അനുവിനെ ഇഷ്ടം അല്ല, പക്ഷെ ഒരു സത്യമുണ്ട്; ബിഗ് ബോസ് സീസണ്‍ 7 മുന്നോട്ടുകൊണ്ടുപോയത് അവളാണ്

Published: Friday, November 7, 2025, 17:57 [IST]

ബിഗ് ബോസ് മലയാളം സീസൺ 7-ന്റെ ഏറ്റവും ചർച്ച ചെയ്യപ്പെടുന്ന മത്സരാർത്ഥിയാണ് അനുമോൾ. അവരുടെ 'നെഗറ്റീവ് ഗെയിം' എന്ന് വിമർശിക്കപ്പെടുന്ന ശൈലിയെക്കുറിച്ച് ഒട്ടേറെ വിമർശനങ്ങളാണ് ഉയർന്ന് വരുന്നത്. എന്നാല്‍ അതിന് അപ്പുറം ഈ സീസണ്‍ മുന്നോട്ട് കൊണ്ടുപോയത് അനുമോളാണെന്നാണ് ഒരു പ്രേക്ഷകന്‍ അഭിപ്രായപ്പെടുന്നത്. 'ഒരു ഗെയിമർ എന്ന നിലയിൽ എനിക്ക് അനുമോളോട് വലിയ താത്പര്യമില്ലെങ്കിലും, ഒരു കാര്യം നിഷേധിക്കാനാവില്ല. ഈ സീസണിലെ ഏറ്റവും കൂടുതൽ സ്ക്രീൻ സ്‌പേസ് കിട്ടുന്ന മത്സരാർത്ഥിയാണ് അനുമോൾ.' എന്ന് റൂമി എന്ന പ്രേക്ഷക കുറിക്കുന്നു.

ആദ്യ ആഴ്ച മുതൽ ഇന്നലത്തെ എപ്പിസോഡ് വരെ, ഷോയുടെ പ്രധാന ഉള്ളടക്കം (കണ്ടന്റ്) അനുമോൾ തന്നെയാണ്. അത് ഒരു നിസ്സാരമായ കാര്യമല്ല. സെലിബ്രിറ്റി എന്ന പദവിയും പുറത്ത് PR പിന്തുണയും ഉണ്ടെങ്കിലും, ബിഗ് ബോസ് വീടിനകത്ത് ഗെയിം തന്റെ അനുകൂലമാക്കാൻ കഴിഞ്ഞില്ലെങ്കിൽ ആർക്കും പിടിച്ചുനിൽക്കാൻ കഴിയില്ല.

അനുമോൾ തന്റെ നിലനിൽപ്പിന് ആവശ്യമായ ഉള്ളടക്കം നൽകിയിട്ടുണ്ട്, അത് 'നെഗറ്റീവ്' ആണെങ്കിൽ പോലും. പല മത്സരാർത്ഥികളും അവരെ കളിയാക്കുകയും കൂട്ടം കൂടി ഒറ്റപ്പെടുത്താൻ ശ്രമിക്കുകയും ചെയ്തിട്ടും, അതിൽ വീഴാതെ തിരിച്ചടിക്കാനുള്ള അനുമോളുടെ കഴിവ് ശ്രദ്ധേയമാണ്. പലപ്പോഴും വിവാദങ്ങളുടെ കേന്ദ്രബിന്ദുവായെങ്കിലും, അവർ ഷോയെ മുന്നോട്ട് നയിക്കുന്നതിൽ നിർണായക പങ്കുവഹിച്ചു.

നിലവിലെ സാഹചര്യത്തിൽ, അനീഷിനെ പിന്തള്ളി അനുമോൾ വിജയിച്ചാൽ അത്ഭുതപ്പെടേണ്ടതില്ല. എന്നാൽ, വിജയിച്ചാലും, മുൻ സീസണുകളിലെ ഒരു മത്സരാർത്ഥിക്കും നേരിടേണ്ടി വന്നിട്ടില്ലാത്ത തരത്തിലുള്ള സൈബർ ആക്രമണങ്ങൾ അനുമോൾക്ക് പുറത്ത് നേരിടേണ്ടിവരുമെന്ന് തോന്നുന്നു. അത് അവർ എങ്ങനെ കൈകാര്യം ചെയ്യുമെന്നറിയാൻ ഒരു ജിജ്ഞാസയുണ്ടെന്നും അവർ കുറിക്കുന്നു.

ഇതുവരെ ഞാൻ അനുമോളുടെ പോരായ്മകളെക്കുറിച്ച് മാത്രമാണ് പോസ്റ്റുകൾ ഇട്ടിട്ടുള്ളത്. ഈ ഷോയെക്കുറിച്ച് ഇവിടെയും പുറത്തും 90% പോസ്റ്റുകളും അനുമോളെ അവഹേളിക്കുന്നതാണ്. എന്നാൽ, അവരുടെ പിന്തിരിപ്പൻ ചിന്താഗതികളോട് (Regressive Thoughts) എതിർപ്പുണ്ടെങ്കിലും, ബിഗ് ബോസ് വീടിനുള്ളിൽ അനുമോൾ അതിജീവിച്ച സാഹചര്യങ്ങളെ മുൻനിർത്തി അവരെ പിന്തുണയ്ക്കുന്ന ഒരു ചെറിയ വിഭാഗം ആളുകളുണ്ട്.

ഈ ഷോയിൽ നിന്ന് അനുമോൾ യഥാർത്ഥമായി നേടിയ സപ്പോർട്ടർമാർ അവരാണെന്നാണ് എന്റെ വിശ്വാസം. എന്റെ ഒരു സുഹൃത്ത് ഈ വിഭാഗത്തിൽപ്പെടുന്നു, അവളുടെ വീക്ഷണം കേട്ടപ്പോൾ അതിൽ ഒരു ന്യായമുള്ളതായി തോന്നി. അതിനാലാണ് ഈ സീസൺ ഒരു പോസിറ്റീവ് പോസ്റ്റോടെ അവസാനിപ്പിക്കാമെന്ന് തീരുമാനിച്ചത്.

വ്യക്തിപരമായി, നിലവിൽ വീട്ടിൽ ഉള്ളവരിൽ എനിക്ക് ഏറ്റവും ഇഷ്ടം അക്ബറിനെയും നെവിനിനെയുമാണ്. വിജയസാധ്യത അനീഷിനും അനുമോൾക്കുമാണ്. ഇതിൽ അനീഷ് വിജയിക്കണമെന്നാണ് എന്റെ ആഗ്രഹം. എന്നാൽ, അനുമോൾ വിജയിച്ചാലും അതിൽ വലിയ ദുഃഖം തോന്നില്ല-എന്റെ കണ്ണിൽ ഇതൊരു റിയാലിറ്റി ഷോ മാത്രമാണ്. പക്ഷേ, അനീഷിന്റെ കാര്യത്തിൽ ഒരു ചെറിയ വിഷമമുണ്ട്. അനുമോൾ ജയിച്ചാൽ, അനീഷിന് 'കപ്പും' ഇല്ല, 'പെണ്ണും' ഇല്ലാത്ത അവസ്ഥയിലാകും. ഒരു 'സിഗ്മ' ശൈലിയിൽ നടന്ന ഒരാൾ, തന്റെ എല്ലാ ജാഡകളും മാറ്റിവെച്ച് ഇഷ്ടം പ്രകടിപ്പിച്ചിട്ടും അത് ഒരിടത്തും എത്താതെ പോയത് പാവം എന്നേ പറയാനാകൂവെന്നും അവർ കൂട്ടിച്ചേർത്തു.

Published On November 7, 2025