ഉത്തരക്ക് താലിചാര്‍ത്തി സുഷിന്‍ ശ്യാം; വിവാഹത്തിന് സാക്ഷികളായി ഫഹദും നസ്രിയയും ജയറാമും പാര്‍വതിയും

കൊച്ചി: സം​ഗീതി സംവിധായകൻ സുഷിൻ ശ്യാം വിവാഹിതനായി. ഉത്തരയാണ് വധു. വളരെ അടുത്ത സുഹൃത്തുക്കളും ബന്ധുക്കളും മാത്രം ആണ് ചടങ്ങിൽ പങ്കെടുത്തത്. ഫഹദ് ഫാസിൽ, നസ്രിയ, ജയറാം, കാളിദാസ്, പാർവതി, ശ്യാം പുഷ്കരൻ, ഉണ്ണിമായ, സം​ഗീത സംവിധായകൻ ദീപക് ദേവ് എന്നിവർ വിവാഹത്തിൽ പങ്കെടുത്തു.

ജയറാമിന്റെ മകൾ മാളവികയുടെ വിവാഹത്തിന് സുഷിനൊപ്പം ഉത്തരയും എത്തിയിരുന്നു. അവിടെ വെച്ചാണ് സുഷിൻ ഉത്തരയെ പരിചയപ്പെടുത്തിയത്. അതേ സമയം എന്നായിരിക്കും വിവാഹം എന്നതിനെ കുറിച്ച് സൂചിപ്പിച്ചിരുന്നില്ല. സുഷിൻ അവസാനം സം​ഗീതം നൽകിയത് അമൽ നീരദിന്റെ ബോ​ഗയ്ൻ വില്ലയ്ക്കാണ്. ഈ സിനിമയ്ക്ക് ശേഷം ചെറിയ ഇടവേള എടുക്കുമെന്ന് സുഷിൻ പറഞ്ഞിരുന്നു.

ഈ വർഷത്തെ തന്റെ അവസാന ചിത്രമായിരിക്കും ബോ​ഗയ്ൻവില്ല എന്നും ഒരു ചെറിയ ഇടവേള എടുക്കുന്നുവെന്നും താരം പറഞ്ഞിരുന്നു.. അടുത്ത വർഷമായിരിക്കും താൻ ഇനി പണി തുടങ്ങുകയെന്നും താരം പറഞ്ഞിരുന്നു. 2014 ൽ സപ്തമശ്രീ തസ്ക്കര എന്ന ചിത്രത്തിന് പശ്ചാത്തല സം​ഗീതം ചെയ്തതാണ് സുഷിൻ ചലച്ചിത്ര രം​ഗത്തേക്ക് വരുന്നത്. കിസ്മത്ത് എന്ന ചിത്രത്തിലൂടെയാണ് സ്വതന്ത്ര സം​ഗീത സംവിധായകനാവുന്നത്. കിസ്മത്തിലെ പാട്ട് ശ്രദ്ധ നേടി.

ചെറുപ്പത്തിൽ തന്നെ സം​ഗീതത്തോട് താല്പര്യമുണ്ടായിരുന്നു സുഷിന്. സ്കൂൾ പഠനത്തിന് ശേഷം എഞ്ചിനീയിറം​ഗിന് ചേർന്നു. പക്ഷേ, സം​ഗീതത്തോടുള്ള ഇഷ്ടം കൊണ്ട് പഠനം പാതിവഴിയിൽ നിർ‌ത്തി. പിന്നീട് സം​ഗീത സംവിധായകനായ ദീപക് ദേവിന്റെ സഹായിയായി. രണ്ട് വർ‌ഷത്തോളം ദീപക് ദേവിന്റെ കൂടെയായിരുന്നു.

കുമ്പളങ്ങി നൈറ്റിസിലെ സം​ഗീതത്തിന് സുഷിന് മികച്ച സം​ഗീത സംവിധായകനുള്ള സംസ്ഥാന പുരസ്ക്കാരം ലഭിച്ചിരുന്നു. കിസ്മത്ത്, എസ്ര, വരത്തൻ, കുറുപ്പ്, ഭീഷ്മ പർവം, രോമാഞ്ചം, മഞ്ഞുമ്മൽ ബോയ്സ്. ആവേശം എന്നി സിനിമകൾക്കൊക്കെ സം​ഗീതം നൽകിയിരുന്നു. നീലാകാശം പച്ചക്കടൽ ചുവന്ന ഭൂമി, സപ്തമശ്രീ തസ്ക്കര തുടങ്ങിയ സിനിമകൾ പാടിയിട്ടും ഉണ്ട്.

അതേ സമയം, വളരെ ലളിതമായിരുന്നു വിവാ​ഹം. ക്രീം നിറത്തിലുള്ള ലൂസ് പ്രിന്റ്ഡ് ഷർട്ടും മുണ്ടുമായിരുന്നു സുഷിന്റെ വേഷം. ഓറ‍ഞ്ചും ​ഗോൾഡൻ നിറവും കലർന്ന ഡബിൾ ഷെയ്ഡ് സാരിയാണ് വധുവിന്റെ വേഷം. അധികം ആഭരണങ്ങൾ ധരിച്ചിരിന്നില്ല. നിരവധി പേരാണ് വധൂവരന്മാർക്ക് ആശംസകളുമായി എത്തുന്നത്.