ഇന്ത്യൻ രാഷ്ട്രപതി പുറത്തിറക്കിയ ഛായാചിത്രം സുഭാഷ് ചന്ദ്രബോസിന്റെയോ പ്രോസെൻജിത്തിന്റെയോ? സത്യാവസ്ഥയെന്ത്..

Published: Monday, January 25, 2021, 17:20 [IST]

ദില്ലി: ഇന്ത്യൻ രാഷ്ട്രപതി രാം നാഥ് കോവിന്ദ് രാഷ്ട്രപതി ഭവനിൽ നേതാജി സുഭാഷ് ചന്ദ്രബോസിന്റെ പോസ്റ്റർ ശനിയാഴ്ച രാഷ്ട്രപതി രാംനാഥ് കോവിന്ദ് പുറത്തിറക്കിയോ? പുറത്തിറക്കിയെന്നാണ് ട്വിറ്ററിൽ പ്രചരിക്കുന്ന വാർത്ത. എന്നാൽ രാംനാഥ് കോവിന്ദ് അനാച്ഛാദനം ചെയ്ത ഛായാചിത്രം പ്രശസ്ത നടൻ പ്രോസെൻജിത് ചാറ്റർജിയുടെതാണെന്ന പേരിലാണ് പ്രചാരണം നടക്കുന്നത്.

ശ്രീജിത് മുഖർജി സംവിധാനം നിർവ്വഹിക്കുന്ന ഗുംനാമി എന്ന ചിത്രത്തിൽ ചാറ്റർജിയാണ് നേതാജി ബോസ് എന്ന കഥാപാത്രത്തെ അവതരിപ്പിച്ചത്. "രാമ ക്ഷേത്രത്തിന് അഞ്ച് ലക്ഷം രൂപ സംഭാവന നൽകിയ ശേഷം രാഷ്ട്രപതി നേതാജിയുടെ ജീവചരിത്രത്തിൽ അഭിനയിച്ച പ്രസൻജിത്തിന്റെ ഛായാചിത്രം അനാച്ഛാദനം ചെയ്തുുവെന്ന് തൃണമൂൽ കോൺഗ്രസ് എംപി മഹുവ മൊയ്‌ത്രയാണ് ട്വീറ്റിൽ കുറിച്ചത്. ഇന്ത്യയെ ദൈവം രക്ഷിക്കും കാരണം ഈ സർക്കാരിന് തീർച്ചയായും അതിന് കഴിയില്ലെന്നും മഹുവ മൊയ്ത്ര കൂട്ടിച്ചേർത്തു.

നേതാജി സുഭാഷ് ചന്ദ്രബോസിന്റെ 125ാം ജന്മദിനം ആചരിക്കുന്നതിന്റെ ഭാഗമായി രാഷ്ട്രപതി ഭവൻ അദ്ദേഹത്തിന്റെ ഛായാ ചിത്രം അനാഛാദനം ചെയ്തെന്നാണ് രാഷ്ട്രപതി ഭവൻ ട്വീറ്റിൽ വ്യക്തമാക്കിയത്. എന്നാൽ പുതിയ വിവാദത്തോട് രാഷ്ട്രപതി ഭവനൻ വിവാദത്തോട് ഇതുവരെ പ്രതികരിച്ചിട്ടില്ലെങ്കിലും ഇത് അനാവശ്യമായ വിവാദമാണ് സൃഷ്ടിക്കുന്നതെന്നാണ് ട്വിറ്റർ ഉപയോക്താക്കളിൽ പലരുടേയും പ്രതികരണം. പരേഷ് മൈറ്റി വരച്ച നേതാജിയുടെ ഛായാചിത്രം അദ്ദേഹത്തിന്റെ യഥാർത്ഥ ഫോട്ടോയെ അടിസ്ഥാനമാക്കിയാണെന്ന് മുതിർന്ന പത്രപ്രവർത്തകൻ നിസ്തുല ഹെബ്ബർ പറഞ്ഞു.

നേതാജിയുടെ കൊച്ചുമകളായ ജയന്തി ബോസ് രക്ഷിൽ നിന്ന് ലഭിച്ച യഥാർത്ഥ ഫോട്ടോയെ ആസ്പദമാക്കി വരച്ചിട്ടുള്ള ഛായാചിത്രമാണ് അനാഛാദനം ചെയ്തിട്ടുള്ളത്. ഇന്ത്യൻ ചിത്രകാരനായ പരേഷ് മൈതിയെ 2014 ൽ രാജ്യം പത്മശ്രീ ആദരിച്ചിരുന്നു. പശ്ചിമ ബംഗാളിലെ തംലൂക്കിൽ ജനിച്ച ഇദ്ദേഹം ചെറിയൊരു കാലയളവിനുള്ളിൽ തന്നെ സമർത്ഥനായ ചിത്രകാരനെന്ന് കഴിവ് തെളിയിച്ച വ്യക്തി കൂടിയാണ്.