അമല പോള്‍ വിവാഹിതയായി: ജീവിതകാലം മുഴുവന്‍ ഒരുമിച്ച് കൈകോർത്ത് നടക്കുമെന്ന് ജഗദ് ദേശായി

Updated: Sunday, November 5, 2023, 19:52 [IST]

കൊച്ചി: മലയാളികളുടെ പ്രിയ താരം അമലപോള്‍ വിവാഹിതയായി. സുഹൃത്തായ ജഗദ് ദേശായി ആണ് വരന്‍. പ്രമുഖ ലക്ഷ്വറി വില്ലയുടെ മാനേജർ കൂടിയായ ജഗദ് ഗുജറാത്ത് സ്വദേശിയാണ്. കൊച്ചിയില്‍ നടന്ന വിവാഹ ചടങ്ങിന്റെ ചിത്രങ്ങള്‍ ജഗദ് തന്റെ ഇന്‍സ്റ്റഗ്രാം പേജിലൂടെ പങ്കുവെച്ചിട്ടുണ്ട്. .'ശേഷിക്കുന്ന ജീവിതത്തിലേക്ക് എന്റെ അപ്സരസിന്റെ കൈപിടിച്ച് മുന്നോട്ട്', എന്നാണ് വിവാഹ ചിത്രം പങ്കുവെച്ചുകൊണ്ട് ജഗദ് ഇന്‍സ്റ്റഗ്രാമില്‍ കുറിച്ചിരിക്കുന്നത്.

വിവാഹ ചിത്രത്തിന് താഴെ നിരവധി പേരാണ് ആശംസകളുമായി മുന്നോട്ട് വന്നിരിക്കുന്നത്. ലാവണ്ടർ നിറത്തിലുള്ള ലഹങ്കയും അതിന് ചേരുന്ന ചോക്കറും മോതിരവും കമ്മലുമാണ് വിവാഹ ചിത്രത്തില്‍ അമല ധരിച്ചിരുന്നത്. ലാവണ്ടറും ക്രീമും കലർന്ന ഷേർവാണിയായിരുന്നു വരന്‍ ജഗത് ദേശായിയുടെ വേഷം.

കൊച്ചിയിലെ പ്രമുഖ ഹോട്ടലായ ഗ്രാന്റ് ഹയാത്ത് ബോൾഗാട്ടിയിലാണ് ചടങ്ങുകൾ നടന്നത്. മാരീഡ് എന്ന ഹാഷ്ടാഗിലാണ് ജഗത് ദേശായി ചിത്രങ്ങൾ പങ്കുവെച്ചത്. വളരെ ലളിതമായ ചടങ്ങുകളായിരുന്നു വിവാഹത്തിന് ഉണ്ടായിരുന്നതെന്നാണ് ചിത്രങ്ങളില്‍ നിന്നും വ്യക്തമാകുന്നത്. ഇരുവരുടെയും അടുത്ത ബന്ധുക്കളും സുഹൃത്തുക്കളും മാത്രമാണ് ചടങ്ങിൽ പങ്കെടുത്തത്.

അമലയുടെ കേരളത്തിലെ ബന്ധുക്കൾക്കും സുഹൃത്തുക്കൾക്കുമായി ഒരു എൻഗേജ്മെന്റ് എന്ന രീതിയിലാണ് കൊച്ചിയിൽ ചടങ്ങുകൾ നടന്നതെന്നും ജഗതിന്റെ കുടുംബാംഗങ്ങളുടെ ആചാരപ്രകാരമുള്ള വിവാഹ ചടങ്ങുകൾ വൈകാതെ ജഗതിന്റെ ജന്മനാട്ടിൽ നടക്കുമെന്നും റിപ്പോർട്ടുകളുണ്ട്.

കുറച്ച് ദിവസങ്ങൾക്ക് മുമ്പായിരുന്നു സോഷ്യൽമീ‍ഡിയ വഴി അമലയും ജഗതും പ്രണയം പരസ്യപ്പെടുത്തിയത്. പിറന്നാൾ ദിനത്തിൽ നടി അമല പോളിനെ കാമുകൻ പ്രൊപ്പോസ് ചെയ്യുന്ന വീഡിയോ സോഷ്യൽ മീഡിയയിൽ വൈറലായി മാറുകയും ചെയ്തു. 'മൈ ജിപ്സി ക്വീൻ യെസ് പറഞ്ഞു' എന്ന വരികളോടെ അമലയെ ടാഗ് ചെയ്ത് കൊണ്ടാണ് ജഗദ് തന്നെയായിരുന്നു വീഡിയോ പങ്കിട്ടത്.

നോർത്ത് ഗോവയിലെ ആഡംബര ഹോം സ്റ്റേയുടെ ഹെഡ് ഓഫ് സെയിൽസിലാണ് ജഗദ് ജോലി ചെയ്യുന്നത്. ഇവിടെ യാത്രയ്ക്ക് എത്തിയപ്പോഴാണ് അമലയും ജഗദും പരിചയപ്പെടുന്നത്. നിലവിൽ ഗോവയിൽ തന്നെയാണ് ജഗദ് കഴിയുന്നത്. നടിയുടെ രണ്ടാം വിവാഹമാണ് ഇത്. സംവിധായകന്‍ എഎല്‍ വിജയ് ആയിരുന്നു അമല ആദ്യം വിവാഹം കഴിച്ചിരുന്നത്. 4 വര്‍ഷം പ്രണയിച്ച ശേഷം 2014ൽ ഇരുവരും വിവാഹിതരായെങ്കിലും ഈ ബന്ധം അധികനാൾ നീണ്ടില്ല. 2017 ൽ ഇരുവരും വിവാഹമോചനം നേടുകയായിരുന്നു.