ഒരു സിനിമ എങ്ങനെ 5 ലക്ഷം ബജറ്റിൽ തീരും; ഇതാണ് ആ ഭീകരമായ രഹസ്യമെന്ന് സന്തോഷ് പണ്ഡിറ്റ്

സന്തോഷ് പണ്ഡിറ്റ് പുതിയ സിനിമ ചെയ്യാൻ പോവുകയാണ്. സോഷ്യൽ മീഡിയയിലൂടെ സന്തോഷ് പണ്ഡിറ്റ് തന്നെയാണ് ഇക്കാര്യം പറഞ്ഞത്. കേരള ലവ് എന്നാണ് സിനിമയുടെ പേര്. സിനിമിയുടെ ചിത്രീകരണം പകുതിയോളം പൂർത്തിയായിക്കഴിഞ്ഞെന്നും രണ്ടാം ഷെഡ്യൂൾ ഉടൻ ആരംഭിക്കുമെന്നും സന്തോഷ് പറഞ്ഞിരുന്നു.

അഞ്ച് ലക്ഷം ആണ് ബജറ്റ് എന്നും സന്തോഷ് പണ്ഡിറ്റ് പറഞ്ഞിരുന്നു. ഇതിന് പിന്നാലെ പലരും പരിഹസിച്ചും എങ്ങനെയാണ് ഈ ബജറ്റിൽ സിനിമ ചെയ്യാൻ പറ്റുമെന്നുമൊക്കെ ചോദിച്ചിരുന്നു. ആ ചോദ്യങ്ങൾക്ക് മറുപടി നൽകുകയാണ് സന്തോഷ് പണ്ഡിറ്റ്.

13 വർഷമായും ഞാൻ ഈ 5 ലക്ഷം ബജറ്റ് കഥ പറയുന്നതിന് പിന്നിൽ ഒരു രഹസ്യം ഉണ്ട്.. അതായത് തൻ്റെ വിമർശകർക്ക് ഐ ക്യൂ വളരേ കുറവാണെന്നും, വിദ്യാഭ്യാസം തീരെ കുറവാണെന്നും താൻ വിശ്വസിക്കുന്നുവെന്നും അതിനാൽ താൻ 5 ലക്ഷം ബജറ്റ് കഥ പറയുമ്പോൾ ഓരോ തവണയും അവർ വേദനിക്കുന്നു, കരയുന്നു, രാത്രിയിലെ ഉറക്കം കളയുന്നുവെന്നും സന്തോഷ് പറയുന്നു. മൂവി സ്ട്രീറ്റ് എന്ന ​ഗ്രൂപ്പിൽ പങ്കുവെച്ച കുറിപ്പിലാണ് ഇക്കാര്യം പറയുന്നത്.

സന്തോഷ് പങ്കുവെച്ച ഫേസ്ബുക്ക് കുറിപ്പ്:

കഴിഞ്ഞ ദിവസം ഞാൻ അഭിനയിക്കുന്ന എൻ്റെ 12 മത്തെ സിനിമ "കേരള ലൈവ്" ൻ്റെ ഷൂട്ടിംഗ് തുടരുന്ന വിവരം അറിയിച്ചു ഇവിടെ പോസ്റ്റ് ഇട്ടിരുന്നല്ലോ.. എന്നാൽ കേരളത്തിന് പുറത്തൊക്കെ പോയി 8 പാട്ടും, 100 + താരങ്ങളും( അതിൽ 8 നായികമാർ..) , നിരവധി സംഘട്ടനങ്ങൾ അടക്കം 3:45 മണിക്കൂർ നീളമുള്ള 150 സീനുകൾ ഉള്ള ഒരു സിനിമ എങ്ങനെ ആണ് 5 ലക്ഷം ബജറ്റിൽ തീരുക എന്നു ചില കൂട്ടുകാർ സംശയം ചോദിച്ചു കമൻ്റ് ഇട്ടിരുന്നു.. എല്ലാവർക്കും കൂടി ഉള്ള ഉത്തരം..

