ദസറ പ്രതീക്ഷിച്ച വിജയമില്ല, അടുത്തത് ഹിറ്റാക്കാന്‍ നാനി, പ്രതിഫലം വര്‍ധിപ്പിച്ചു? വാങ്ങുന്നത് ഇത്ര

Updated: Saturday, October 7, 2023, 1:18 [IST]

ഹൈദരാബാദ്: തെലുങ്ക് സിനിമയില്‍ അഭിനയത്തിന്റെ കാര്യത്തിലും താരമികവിലും ഒരുപോലെ മുന്നിട്ട് നില്‍ക്കുന്ന അപൂര്‍വ നടന്മാരിലൊരാളാണ് നാനി. മികച്ച നിരവധി ചിത്രങ്ങള്‍ നാനിയുടെ പേരിലുണ്ട്. അടുത്തിടെ മികച്ച ചിത്രങ്ങള്‍ ഇറക്കിയിട്ടും താരത്തിന് ബോക്‌സോഫീസ് വിജയം നേടാന്‍ സാധിച്ചിരുന്നില്ല. അതുകൊണ്ട് അടുത്ത ചിത്രത്തിനായി വളരെ ശ്രദ്ധിച്ചാണ് കഥ തിരഞ്ഞെടുത്തിരിക്കുന്നത്.

ഹായ് നാന എന്നാണ് ചിത്രത്തിനിട്ടിരിക്കുന്ന പേര്. അതേസമയം ഇതിന് വേണ്ടി നാനി പ്രതിഫലം വര്‍ധിപ്പിച്ചുവെന്നാണ് റിപ്പോര്‍ട്ട്. തെലുങ്ക് സിനിമയില്‍ അധികം പ്രതിഫലം വാങ്ങാത്ത നടന്മാരില്‍ ഒരാളാണ് നാനി. സൂപ്പര്‍ താരങ്ങളുടെ നിരയിലേക്കാണ് പ്രതിഫലവുമായി താരം എത്തുന്നത്. ഒന്‍പത് കോടിയായിരുന്നു ഒരു ചിത്രത്തിനായി നേരത്തെ നാനി വാങ്ങി കൊണ്ടിരുന്നത്. ഇത് തെലുങ്ക് സിനിമയിലെ ചെറിയ പ്രതിഫലങ്ങളിലൊന്നാണ്.

മഹേഷ് ബാബു, അല്ലു അര്‍ജുന്‍ തുടങ്ങിയവര്‍ 70 കോടി മുതല്‍ 85 കോടി വരെയാണ് പ്രതിഫലവമായി വാങ്ങുന്നത്. പ്രഭാസ് ഒരു ചിത്രത്തിനായി നൂറ് കോടി വരെ വാങ്ങുന്നുണ്ട്. അതൊക്കെ വെച്ച് നോക്കുമ്പോള്‍ വളരെ ചെറിയ പ്രതിഫലമാണിത്. എന്നാല്‍ ഹായ് നാനാക്ക് വേണ്ടി ഇരട്ടിയില്‍ അധികമാണ് പ്രതിഫല വര്‍ധിപ്പിച്ചിരിക്കുന്നത്.നിര്‍മാതാവ് തന്നെയാണ് പ്രതിഫലം വര്‍ധിപ്പിക്കുന്ന കാര്യം നാനിയെ അറിയിച്ചതെന്നാണ് റിപ്പോര്‍ട്ട്. 22 കോടിയാണ് താരം പ്രതിഫലമായി വാങ്ങിയിരിക്കുന്നതെന്നാണ് ടൈംസ് ഇന്ത്യ റിപ്പോര്‍ട്ട് ചെയ്യുന്നത്.

നിര്‍മാതാവ് ചിറ്റുരി ശ്രീനു ഹായ് നാനായില്‍ നാനി തന്നെ നായകനാവണമെന്ന നിര്‍ബന്ധത്തിലായിരുന്നു. 25 കോടി വരെ താരത്തിനായി നിര്‍മാതാവ് ഓഫര്‍ ചെയ്തിരുന്നു. ഈ ചിത്രം വമ്പന്‍ വിജയമാവാന്‍ വേണ്ടി നാനി കഠിനമായി പരിശ്രമിക്കുന്നുണ്ട്. അതേസമയം ചിത്രത്തില്‍ സീതാരാമത്തിലൂടെ പ്രശസ്തയായ മൃണാല്‍ താക്കൂറാണ് നായികയാവുന്നത്. മൃണാല്‍ ചിത്രത്തിനായി മൂന്നര കോടി മുതല്‍ നാല് കോടി രൂപ വരെയാണ് പ്രതിഫലമായി ആവശ്യപ്പെട്ടിരിക്കുന്നത്.

നടിയുടെ മാനേജറാണ് ഇതിന് കാരണം. നിര്‍മാതാക്കള്‍ക്കിടയില്‍ നിന്ന് നടിയുടെ മാനേജര്‍ വലിയ വിലപേശല്‍ നടത്തുന്നതായിട്ടാണ് റിപ്പോര്‍ട്ട്. പലരും അതുകൊണ്ട് ഇത്ര വലിയ പ്രതിഫലം നല്‍കാന്‍ മടിക്കുന്നുണ്ട്. അതേസമയം ആര്‍ആര്‍ആറിന്റെ നിര്‍മാതാവായ ഡിവിവി ദാനയ്യയുടെ ഒരു ചിത്രവും അണിയറയില്‍ ഒരുങ്ങുന്നുണ്ട്. വിവേക് ആത്രേയയാണ് ചിത്രം നിര്‍മിക്കുന്നത്. ഈ ചിത്രത്തിനായി പ്രതിഫലം ഇനിയും വര്‍ധിപ്പിക്കാനും സാധ്യതയുണ്ട്.

കാരണം ഇത് ബിഗ് ബജറ്റ് ചിത്രമാണ്. പുതിയ സംവിധായകര്‍ക്കൊപ്പമാണ് നാനി കൂടുതലായും ഇപ്പോള്‍ പ്രവര്‍ത്തിക്കുന്നത്. നേരത്തെ വമ്പന്‍ പ്രതീക്ഷയുമായി എത്തി ദസറ പ്രതീക്ഷിച്ച അത്ര വിജയം നേടിയിരുന്നില്ല. തമിഴ് സംവിധായകനായ സിബി ചക്രവര്‍ത്തിയുടെ ചിത്രത്തിലും നാനിയായിരിക്കും നായകനെന്നാണ് സൂചന. ഈ ചിത്രം ചിറ്റുരി ശ്രീനുവായിരിക്കും നിര്‍മിക്കുക. തമിഴില്‍ ശിവകാര്‍ത്തികേയനെ നായകനാക്കി ഡോണ്‍ എന്ന ചിത്രം ഒരുക്കി വന്‍ വിജയം നേടിയിരുന്നു സിബി ചക്രവര്‍ത്തി.