തുടക്കകാലത്ത് വാങ്ങിയത് 2000- 3000 രൂപ; യോഗി ബാബു ഇപ്പോൾ ഒരുദിവസം വാങ്ങുന്ന പ്രതിഫലം 12 ലക്ഷം രൂപയോ?

Updated: Tuesday, June 11, 2024, 10:02 [IST]

കോമഡി വേഷങ്ങളിൽ സ്ഥിരം കണ്ടുവരുന്ന നടനാണ് യോഗി ബാബു. മണ്ടേല എന്ന സിനിമയാണ് നടനെന്ന നിലയിൽ തന്റെ കഴിവ് മുഴുവനായും പ്രകടിപ്പിക്കാനുള്ള അവസരം അദ്ദേഹത്തിന് നൽകിയത്. അത്ര മനോഹരമായിട്ടാണ് ആ വേഷം യോഗി ചെയ്തത്. ഇന്ന് തമിഴ് സിനിമാ ലോകത്ത് തന്റേതായ സ്ഥാനം യോഗി കണ്ടെത്തിക്കഴിഞ്ഞു. മെർസൽ, പരിയേറും പെരുനമാൾ എന്നിങ്ങനെ നിരവധി ചിത്രങ്ങളുടെ ഭാഗമായി മാറുകയും ചെയ്തു. യോഗി ഒരു ദിവസം വാങ്ങുന്ന പ്രതിഫലമാണ് ഇപ്പോൾ സോഷ്യൽ മീഡിയ ചർച്ച ചെയ്യുന്നത്.

2000 - 3000 രൂപയ്ക്ക് സിനിമ ചെയ്ത് തുടങ്ങിയ ആളാണ് യോഗി. ഇന്ന് അദ്ദേഹത്തിന്റെ പ്രതിഫലം ലക്ഷങ്ങളാണ് എന്നാണ് പറയുന്നത്. പ്രതിദിനം ലക്ഷങ്ങളാണ് അദ്ദേഹം വാങ്ങുന്നത് എന്ന റിപ്പോർട്ടുകൾ വന്നിരുന്നു. പക്ഷേ അക്കാര്യം യോഗി ബാബു തന്നെ നിഷേധിച്ചിരുന്നു.റിപ്പോർട്ടുകൾ പ്രകാരം പ്രതിദിനം 12 ലക്ഷം രൂപയാണ് യോഗി സമ്പാദിക്കുന്നത് എന്നായിരുന്നു പറഞ്ഞത്. എന്നാൽ ഇത് സംബന്ധിച്ച് ഔദ്യോഗികമായ ഒരു സ്ഥിരീകരണവും ഉണ്ടായിട്ടില്ല. നേരത്തെ 10 ലക്ഷം ലഭിക്കുന്നുണ്ടായിരുന്നുവെന്നും റിപ്പോർട്ടുകൾ ഉണ്ടായിരുന്നു.

എന്നാൽ താൻ ആരിൽ നിന്നും പ്രതിദിനം 10 -15 ലക്ഷം രൂപ ആവശ്യപ്പെട്ടിട്ടില്ല എന്നാണ് അദ്ദേഹം പറയുന്നത്. 2000 - 3000 രൂപ പ്രതിഫലത്തിൽ സിനിമ ചെയ്യാൻ തുടങ്ങിയ ആളാണ് ഞാൻ. നവാഗത സംവിധായകരും നിർമ്മാതാക്കളും നേരിടുന്ന പ്രശ്നങ്ങൾ എനിക്കറിയാം. കഴിഞ്ഞ ദിവസം പോലും ഒരു നിർമ്മാതാവ് തന്റെ സാമ്പത്തിക പ്രശ്നങ്ങളെക്കുറിച്ച് എന്നോട് പറഞ്ഞപ്പോൾ ഞാൻ ആദ്യം പറഞ്ഞ തുകയുടെ പകുതി തുകയ്ക്ക് അഭിനയിക്കാമെന്ന് സമ്മതിച്ചു, അദ്ദേഹം പറഞ്ഞു.

യോഗി ബാബു ഭാഗമാകുന്ന നിരവധി സിനിമകളുണ്ട്. ഹര, ദി ഗ്രേയ്റ്റസ്റ്റ് ഓഫ ഓൾ ടൈം, നോൺ വയലൻസ്, കങ്കുവ എന്നിവ അദ്ദേഹത്തിന്റേതായി വരാനിരിക്കുന്ന സിനിമകളാണ്. തമിഴിലെ മുൻനിര നായകന്മാർക്കാെപ്പം യോഗി ബാബു അഭിനയിച്ചിട്ടുണ്ട്. പലപ്പോഴും തന്റെ രൂപത്തിന്റെ പേരിൽ ട്രോൾ കേൾക്കേണ്ടി വന്ന താരമാണ് യോഗി ബാബു. എന്നാൽ ഇതൊന്നും അദ്ദേഹം കാര്യമാക്കിയിട്ടില്ല. ഇതേക്കുറിച്ച് ഒരു അഭിമുഖത്തിൽ അദ്ദേഹം പറയുന്നുണ്ട്.

താൻ ഇത് സാധാരണമെന്നാണ് കരുതുന്നതെന്നാണ് യോഗി ബാബു പറഞ്ഞത്. കോമഡിയുടെ പ്രധാന ഭാഗമാണ് ശരീരഭാഷയെന്നും അത് അങ്ങനെ ഉപയോഗിക്കുന്നതിൽ സന്തോഷമുണ്ടെന്നും യോഗി ബാബു പറഞ്ഞു. വടിവേലു സാറിനെ പോലെ മറ്റ് ഹാസ്യ നടൻനമാരും സ്ക്രീനിൽ കളിയാക്കപ്പെട്ടിട്ടുണ്ടെന്നും അദ്ദേഹം പറയുന്നു.