പുതിയ ബംഗ്ലാവ് വാങ്ങി ജോണ്‍ എബ്രഹാം: നികുതി മാത്രം 4 കോടി, ആപ്പോള്‍ വസ്തുവിന്റെ വിലയോ?

Updated: Tuesday, January 2, 2024, 19:18 [IST]

മുംബൈയിലെ ഖാറിൽ പുതിയ വസതി സ്വന്തമാക്കി ബോളിവുഡ് നടനും നിർമ്മാതാവുമായ ജോൺ എബ്രഹാം. രണ്ട് നിലകളിലായി 13138 ചതുരശ്ര അടി വിസ്തീർണമുള്ള ആഡംബര ബംഗ്ലാവ് 75 കോടി രൂപയ്ക്കാണ് താരം വാങ്ങിയതെന്നാണ് റിപ്പോർട്ടുകള്‍ വ്യക്തമാക്കുന്നത്. മുംബൈയിലെ ഏറ്റവും വലിയ റീട്ടെയിൽ ഹൈ സ്ട്രീറ്റുകളിലൊന്നായ ഖാർസ് ലിങ്കിംഗ് റോഡിലാണ് ബംഗ്ലാവ് സ്ഥിതി ചെയ്യുന്നത്.

ഇന്‍ഡക്സ്ടാപ് എന്ന വെബ്സൈറ്റിന് ലഭിച്ച പ്രോപ്പർട്ടി രജിസ്ട്രേഷൻ രേഖകളിലൂടെയാണ് ഇടപാട് വിവരം പുറത്ത് വന്നത്. യു എസിലെ പെൻസിൽവാനിയയിൽ താമസിക്കുന്ന 81 കാരനായ പ്രവീൺ നത്തലാൽ ഷായുടെയും കുടുംബത്തിന്റെയും ഉടമസ്ഥതയിലുള്ള വസ്തുവിൽ 7,722 ചതുരശ്ര അടി വിസ്തീർണ്ണമുള്ള രണ്ട് നിലകളുള്ള 5416 ചതുരശ്ര അടി ബംഗ്ലാവും ഉൾപ്പെടുന്നു. ഇത് വേണമെങ്കില്‍ വീണ്ടും വിപുലീകരിച്ച് പണിയാന്‍ സാധിക്കുന്ന കെട്ടിടമാണ്.

ബെംഗളൂരുവിലെ എംജി റോഡിന് ശേഷം ഇന്ത്യയിലെ ഏറ്റവും ജനപ്രിയമായ മൂന്നാമത്തെ ഹൈസ്ട്രീറ്റ് റീട്ടെയില്‍ മേഖലയാണ് ഖാർസ് ലിങ്കിംഗ് റോഡ്. മേഖലയില്‍ ഒരു ചതുരശ്ര അടിക്ക് മാത്രം 40000 രൂപ മുതൽ 90000 രൂപ വരെയാണ് വിലയെന്നാണ് പിടിഐ റിപ്പോർട്ട് ചെയ്യുന്നത്.

ജോൺ എബ്രഹാം 2023 ഡിസംബർ 27 നാണ് പ്രവീൺ നത്തലാൽ ഷായുമായും ഇപ്പോൾ യുഎസിൽ താമസിക്കുന്ന അദ്ദേഹത്തിന്റെ കുടുംബത്തിലെ 10 അംഗങ്ങളുമായും കരാർ രജിസ്റ്റർ ചെയ്യുന്നത്. നിർമ്മൽ ഭുവൻ എന്ന ബംഗ്ലാവിന് വിലയായി 70.83 കോടിയും സ്റ്റാമ്പ് ഡ്യൂട്ടിയായി 4.25 കോടിയും മുംബൈ കോർപ്പറേഷന് നൽകിയതായി ദേശീയ മാധ്യമങ്ങള്‍ റിപ്പോർട്ട് ചെയ്യുന്നു.

നേരത്തേയും ഇത്തരത്തിലുള്ള പ്രോപ്പർട്ടികള്‍ വാങ്ങിക്കൂട്ടിയ വ്യക്തിയാണ് ജോണ്‍ എബ്രഹാം. ബാന്ദ്ര വെസ്റ്റിലെ ഷേർലി രാജൻ റോഡിലെ ഹിറ്റൻ അപ്പാർട്ടുമെന്റിലെ കടലിനഭിമുഖമായ പെന്റ്ഹൗസിലാണ് തരം നിലവില്‍ താമസിക്കുന്നത്. റിയൽ എസ്റ്റേറ്റിന് പുറമെ ഓൺലൈൻ, ഫുഡ് ആൻഡ് ബിവറേജസ്, കമ്മ്യൂണിറ്റി , ഫിറ്റ്‌നസ്, ലൈഫ്‌സ്‌റ്റൈൽ തുടങ്ങിയ നിരവധി കമ്പനികളിലും അദ്ദേഹം നിക്ഷേപം നടത്തിയിട്ടുണ്ട്.

ഇന്ത്യൻ സൂപ്പർ ലീഗ് ടീമായ നോർത്ത് ഈസ്റ്റ് യുണൈറ്റഡ്, ഇന്ത്യൻ ഹോക്കി ലീഗിൽ കളിക്കുന്ന പ്രൊഫഷണൽ ഹോക്കി ടീമായ ഡൽഹി വേവറൈഡേഴ്‌സ് എന്നിവയുടെ ഉടമസ്ഥനുമാണ് ജോണ്‍ എബ്രഹാം.