സ്വന്തമായി എഡിറ്റിങ് സംവിധാനം ഉള്ള, ക്യാമറ ഒഴികെ എല്ലാ ജോലികളും ഒറ്റക്കു ചെയ്യുന്ന , താമസം ഭൂരിഭാഗം എൻ്റെ 2 വീടുകളിൽ ഒപ്പിക്കുന്ന, സ്വന്തമായി Panasonic S1 H അടക്കം രണ്ടു ക്യാമറകൾ ഉള്ള, സ്വന്തം ലൈറ്റ് യൂണിറ്റുള്ള, നോർത്ത് ഇന്ത്യയില് ഷൂട്ടിംഗിന് പോകുമ്പോൾ ട്രെയിനിൽ second class യാത്ര നടത്തി നായികയും, അമ്മയും, ഞാനും,ക്യാമറാമാനും മാത്രം പുഷ്പം പോലെ പാട്ടുകൾ ഷൂട്ടിംഗ് ചെയ്യുന്ന, നല്ല കണക്ഷൻസ് വെച്ച് നല്ല പുതു മുഖങ്ങളെയും, ഫ്രീ ആയി ലൊക്കേഷൻ സംഘടിപ്പിക്കുന്ന സന്തോഷ് പണ്ഡിറ്റിന് ഒരു സിനിമയുടെ ഷൂട്ടിംഗിന് 5 ലക്ഷം പോലും വരുന്നില്ല എന്നതാണ് സത്യം.. കൂടെ കള്ള്, കഞ്ചാവ് , എം ഡി എം എ പരിപാടി ഒന്നും ഇല്ല.

എന്നിട്ടും 2011 മുതൽ ഈ 13 വർഷമായും ഞാൻ ഈ 5 ലക്ഷം ബജറ്റ് കഥ പറയുന്നതിന് പിന്നിൽ ഒരു രഹസ്യം ഉണ്ട്.. അതായത് എൻ്റെ വിമർശകർക്ക് IQ (intelligent Quotient) വളരേ കുറവാണെന്നും, വിദ്യാഭ്യാസം തീരെ കുറവാണെന്നും ഞാൻ വിശ്വസിക്കുന്നു.. അതിനാൽ ഞാൻ 5 ലക്ഷം ബജറ്റ് കഥ പറയുമ്പോൾ ഓരോ തവണയും അവർ വേദനിക്കുന്നു, കരയുന്നു, രാത്രിയിലെ ഉറക്കം കളയുന്നു, ചുരുക്കത്തിൽ അവരുടെ തലച്ചോറിൽ ഈ വാക്ക് കേൾക്കുമ്പോൾ ഒരു ഇംപ്രഷൻ വീഴും..

എൻ്റെ എല്ലാ സിനിമയിലും, എല്ലാ അപ്ലോഡ് ചെയ്യുന്ന വീഡിയോയിലും ഈ 5 ലക്ഷം ബജറ്റ് കഥ എഴുതാറുണ്ട്.. ഇത് എൻ്റെ വിഡ്ഢികളായ വിമർശകരുടെ തലച്ചോറിൽ ഇപ്രഷൻ വീഴ്തുകയും, അസൂയ കൂടി ചൊറിഞ്ഞു, ചൊറിഞ്ഞു അവരുടെ രാത്രിയിലെ ഉറക്കം നഷ്ടപെടുത്തുവാനും വേണ്ടി ഞാൻ ബോധപൂർവം ചെയ്യുന്നതാണ്.. ഇത് ഇനി 30 വർഷം കഴിഞ്ഞ് ഞാൻ 100 സിനിമ എടുത്താലും ഇങ്ങനെ തന്നെ പറയും. ഇതാണ് ആ ഭീകരമായ രഹസ്യം.

