അപര്‍ണ നായരുടെ മകള്‍ക്ക് അമ്മായാകാന്‍ അവന്തിക മോഹന്‍ തയ്യാര്‍, പക്ഷെ...!

Updated: Wednesday, September 27, 2023, 14:19 [IST]

കൊച്ചി: മിനി സ്‌ക്രീന്‍ പ്രേക്ഷകരുടെ പ്രിയതാരമായിരുന്ന അപര്‍ണ നായര്‍ അടുത്തിടെയാണ് ആത്മഹത്യ ചെയ്തത്. സീരിയല്‍ ലോകമാകെ അപര്‍ണയുടെ അപ്രതീക്ഷിത വിയോഗത്തിന്റെ ഞെട്ടലിലായിരുന്നു. മേഘതീര്‍ഥം, മുദ്ദുഗൗ, അച്ചായന്‍സ്, കോടതിസമക്ഷം ബാലന്‍ വക്കീല്‍, കല്‍ക്കി തുടങ്ങി ഒട്ടേറെ സിനിമകളിലും അപര്‍ണ വേഷമിട്ടിരുന്നു. കുടുംബപ്രശ്‌നങ്ങളെ തുടര്‍ന്നായിരുന്നു അപര്‍ണ ആത്മഹത്യ ചെയ്തത് എന്നാണ് പൊലീസ് പറയുന്നത്.

രണ്ട് മക്കളായിരുന്നു അപര്‍ണയ്ക്കുള്ളത്. ഇതില്‍ മൂത്തകുട്ടി ആദ്യ വിവാഹത്തിലുള്ളതാണ്. ഈ പെണ്‍കുട്ടിക്ക് 18 വയസുണ്ട്. രണ്ടാമത്തെ കുട്ടി അപര്‍ണയുടെ മരണത്തിന് ശേഷം ഇപ്പോഴത്തെ ഭര്‍ത്താവിനൊപ്പമാണ് കഴിയുന്നത്. മൂത്ത കുട്ടി ഒന്നാമത്തെ വയസ് മുതല്‍ അമ്മൂമ്മയോടൊപ്പമാണ് താമസിക്കുന്നത്. അപര്‍ണയുടെ മരണത്തോടെ അച്ഛനേയും അമ്മയേയും നഷ്ടപ്പെട്ട അവസ്ഥയിലാണ് ഈ കുട്ടി.

ഈ സാഹചര്യത്തില്‍ ഈ കുട്ടിയെ നടി അവന്തിക മോഹന്‍ ദത്തെടുക്കാന്‍ ആഗ്രഹം പ്രകടിപ്പിച്ചിരുന്നു എന്ന് പറയുകയാണ് താരദമ്പതികളായ മനോജും ബീന ആന്റണിയും. തങ്ങളുടെ യൂട്യൂബ് വീഡിയോയിലൂടെയാണ് ഇരുവരും ഇക്കാര്യം പറഞ്ഞത്. ചെറിയ കുഞ്ഞായിരുന്നപ്പോള്‍ തന്നെ അപര്‍ണ മൂത്ത കുട്ടിയെ ലൊക്കേഷനില്‍ കൊണ്ടുവരുമായിരുന്നു. അന്ന് മുതല്‍ അവന്തികയ്ക്ക് ആ കുട്ടിയോട് വലിയ വാത്സല്യമായിരുന്നു.

അപര്‍ണയുടെ മരണത്തിന് ശേഷം അനാഥയായ കുട്ടിയെ ദത്തെടുക്കാന്‍ താന്‍ തയ്യാറാണെന്നും തന്റെ മകന്റെ ചേച്ചിയെ പോലെ അവള്‍ വളരട്ടെ എന്നും അവന്തിക തന്നോട് പറഞ്ഞതായി ബീന ആന്റണി പറയുന്നു. എന്നാല്‍ അവന്തിക ഇക്കാര്യം പറഞ്ഞപ്പോള്‍ തന്നെ ഇത് അസാധ്യമാണ് എന്ന് താന്‍ താന്‍ പറഞ്ഞതായും ബീന ആന്റണി പറഞ്ഞു. എന്നാലും അവന്തികയുടെ നിര്‍ബന്ധപ്രകാരം അപര്‍ണയെ അമ്മയെ പോയി ഇരുവരും കണ്ടു.

അവന്തികയുടെ ആവശ്യത്തിവന് അപര്‍ണയുടെ അമ്മതയാറായില്ലെന്നും താന്‍ ജീവിച്ചിരിക്കുന്നിടത്തോളം കാലം മകളെ നോക്കും എന്നുമാണ് അവര്‍ പറഞ്ഞത് എന്നും ബീന ആന്റണി കൂട്ടിച്ചേര്‍ത്തു. വലിയ കഷ്ടത്തിലാണ് അവര്‍ കഴിയുന്നത് എന്നും അവരെ സഹായിക്കാന്‍ തങ്ങള്‍ തീരുമാനിച്ചിട്ടുണ്ടെന്നും മനോജും കൂട്ടിച്ചേര്‍ത്തു. അവന്തികയുടെ നല്ല മനസിന് ബിഗ് സല്യൂട്ട് എന്നും മനോജും ബീനയും പറഞ്ഞു.

അപര്‍ണയ്ക്ക് കുട്ടിയെ ഡോക്ടറാക്കണമെന്നായിരുന്ന ആഗ്രഹം എന്നും അതിന് വേണ്ടിയുള്ള സഹായങ്ങള്‍ ചെയ്യാന്‍ തങ്ങള്‍ തീരുമാനിച്ചതായും ഇരുവരും പറഞ്ഞു. അതിന് വേണ്ടി എല്ലാവരുടെ സഹായവും പ്രതീക്ഷിക്കുന്നു എന്നും മനോജും ബീന ആന്റണിയും യൂട്യൂബ് വീഡിയോയില്‍ വ്യക്തമാക്കി.