'വിജയ് ആ ചിത്രം നിരസിച്ചില്ലായിരുന്നെങ്കില് വിശാല് താരമാകുമായിരുന്നില്ല': 2006 ല് സംഭവിച്ചത് എന്ത്
നടന് വിജയിയെ സംബന്ധിച്ച് 2023 പൂർണ്ണമായും വിജയകരമായ വർഷമാണ്. വാരിസ്, ലിയോ എന്നീ രണ്ട് സൂപ്പർ ഹിറ്റുകളാണ് ഈ വർഷം അദ്ദേഹത്തിന്റെതായി പുറത്തിറങ്ങിയത്. ഇതില് തന്നെ ലോകേഷ് കനകരാജ് സംവിധാനം ചെയ്ത് ലിയോ തമിഴ് സിനിമയില് പുതിയ റെക്കോർഡുകള് സൃഷ്ടിക്കുകയും ചെയ്തു. വെങ്കട് പ്രഭു സംവിധാനം ചെയ്യുന്ന ചിത്രമാണ് വിജയിയുടേതായി അടുത്തതായി അണിയറയില് ഒരുങ്ങുന്ന ചിത്രം.
ഒരു നടനെ സംബന്ധിച്ചിടത്തോളം കഥ കേള്ക്കുന്ന എല്ലാ ചിത്രങ്ങളും ചെയ്യാന് സാധിച്ചെന്ന് വരില്ല. സംവിധായകരുടെ ആദ്യ ഓപ്ഷനായിരുന്ന പല നടന്മാരും പിന്നീട് വിവിധ കാരണങ്ങളാല് മാറിപ്പോയ കഥകളും നമുക്ക് അറിയാം. അത്തരത്തില് വിജയിയുടെ കരിയറില് മാറിപ്പോയ ഒരു ചിത്രത്തെക്കുറിച്ച് എൻ ലിംഗുസ്വാമി പറയുന്ന ഒരു വീഡിയോയാണ് ഇപ്പോള് വൈറലായി മാറിയിരിക്കുന്നത്.
അസാധാരണമായ കാരണങ്ങളാലാണ് 2006-ലെ തന്റെ ചിത്രമായ സണ്ടക്കോഴി വിജയ് നിരസിച്ചതെന്നാണ് ലിംഗുസ്വാമി പറയുന്നത് ജ്യോതികയ്ക്കൊപ്പം സൂപ്പർസ്റ്റാർ ദളപതി വിജയ് ആയിരുന്നു ആദ്യം ചിത്രം ചെയ്യേണ്ടിയിരുന്നത് എന്നത് എല്ലാവർക്കും അറിയാവുന്ന കാര്യമാണ്. ഇക്കാര്യം ആദ്യമായാണ് സംവിധായകന് തന്നെ തുറന്ന് പറയുന്നത്. ചിത്രത്തിലെ തന്റെ റോളിനെക്കുറിച്ച്, പ്രത്യേകിച്ച് രണ്ടാം പകുതിയിലെ രംഗങ്ങളില് വിജയിച്ച് അഭിപ്രായ വ്യത്യാസം ഉണ്ടായിരുന്നുവെന്നാണ് ലിംഗുസ്വാമി പറയുന്നത്.
"സിനിമയിൽ ഒരു പ്രധാന കഥാപാത്രത്തെ അവതരിപ്പിച്ച രാജ്കിരൺ രണ്ടാം പകുതിയിൽ തന്നെ മറികടക്കുമെന്ന് വിജയ് ഭയപ്പെട്ടു. അവിടെ വിജയ് എന്ന നടന് കാര്യമായൊന്നും ചെയ്യാനില്ലെന്നായിരുന്നു ഭയം. ചിത്രത്തോട് നോ പറയുന്നതിന് മുമ്പ് മുഴുവൻ തിരക്കഥയും കേൾക്കാൻ വിജയ് വിസമ്മതിച്ചതായും സംവിധായകൻ വെളിപ്പെടുത്തി.
വിജയ് പ്രോജക്റ്റിൽ നിന്ന് പുറത്തായപ്പോഴാണ് ഒരു പുതുമുഖത്തെ അന്വേഷിക്കാന് തുടങ്ങിയത്. അങ്ങനെയാണ് വിശാലിനെ കണ്ടെത്തുന്നത്. പ്രോജക്ടിനായി വിശാൽ വളരെ കഠിനാധ്വാനം ചെയ്തു. സണ്ടക്കോഴി റിലീസ് ചെയ്തപ്പോൾ, അത് ഒരു പ്രധാന ബോക്സ് ഓഫീസ് ഹിറ്റായി മാറുകയും വിശാലിനെ ശ്രദ്ധിക്കപ്പെടുന്ന നടനായി മാറ്റുകയും ചെയ്തു.
സണ്ടക്കോഴി ഈ വർഷത്തെ ഏറ്റവും വലിയ കളക്ഷൻ നേടിയ ചിത്രങ്ങളിലൊന്നായി മാറി, പിന്നീട് 2009-ൽ കന്നഡയിലേക്ക് വായുപുത്ര എന്ന പേരിൽ റീമേക്ക് ചെയ്യപ്പെട്ടു. വിജയ് ഒഴിഞ്ഞതോടെ ജ്യോതികയും ചിത്രത്തില് നിന്നും പുറത്തായി. പകരം മീരാ ജാസ്മിനായിരുന്നു ആ കഥാപാത്രത്തെ അവതരിപ്പിച്ചത്. ലാലും മറ്റൊരു പ്രധാന നടനായി സണ്ടക്കോഴിയിലെത്തിയിരുന്നു.
Click it and Unblock the Notifications
Sign in with Google