നന്ദനയ്ക്ക് വീട് നിർമ്മിച്ച് നല്‍കുമോ? സായിയുടേയും തന്റേയും ആഗ്രഹം വെളിപ്പെടുത്തി സിജോ

ബിഗ് ബോസിലുണ്ടാകുന്ന സൗഹൃദങ്ങളില്‍ പലതും അവിടെ തന്നെ അവസാനിക്കുന്നതാണ് നമുക്ക് കാണാന്‍ കഴിയുന്നത്. ചില ബന്ധങ്ങളാകട്ടെ പുറത്ത് എത്തിയപ്പോള്‍ വലിയ രീതിയില്‍ തെറ്റിപ്പിരിയുകയും ചെയ്തിട്ടുണ്ട്. എന്നാല്‍ ഇതില്‍ നിന്നും വ്യത്യസ്തമായ കൂട്ടുകെട്ടാണ് ബിഗ് ബോസ് മലയാളം സീസണ്‍ 6 ലെ സായി-സിജോ-നന്ദന കൂട്ടുകെട്ട്.

ഈ കൂട്ടുകെട്ടിനെ പ്രേക്ഷകരില്‍ പലരും വിമർശിച്ചെങ്കിലും അവർ ഇപ്പോഴും തങ്ങളുടെ സൗഹൃദം അതുപോലെ തന്നെ മുന്നോട്ട് കൊണ്ടുപോകുകയാണ്. സ്വാഭാവികമായി ഉണ്ടായ സൗഹൃദമാണ് അതെന്നാണ് ഒർജിനല്‍സ് എന്ന യൂട്യൂബ് ചാനലിന് അനുവദിച്ച പ്രത്യേക അഭിമുഖത്തില്‍ സിജോ പറയുന്നത്.

ഹോട്ടല്‍ ടാസ്കിന് ഇടയില്‍ പരിക്ക് പറ്റിയ ഭാഗത്ത് എനിക്ക് ചെറിയ പ്രശ്നമുണ്ടായി. അതായത് വാ തുറക്കാന്‍ പറ്റാത്ത അവസ്ഥ. നീര് വന്നിട്ട് വീർത്തിരിക്കുകയായിരുന്നു. ആ സമയത്ത് അവർ ചെയ്ത ചില കാര്യങ്ങളുണ്ട്. എന്റെ എല്ലാ കാര്യങ്ങളും നോക്കുന്നു, എന്നോട് സംസാരിക്കുന്നു, എനിക്ക് വേണ്ടി ക്യാമറയില്‍ പോയി കാര്യം പറയുന്നു.

ആ സമയത്താണ് അവരുമായി ഞാന്‍ വലിയ രീതിയില്‍ ക്ലോസ് ആകുന്നത്. മോശം സമയത്ത് നമ്മുടെ കൂടെ നില്‍ക്കുന്ന ആളുകളുണ്ടാവുമല്ലോ. അങ്ങനെ കൂടെ നിന്ന് എനിക്ക് അവിടുന്ന് കിട്ടിയ സഹോദരങ്ങളാണ് സായിയും നന്ദനയും. ഒരു സഹോദരിയായിട്ടാണ് ഞങ്ങള്‍ നന്ദനയെ കാണുന്നത്. അവള്‍ക്ക് ഇങ്ങോട്ടും അങ്ങനെ തന്നെ. അത് എപ്പോഴും അങ്ങനെ തന്നെ നിലനില്‍ക്കണമെന്നാണ് ഞങ്ങള്‍ ആഗ്രഹിക്കുന്നതെന്നും സിജോ വ്യക്തമാക്കുന്നു.

നന്ദനയ്ക്കും കുടുംബത്തിനും ഒരു വീടും സ്ഥലവും വേണം, അവർ നന്നായി ജീവിക്കണമെന്നതാണ് ഞങ്ങളുടെ ആഗ്രഹം. പെങ്ങളൂട്ടിക്കൊരു വീട് എന്നത് പുറത്ത് ആളുകള്‍ എങ്ങനെയൊക്കെയോ പറഞ്ഞുണ്ടാക്കിയത്. എന്നാല്‍ തന്നെയും അവള്‍ക്കൊരു വീട് വേണം. അത് ഞങ്ങളുടേയും അതിയായ ഒരു ആഗ്രഹമാണ്.

ഞങ്ങള്‍ക്കും ചെയ്യാന്‍ പറ്റുന്നതിന്റെ പരമാവധി കാര്യങ്ങള്‍ തീർച്ചയായും ചെയ്തു കൊടുക്കും. കാരണം നമ്മുടെ കൂടെ തന്നേയുള്ള ഒരാളാണല്ലോ അവള്‍. അതുകൊണ്ട് തന്നെ അവള്‍ക്കൊരു വീടിന് വേണ്ടി ഞങ്ങളെല്ലാം പരമാവധി ശ്രമിക്കുകയും തങ്ങളെക്കൊണ്ട് കഴിയുന്നത് പോലെ സഹായിക്കുകയും ചെയ്യും.

പ്രണയിനിയെ എയർപ്പോർട്ടില്‍ വെച്ച് പരിചയപ്പെടുത്താന്‍ മുന്‍കൈ എടുത്തത് സായിയാണ്. കല്യാണമൊന്നും ഉറപ്പിച്ചിട്ടില്ല. പേര് ലിനു എന്നാണ്. കോട്ടയം ചങ്ങനാശ്ശേരിയാണ് സ്ഥലം. അഞ്ചു വർഷമായി. അറിയാം, നല്ല സുഹൃത്തുക്കളായിരുന്നു. ജീവിതത്തില്‍ എനിക്കൊരു മോശം അവസ്ഥയിലൂടെ കടന്ന് പോകേണ്ടി വന്നിട്ടുണ്ട്. ആ സമയത്ത് എന്റെ കൂടെ നില്‍ക്കുകയും പിന്തുണയ്ക്കുകയും ചെയ്തത് അവളാണ്. ആ ഒരു സ്നേഹവും ബഹുമാനവും എനിക്ക് അവളോടുണ്ടെന്നും സിജോ കൂട്ടിച്ചേർക്കുന്നു.