സെക്സിന് വേണ്ടിയല്ല ഈ വിവാഹം; എന്റെ പ്രായം 40 ഉം ഇദ്ദേഹത്തിന്റേത് 49 ഉം, ആർക്കാണ് പ്രശ്നം, തുറന്നടിച്ച് ദിവ്യ

കഴിഞ്ഞ ദിവസം വിവാഹിതരായ സീരിയല്‍ താരം ദിവ്യ ശ്രീധറിനും നടന്‍ ക്രിസ് വേണുഗോപാലിനും എതിരായി വലിയ അധിക്ഷേപങ്ങളാണ് സമൂഹ മാധ്യമങ്ങളിലൂടെ ഒരു വിഭാഗം ഉയർത്തി വിട്ടത്. ഇരുവരുടേയും പ്രായമൊക്കെ സൂചിപ്പിച്ചുകൊണ്ടായിരുന്നു ചിലരുടെ കമന്റ്. എന്നാല്‍ ഇതിനെതിരെയൊക്കെ ശക്തമായ മറുപടിയുമായി ദിവ്യ ശ്രീധറും ക്രിസ് വേണുഗോപാലും തന്നെ രംഗത്ത് വരികയും ചെയ്തു.

വിവാഹം നാലാള്‍ അറിയണം എന്ന് ആഗ്രഹിച്ചിരുന്നെങ്കിലും ഇത്രക്ക് അങ്ങ് പോകും എന്ന് ഞാന്‍ ഒരിക്കലും കരുതിയിരുന്നില്ലെന്നാണ് ദിവ്യ ശ്രീധർ വ്യക്തമാക്കിയത്. സോഷ്യല്‍ മീഡിയ തുറന്നാല്‍ നമ്മളാണ്. ഇപ്പോള്‍ പോസിറ്റീവ് കമന്റൊക്കെ വരുന്നുണ്ടെങ്കില്‍ തുടക്കത്തില്‍ വലിയ നെഗറ്റീവ് ആയിരുന്നു. കേട്ടപ്പോള്‍ തന്നെ മൂഡ് പോയി. എന്തിനാണ് ആളുകള്‍ ഇങ്ങനെ പറയുന്നത് എന്നായിരുന്നു ആലോചിച്ചിരുന്നതെന്നും നടി പറയുന്നു.

കല്യാണം കഴിക്കുന്നത് ഒരു തെറ്റാണോ? ജീവിതത്തില്‍ വരുന്ന ഓരോ പ്രശ്നങ്ങള്‍ കൊണ്ടല്ലേ നമ്മള്‍ മറ്റൊരു വിവാഹത്തിലേക്ക് എത്തിപ്പെടുന്നത്. അത് ഇതിനും മാത്രം വലിയ തെറ്റാണോ? ഇത്രയും മോശം കമന്റുകള്‍ ഒരിക്കലും പ്രതീക്ഷിച്ചില്ല. ചെറിയ തോതില്‍ പ്രതികരണമൊക്കെയുണ്ടാവുമെന്ന് അറിയാമായിരുന്നെങ്കിലും ഇത് ഒരിക്കലും പ്രതീക്ഷിച്ചില്ല. എങ്ങനെയാണ് ഇങ്ങനെയൊക്കെ എഴുതാന്‍ കഴിയുന്നത്.

ഒരു കാര്യം മാത്രം പറയാം, സെക്സിന് വേണ്ടിയേ അല്ല ഞാന്‍ കല്യാണം കഴിച്ചത്. മക്കളെ സേഫ് ആക്കണം, മക്കള്‍ക്ക് ഒരു അപ്പവേണം. അതോടൊപ്പം ഇത് എന്റെ ഭർത്താവാണ് എന്ന് പറയാന്‍ എനിക്ക് ഒരു ആള്‍ വേണം. എനിക്ക് ഒരു ഐഡന്റിറ്റി വേണം. അതായത് എനിക്കും എന്റെ മക്കള്‍ക്കും വേണ്ടിയാണ് ഞാന്‍ വിവാഹം ചെയ്തത്. ദയവ് ചെയ്ത് ഇത്രയും മോശപ്പെട്ട കമന്റ് ഇടല്ലേയെന്ന് ആളുകളോട് ഞാന്‍ പറയുകയാണ്.

