പുതിയ പദ്ധതികള്‍ വെളിപ്പെടുത്തി രേണു സുധി; ഇനി യാത്ര ഈ വിദേശ രാജ്യത്തേക്ക്

സമൂഹ മാധ്യമങ്ങളില്‍ രേണു സുധിയുടെ റീല്‍സുകള്‍ക്കും ഫോട്ടോ ഷൂട്ടുകള്‍ക്കും ആല്‍ബങ്ങള്‍ക്കും ഇപ്പോള്‍ നിരവധി കാഴ്ചക്കാരുണ്ട്. അന്തരിച്ച ടെലിവിഷന്‍ മിമിക്രി താരം കൊല്ലം സുധിയുടെ ഭാര്യ എന്ന നിലയിലാണ് രേണു ആദ്യം അറിയപ്പെട്ടതെങ്കില്‍ ഇപ്പോള്‍ കൈ നിറയെ ആല്‍ബങ്ങളും ഷോര്‍ട്ട് ഫിലിമുകളുമുള്ള നടി എന്ന നിലയിലാണ് രേണു അറിയപ്പെടുന്നത്.

ഭര്‍ത്താവ് മരിച്ച ശേഷം അഭിനയ രംഗത്തേക്കിറങ്ങിയതിന്റെ പേരില്‍ നിരവധി ആക്ഷേപങ്ങള്‍ രേണു കേട്ടിരുന്നു. കൊല്ലം സുധിയെ വിറ്റ് ജീവിക്കുകയാണെന്ന് വരെ ആരോപണങ്ങള്‍ ഉയര്‍ന്നു. രേണുവിനെ വ്യക്തിപരമായ ആക്ഷേപിച്ചുകൊണ്ടുള്ള കമന്റുകളും നിരവധി പേര്‍ ചൊരിഞ്ഞു. ഗ്ലാമറസായി ചില ഫോട്ടോ ഷൂട്ടുകളില്‍ പ്രത്യക്ഷപ്പെട്ടതോടെ വിമര്‍ശനങ്ങളുടെ മൂര്‍ച്ചയും കൂടി.

എന്നാല്‍ വിമര്‍ശനങ്ങളെയും കളിയാക്കലുകളെയും പൂര്‍ണമായും അവഗണിച്ചാണ് രേണു അഭിനയരംഗത്ത് സജീവമായി നില്‍ക്കുന്നത്. അഭിനയമാണ് തന്റെ ഇഷ്ട മേഖലയെന്നും അതില്‍ ഉറച്ചു നില്‍ക്കുമെന്നും നിരവധി അഭിമുഖങ്ങളിലും രേണു വ്യക്തമാക്കിയിരുന്നു. ഇതോടെ ആദ്യം സോഷ്യല്‍ മീഡിയയില്‍ വിമര്‍ശനങ്ങള്‍ ഉന്നയിച്ചവര്‍ പിന്നീട് പിന്തുണയ്ക്കുന്ന കാഴ്ച്ചയാണ് കണ്ടത്.

അടുത്ത കാലത്തായി രേണു സുധിയുടെ ആല്‍ബങ്ങള്‍ക്കും ഷോര്‍ട്ട് ഫിലിമുകള്‍ക്കും റീല്‍സുകള്‍ക്കും വലിയ പിന്തുണയാണ് ലഭിക്കുന്നത്. രേണു സുധി അഭിനയിച്ച കരിമിഴി കണ്ണാല്‍ എന്ന ആല്‍ബം ദശലക്ഷക്കണക്കിന് ആളുകളാണ് കണ്ടത്. ഇപ്പോഴിതാ സമൂഹ മാധ്യമങ്ങളിലൂടെ ലഭിച്ച താരപൊലിമയിലൂടെ വിദേശ രാജ്യത്തേക്ക് പോകാന്‍ ഒരുങ്ങുകയാണ് രേണു സുധി. ഒരു സ്‌റ്റേജ് ഷോയ്ക്കായി മസ്‌കറ്റിലേക്കാണ് രേണുവും സംഘവും പോകുന്നത്. രേണു തന്നെയാണ് ഇക്കാര്യം ഓണ്‍ലൈന്‍ മാധ്യമങ്ങളോടു വെളിപ്പെടുത്തിയത്.

നൃത്ത പരിപാടിയാണ് രേണു അവതരിപ്പിക്കുന്നത്. അടുത്ത മാസം പതിനൊന്നിന് കൊച്ചിയില്‍ നിന്ന് പോകുമെന്ന് രേണു പറഞ്ഞു. 12 നാണ് മസ്‌കറ്റിലെ പരിപാടി. തന്‍സീര്‍ കൂത്തുപറമ്പ് സംവിധാനം ചെയ്യുന്ന വെബ് സീരിസിലാണ് രേണു ഇപ്പോള്‍ അഭിനയിച്ചത്. സോഷ്യല്‍ മീഡിയയിലെ മറ്റൊരു താരമായ അലിന്‍ ജോസ് പെരേര അടക്കമുള്ളവര്‍ രേണുവിന്റെ സഹ താരങ്ങളായി അഭിനയിച്ചിരുന്നു. നിരവധി ചെറിയ പ്രോജക്ടുകളിലേക്ക് രേണുവിനെ വിളിക്കുന്നുണ്ട്. അടുത്തതായി ഒരു ഇംഗ്ലീഷ് വെബ് സീരിസിലാണ് അഭിനയിക്കാന്‍ ഒരുങ്ങുന്നതെന്ന് ഒരു അഭിമുഖത്തില്‍ രേണു പറഞ്ഞിരുന്നു. ജംഗിള്‍ സ്‌റ്റോറീസ് എന്നാണ് വെബ് സീരിസിന്റെ പേര്.

രേണുവിന്റെ പുതിയ പ്രോജക്റ്റുകള്‍ക്കും സ്‌റ്റേജ് പരിപാടികള്‍ക്കും നിരവധി പേരാണ് ആശംസകള്‍ അറിയിക്കുന്നത്. അടുത്തിടെ ഒരു കട ഉദ്ഘാടനം ചെയ്യാനും രേണുവെത്തിയിരുന്നു. ആദ്യം ലഭിച്ച വിമര്‍ശനങ്ങള്‍ തന്റെ നിലപാടുകളിലൂടെയാണ് രേണു പിന്തുണയായി മാറ്റിയെടുത്തത്.