അജിത് ഡോവല്‍ പിണറായിയ്ക്ക് നേരെ തൂക്കുചൂണ്ടിയോ? പ്രചരണത്തിന് പിന്നിലെ സത്യമെന്ത്?

ദേശീയ സുരക്ഷ ഉപദേഷ്ടാവായ അജിത് ഡോവല്‍ മുഖ്യമന്ത്രി പിണറായി വിജയനെ തോക്ക് ചൂണ്ടി വിരട്ടി എന്ന കഥയാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചാ വിഷയം. കഴിഞ്ഞ ദിവസം ഗവര്‍ണര്‍ ആരിഫ് മുഹമ്മദ് ഖാന്‍ മാധ്യമങ്ങള്‍ക്ക് മുന്നില്‍ നടത്തിയ പരാമര്‍ശമാണ് ഇത്തരമൊരു കഥ പ്രചരിക്കുന്നതിന് ആധാരമായത്. നേരത്തെയും സോഷ്യല്‍ മീഡിയയില്‍ ഇത് സംബന്ധിച്ച ചില പ്രചരണങ്ങള്‍ ഉണ്ടായിരുന്നു.

ഫേസ്ബുക്കില്‍ ആര്‍ എസ് എസ്, ബി ജെ പി അനുഭാവികളാണ് ഇത്തരമൊരു പ്രചരണം മുന്നോട്ട് കൊണ്ടുപോകുന്നത്. 1971 ലെ തലശ്ശേരി കലാപത്തില്‍ കൊലക്കേസ് പ്രതിയെ പുറത്തിറക്കാന്‍ ചെന്ന പിണറായി വിജയന് നേരെ എ എസ് പി ആയിരുന്ന അജിത് ഡോവല്‍ തോക്ക് ചൂണ്ടി എന്നാണ് പ്രചരണം. എന്താണ് ഇതിന്റെ സത്യാവസ്ഥ എന്താണ് എന്ന് പരിശോധിക്കാം.

1971-ല്‍ തലശ്ശേരിയില്‍ കലാപ സമയത്ത് പിണറായി വിജയന്‍ കൂത്തുപറമ്പില്‍ നിന്നുള്ള എം എ എ ആയിരുന്നു. തലശ്ശേരി കലാപം സംബന്ധിച്ച പുസ്തകങ്ങളിലോ അന്നത്തെ പത്രങ്ങളിലോ ഒന്നും ഈ ഒരു സംഭവത്തെ കുറിച്ച് പറയുന്നില്ല. സോഷ്യല്‍ മീഡിയയില്‍ ചില പോസ്റ്റുകളില്‍ ഇത് പറയുന്നു എന്നല്ലാതെ ആധികാരികമായി ഇക്കാര്യം വേറെ എവിടേയും രേഖപ്പെടുത്തിയിട്ടുമില്ല.

എന്നാല്‍ ഹിന്ദിയില്‍ അടക്കം ഇത് സംബന്ധിച്ച ഫേസ്ബുക്ക് പോസ്റ്റുകള്‍ പ്രചരിക്കുന്നുണ്ട്. നേരത്തെ സ്വര്‍ണ്ണക്കടത്ത് അന്വേഷിക്കാന്‍ അജിത് ഡോവല്‍ എത്തുമെന്ന തരത്തില്‍ പ്രചരിച്ച പോസ്റ്ററുകളിലും ഇക്കാര്യം പ്രതിപാദിക്കുന്നുണ്ട്.

എന്നാല്‍ ആധികാരികമായി ഒരിടത്തും ഇത് പറയുന്നില്ല. അതിനാല്‍ സൈബര്‍ ഇടത്തിലെ രാഷ്ട്രീയ പോരില്‍ ഉപയോഗിച്ച ഒരു കള്ളം മാത്രമാണ് ഇത് എന്ന് പറയേണ്ടി വരും. അജിത് ഡോവല്‍ കണ്ണൂരിലെത്തിയപ്പോഴേക്കും തലശ്ശേരി ശാന്തമായിരുന്നു എന്നാണ് അന്നത്തെ കെ എസ് യു ജില്ലാ സെക്രട്ടറി ഒ വി ജയഫര്‍ സാക്ഷ്യപ്പെടുത്തുന്നത്.

പ്രചരണം സത്യമാണ് എന്ന് തെളിയിക്കുന്ന ഡാറ്റയൊന്നും എവിടേയുമില്ല. അതിനാല്‍ ഇത്തരമൊരു സംഭവം നടന്നിട്ടില്ല എന്നും പ്രചരണം കള്ളമാണ് എന്നുമാണ് അന്വേഷണത്തില്‍ മനസിലാകുന്നത്.

English summary

is that Ajit Doval take gun against Pinarayi vijayan, What is the truth behind it