മൃദംഗത്തില്‍ ലോകറിക്കാര്‍ഡ്

പാലക്കാട്: കുഴല്‍മന്ദത്തെ രാമകൃഷ്ണന്‍ അങ്ങിനെ മൃദംഗത്തിലൂടെ ലോകറിക്കാര്‍ഡിലേക്ക് നടന്നുകയറുന്നു. തുടര്‍ച്ചയായി 38 മണിക്കൂര്‍ നേരം മൃദംഗം വായിച്ചുകൊണ്ടാണ് രാമകൃഷ്ണന്‍ ഗിന്നസ് ബുക്കില്‍ ഇടം പിടിയ്ക്കുന്നത്.

മൃദംഗവിദ്വാനെന്ന നിലയില്‍ ഇതിനകം കേരളത്തിലെ കച്ചേരിവേദികളില്‍ പ്രസിദ്ധനായ വിദ്വാനാണ് കുഴല്‍മന്ദം രാമകൃഷ്ണന്‍. ചെറുപ്പത്തിലേ മൃദംഗം അഭ്യസിച്ചുതുടങ്ങിയ രാമകൃഷ്ണന് മൃദംഗം മാത്രമാണ് ജീവിതം. എത്ര വായിച്ചാലും തളരാത്ത, മറിച്ച് വര്‍ധിതവീര്യമാര്‍ജ്ജിക്കുന്നതാണ് രാമകൃഷ്ണന്റെ വിരലുകള്‍. കര്‍ണ്ണാടകസംഗീതലോകത്ത് രാമകൃഷ്ണന്റെ ഈ മിടുക്ക് പ്രസിദ്ധമാണ്.

ഇപ്പോള്‍ രാമകൃഷ്ണന്‍ ആ വിരലുകള്‍ക്കൊണ്ട് കര്‍ണ്ണാടകസംഗീതപ്രേമികളുടെ പരിമിതമായ വൃത്തത്തിനപ്പുറത്തേയ്ക്കും യാത്ര ചെയ്തിരിക്കുന്നു. ജൂലൈ 24 ശനിയാഴ്ച രാവിലെ ഒമ്പതരയ്ക്ക് ആരംഭിച്ച യജ്ഞം ജൂലൈ 26 തിങ്കളാഴ്ച പുലര്‍ച്ചെ അഞ്ചിനാണ് അവസാനിച്ചത്. ആകെ 38 മണിക്കൂര്‍ നേരം. താളം പിഴയ്ക്കാതെ, താളം അയയാതെ.

രാത്രി ഒമ്പതരയ്ക്ക് ചേര്‍ന്ന സമാപന സമ്മേളനത്തില്‍ സ്വരലയ പ്രസിഡന്റ് എന്‍.എന്‍. കൃഷ്ണദാസ് എംപി അധ്യക്ഷനായിരുന്നു. ജില്ലാ കളക്ടര്‍ സഞ്ജീവ് കൗശിക് മുഖ്യാതിഥിയായി. സംഗീതജ്ഞന്‍ വി. ദക്ഷിണാമൂര്‍ത്തിയുടെ അനുഗ്രഹാശിസുകളോടെയാണ് രാമകൃഷ്ണന്‍ തന്റെ മൃദംഗയജ്ഞം തുടങ്ങിയത്.