സ്വയം എന്തോ വലിയ സംഭവമാണെന്ന് വിശ്വസിക്കുന്ന, അഹങ്കരിക്കുന്ന, ഇന്നേവരെ ഒരു സിനിമ പോലും സ്വന്തം പേരിൽ സംവിധാനം ചെയ്യാത്ത , ഒരു സിനിമയിൽ പോലും നായകൻ ആക്കാത്ത വട്ട പൂജ്യമായി സിനിമ സ്വപ്നം കണ്ട് നടക്കുന്ന ചിലരാണ് എന്നെ ഏറ്റവും കൂടുതൽ വിമർശിക്കുന്നത് എന്നാണ് എൻ്റെ ഒബ്സർവേഷൻ. മരിക്കുന്നത് വരെ ഒന്നും ആകുവാൻ സാദ്ധ്യത ഇല്ലാത്ത, പറ്റിക്കുവാൻ നിർമാതാവിനെ കിട്ടുവാൻ തെണ്ടി നടക്കുന്ന എല്ലാവർക്കും ഒരു ചെറിയ പണി കൊടുക്കുകയാണ് ലക്ഷ്യം..

ഇവർക്ക് മറ്റൊരു നിർമാതാവ് എന്തിന് ? പണ്ഡിറ്റ് ചെയ്തത് പോലെ സ്വന്തം വീട് സിനിമ എടുക്കാമല്ലോ.. പക്ഷേ അതു 8 നിലയിൽ പൊട്ടും എന്നു ഉറപ്പുള്ളത് കൊണ്ടാണ് വേറെ നിർമ്മാതാക്കളെ അന്വേഷിച്ചു നടക്കുന്നത്. കാരണം പടം പൊട്ടിയാൽ വേറെ ഒരാൾ ആത്മഹത്യ ചെയ്യുകയോ, കുത്തുപാള എടുക്കുകയോ ചെയ്തോട്ടെ എന്ന ചിന്ത. അതിനാൽ 5 ലക്ഷം ബജറ്റ് കഥ പണ്ഡിറ്റ് ഇനിയും തുടരുമെന്ന് എല്ലാ കൂട്ടുകാരെയും അറിയിക്കുന്നു.. എനിക്കെന്നും ബുദ്ധി കൊണ്ട് കളിക്കുവാൻ ആണ് ഇഷ്ടം..

(വാൽ കഷ്ണം.. 1947 august 15 മുതൽ ഇന്ത്യ രാജ്യം സ്വാതന്ത്ര്യം ആണ്.. ഇവിടെ IPC പ്രകാരം ആർക്കും സിനിമ എടുക്കാം.. ഇത്ര budjet ലിൽ എടുത്തിരിക്കണം എന്നു നിയമമില്ല.. ഞാൻ എനിക്ക് ഇഷ്ടമുള്ള സിനിമ , ഇഷ്ടമുള്ള രീതിയിൽ ഇനിയും എടുക്കും.. ഒരാളെ ഇഷ്ടമല്ലെങ്കിൽ അയാളുടെ ഒരു വീഡിയോയും, പോസ്റ്റുകളും കാണരുത്, അഭിപ്രായം പറയരുത്.. ഇഷ്ടമില്ലാത്തവരെ ignore ചെയ്യുക എന്നതാണ് IQ ഉളളവർ ചെയ്യേണ്ടത്.. ഇതിപ്പോൾ പണ്ഡിറ്റ് 13 വർഷമായി, ഓരോ വർഷവും 250 ഓളം വിവിധ വിഷയങ്ങളിൽ വീഡിയോ ഇടുന്നു.. എൻ്റെ വിമ‍ർശകർ അതെല്ലാം കൃത്യമായി കാണുന്നു.. ഷെയർ ചെയ്യുന്നു.. വിമർശിക്കുന്നു.. best.. all the best)
By Santhosh Pandit (ഉരുക്കെടാ.. പണ്ഡിറ്റിനെ പോലെ ആരുമില്ല)