നിങ്ങളുടെയൊക്കെ വീട്ടിലും അമ്മയും പെങ്ങള്‍മാരുമില്ലേ? അവരുടെയൊക്കെ ജീവിതത്തെക്കുറിച്ച് ആലോചിച്ച് നോക്കൂ. എന്ത് വൃത്തികേടായിട്ടാണ് എഴുതുന്നത്. അവരുടെയൊക്കെ അവസ്ഥ ഇങ്ങനെ ആയതുകൊണ്ടാണോ മറ്റുള്ളവരെക്കുറിച്ച് ഇങ്ങനെ പറയുന്നതെന്ന് എനിക്ക് അറിയില്ല. അവരൊക്കെ അങ്ങനെ ആയിരിക്കാം. സെക്സിന് വേണ്ടയല്ല ഞാന്‍ കല്യാണം കഴിച്ചത്. അത് ഇല്ലെങ്കിലും ഈ ലോകത്ത് ജീവിക്കാന്‍‍ കഴിയില്ലേ. അത് ലൈഫിന്റെ ഒരു ഭാഗമാണെന്ന് മാത്രമേയുള്ളുവെന്നും ദിവ്യ പറയുന്നു.

എനിക്ക് 40 വയസ്സും ഇദ്ദേഹത്തിന് 49 വയസ്സുമാണ്. നാട്ടുകാർ പറയതുന്നത് 60 വയസ്സെന്നാണ്. അത് ആയിക്കോട്ടെ. ഞങ്ങള്‍ക്ക് പ്രശ്നമൊന്നും ഇല്ല. എനിക്ക് 40 അല്ല ഒരു അമ്പത് ആയിക്കോട്ടെ, എന്തായാലും ഞാന്‍ അല്ലേ താമസിക്കുന്നത്. ആർക്കാണ് പ്രശ്നം. 60 വയസ്സുള്ള ആളിന് കല്യാണം കഴിച്ചൂടെ. ആണായാലും പെണ്ണായാലും എത്ര വയസിലും കല്യാണം കഴിച്ചൂടെ. എന്തായാലും വിവാഹം ഇത്ര ആള്‍ അറിഞ്ഞതില്‍ അതിയായ സന്തോഷമുണ്ട്.

നമ്മളെ അറിയുന്ന ആളുകളൊക്കെ നല്ല അഭിപ്രായമാണ് പറഞ്ഞത്. അറിയാത്തവരാണ് ഇങ്ങനെ അധിക്ഷേപിക്കുന്നത്. എല്ലാവരും അങ്ങനെയേല്ല. അറിയാത്തവരിലും നല്ല അഭിപ്രായം പറഞ്ഞ നിരവധിയാളുകളുണ്ട്. മക്കളൊക്കെ നല്ല സന്തോഷത്തിലാണ്. കുടുംബക്കാരൊക്കെ ഒപ്പം നിന്നും. മക്കള്‍ക്ക് വേണ്ടിയാണ് ഇത്രയും കാലം ജീവിച്ചത്. അവരാണ് വിവാഹത്തിന് നിർബന്ധിച്ചത്. മക്കള്‍ക്ക് ഞാന്‍ കൊടുത്ത കരുതലാണ് ഈ വിവാഹത്തിലേക്ക് എത്തിച്ചിരിക്കുന്നതെന്നും താരം കൂട്ടിച്ചേർത്തു.

അതേസമയം, ഗുരുവായൂരില്‍ വെച്ചായിരുന്നു ഇരുവരുടേയും വിവാഹം കഴിഞ്ഞത്. വളരെ അടുത്ത ബന്ധുക്കളും സുഹൃത്തുക്കളും മാത്രമായിരുന്നു വിവാഹത്തില്‍ പങ്കെടുത്തത്. തങ്ങള്‍ ഒന്നിക്കാന്‍ പോകുന്നുവെന്ന വിവരം ഇരവരും തലേ ദിവസം തന്നെ മാധ്യമങ്ങളെ അറിയിച്ചിരുന്നു.