ഇന്ത്യയിലെ ഏറ്റവും കൂടുതൽ പ്രതിഫലം വാങ്ങുന്ന നടിയായി പ്രിയങ്ക ചോപ്ര; രാജമൗലി ചിത്രത്തിന് വാങ്ങുന്ന തുക ഇത്ര

ആർ ആർ‌ ആറിന്റെ തകർപ്പൻ വിജയത്തിന് ശേഷം മഹേഷ് ബാബുവിനെ നായകനായാക്കി എസ് എസ് രാജമൗലി സംവിധാനം ചെയ്യുന്ന എസ് എസ് എസ് എംബി 29 എന്ന ചിത്രത്തിനായുള്ള കാത്തിരിപ്പിലാണ് ആരാധകർ. പ്രിയങ്ക ചോപ്ര ജോനാസ് ആണ് ചിത്രത്തിലെ നായിക. 1000 കോടി ചെലവഴിച്ച് നിർമിക്കുന്ന ചിത്രത്തിൽ‌ പ്രിയങ്ക വാങ്ങുന്ന പ്രതിഫലമാണ് ഇപ്പോൾ ചർ‌ച്ചയായിരിക്കുന്നത്. പുതിയ ചിത്രത്തിന് പ്രിയങ്ക വാങ്ങുന്ന പ്രതിഫലം താരത്തെ ഇന്ത്യൻ സിനിമയിൽ ഏറ്റവുമധികം പ്രതിഫലം വാങ്ങുന്ന നടിയായി മാറ്റിയിരിക്കുകയാണ്.

ദീപിക പദുകോണിനെ മറികടന്നാണ് പ്രിയങ്ക ഈ നേട്ടം സ്വന്തമാക്കിയിരിക്കുന്നത്. ഒരു ചിത്രത്തിന് ദീപിക 15 കോടി മുതൽ 20 കോടി വരെയാണ് പ്രതിഫലമായി വാങ്ങിയിരുന്നത്. പ്രിയങ്ക ഈ ചിത്രത്തിന് 30 കോടി രൂപയാണ് പ്രതിഫലമായി വാങ്ങുന്നത് എന്നാണ് റിപ്പോർട്ട്. കർക്കി, ഫൈറ്റർ എന്നീ ചിത്രങ്ങളിൽ ദീപിക പദുക്കോൺ വാങ്ങിയ പ്രതിഫലത്തെ കടത്തിവെട്ടിയാണ് ഏറ്റവും കൂടുതൽ പ്രതിഫലം വാങ്ങുന്ന നടിയായി പ്രിയങ്ക മാറിയിരിക്കുന്നത്. എസ് എസ് എം ബി 29 എന്ന് താത്ക്കാലികമായി പേരിട്ടിരിക്കുന്ന ചിത്രത്തിൽ വൻ പ്രതീക്ഷയോടെ എല്ലാവരും കാത്തരിക്കുന്നത്.

‌
അതേ സമയം, 30 കോടിക്ക് മുകളിലാണ് പ്രിയങ്ക ചോപ്ര ആവശ്യപ്പെട്ടതെന്നാണ് ലഭിക്കുന്ന വിവരം. നിർമാതാക്കളുമായി നടത്തിയ ചർച്ചകൾക്ക് ശേഷം 30 കോടിയിൽ‌ കരാർ ഉറപ്പിക്കുകയായിരുന്നുവെന്നും ആണ് റിപ്പോർട്ടുകൾ. 1000 - 1300 കോടിയാണ് ചിത്രത്തിന്റെ ബജറ്റ് എന്നാണ് റിപ്പോർട്ടുകൾ. ഇതിൽ 400 - 500 കോടിയോളം താരങ്ങളുടെ പ്രതിഫലത്തിനായി ചെലവഴിക്കുന്നുണ്ടെന്നാണ് സൂചന.

മഹേഷ് ബാബുവിനും പ്രിയങ്ക ചോപ്രയ്ക്കും ഒപ്പം നിരവധി താരങ്ങൾ ചിത്രത്തിൽ അഭിനയിക്കുന്നുണ്ട്. ജോൺ എബ്ര​ഹാം ചിത്രത്തിൽ ഉണ്ടെന്നാണ് റിപ്പോർട്ട്. അതേ സമയം പ്രിയങ്കയുടെ പ്രതിഫലത്തെക്കുറിച്ച് ചർച്ചകൾ ഉയരുന്നുണ്ടെങ്കിലും പ്രിയങ്കയ്ക്ക് എത്രയാണ് പ്രതിഫലമായി നൽകുന്നത് എന്നതിനെക്കുറിച്ച് ചിത്രത്തിന്റെ നിർമാതാക്കളിൽ നിന്ന് ഔദ്യോ​ഗിക പ്രതികരണം ഒന്നുമുണ്ടായിട്ടില്ല.

ഇന്ത്യൻ സിനിമയിലെ ഏറ്റവും വലിയ റിലീസുകളിൽ ഒന്നായിരിക്കുമെന്ന് പ്രതീക്ഷിക്കുന്ന, ആരാധകർ ആകാംക്ഷയോടെ കാത്തിരിക്കുന്ന ചിത്രമാണ് എസ് എസ് എം ബി 29. രാജമൗലിയുടെ സംവിധാനം, മഹേഷ് ബാബുവിൻ്റെ സ്റ്റാർഡം, പ്രിയങ്ക ചോപ്രയുടെ ആഗോള ആരാധകവൃന്ദം എന്നിവ ഒത്തുചേരുമ്പോൾ ചിത്രത്തിന് വൻ വിജയം നേടാൻ കഴിയുമെന്ന് തന്നെയാണ് പ്രതീക്ഷ.