുന്നില്ല. കാരണം ഞങ്ങൾ കപ്പ് കണ്ട് കൂടെ കൂടിയതല്ല.
ചങ്കല്ല ചങ്കിടിപ്പാണ്
ചങ്കല്ല ചങ്കിടിപ്പാണ് ബ്രസീൽ. ഭൂതവും ഭാവിയും പാടുന്ന ഹിറ്റ്ലറുടെ മക്കളും നടക്കാത്ത സ്വപ്നം കാണുന്ന മെസ്സിക്കുഞ്ഞുങ്ങളും അറിയാൻ...
എല്ലാവരും കൂടിയാണ്
രാജാവിനെ തിരിച്ചുവിളിച്ചത് അവന്റെ രാജ്യക്കാരും പടയാളികളും മാത്രമായിരുന്നില്ല, ഈ ലോകം ഒന്നടങ്കമായിരുന്നു
കാനറികളെ തള്ളിക്കളയരുതേ
കാലിടറിയിട്ടുണ്ട്. കരങ്ങൾ തളർന്നിട്ടുണ്ട്. കരളുകൾ നനഞ്ഞിട്ടുണ്ട്. പക്ഷേ തിരിച്ചുവന്ന ചരിത്രമാണ് കാനറികൾക്കുള്ളത്
അർജുനനും കർണനും
എതിരാളികളോട് ഒരു വാക്ക്. യുദ്ധം ജയിച്ച അർജുനനെക്കാൾ പെരുമയുണ്ട് പരാജിതനായ കർണന്...
പകരം വെക്കാനില്ല
ഇത് പകരം വെക്കാനില്ലാത്ത പോരാളികളാണ്. ഇത്തണവയും മഞ്ഞപ്പട റഷ്യയിൽ ചരിത്രമെഴുതും.
വെല്ലുവിളികളാകാം
വെല്ലുവിളികളാകാം പക്ഷേ അത് നിങ്ങളെക്കാളും നാലഞ്ചോണം കൂടുതൽ ഉണ്ടവരോട് ആകരുത്.
ഞാനാണ് മെസ്സി
ലയണൽ മെസ്സിയെ വാഴ്ത്തി ഉയർത്തിയ ഫ്ലക്സ് ബോർഡുകളിലൊന്ന്.
ഇത് ബ്രസീലിന് വേണ്ടി
ബ്രസീലിന് വേണ്ടി കെട്ടിയ ആയിരക്കണക്കിന് പോസ്റ്ററുകളിൽ ഒന്ന്...