സാമ്പത്തിക ബുദ്ധിമുട്ടുകള്ക്കിടയിലുംവിജയക്കുതിപ്പ്
സാമ്പത്തികമായി അങ്ങേയറ്റം ബുദ്ധിമുട്ട് നേരിട്ടു കൊണ്ടിരിക്കുമ്പോഴും കെല്ടെകിലെ വിദഗ്ധരായ തൊഴിലാളികളും എഞ്ചിനീയര്മാരും അര്ഹിക്കുന്ന ശമ്പള വര്ദ്ധന പോലും ആവശ്യപ്പെടാതെ രാത്രിയും പകലും ആത്മാര്ത്ഥമായി പ്രവര്ത്തിക്കുന്നതു കൊണ്ടാണ് ഗുണമേന്മ ഒട്ടും നഷ്ടപ്പെടാതെ അതിപ്രധാന ഘടകങ്ങള് ജി എസ് എല് വിയ്ക്കും പി എസ് എല് വിയ്ക്കും പ്രതിരോധ ആവശ്യങ്ങള്ക്കുമുള്ള പദ്ധതികള്ക്കും നിര്മ്മിച്ചു നല്കാന് കെല്ടെകിനു കഴിയുന്നത്. പദ്ധതിയുടെ തുടക്കം മുതല് കഴിഞ്ഞ പത്തു വര്ഷക്കാലം തൊഴിലാളി സമരമോ മറ്റു പ്രശ്നങ്ങളോ മൂലം ഒരു മണിക്കൂര് പോലും ഉത്പാദന സമയം കെല്ടെകിനു നഷ്ടപ്പെട്ടിട്ടില്ലെന്ന് കെല്ടെകിന്റെ പ്രൊജക്ട് മാനേജരായിരുന്ന ഗിരീഷ് ബാബു ഇന്ത്യാഇന്ഫോ മലയാളത്തോട് പറഞ്ഞു.
അത്യാധുനിക സി എന് സി മെഷീനിംഗ്, കണ്വെന്ഷനല് മെഷീനിംഗ്, ഓട്ടോ ടിഗ് വെല്ഡിംഗ്, ഇലക്ട്രോണ് ബീം വെല്ഡിംഗ്, വാക്വം ബ്രേസിംഗ്, മെറ്റല് ഫോര്മിംഗ്, ഹീറ്റ് ട്രീറ്റ്മെന്റ്, മെട്രോളജി എന്നീ പ്രവര്ത്തനങ്ങളെല്ലാം ഒരേ മേല്ക്കൂരയില് സമന്വയിപ്പിച്ചതാണ് കെല്ടെകിന്റെ വിജയം. ഐ എസ് ആര് ഒ തിരുവനന്തപുരം യൂണിറ്റിലെ പ്രധാന കേന്ദ്രങ്ങളുടെ തൊട്ടടുത്തായതിനാല് ശാസ്ത്രജ്ഞരുടെ തുടര്ച്ചായായ മേല്നോട്ടം ഉത്പാദനത്തിന്റെ ഓരോ ഘട്ടത്തിലും ലഭിക്കുന്നു.
ജി എസ് എല് വി യെ മുകളിലേയ്ക്ക് ഉയര്ത്തുന്ന വികാസ് ദ്രവ റോക്കറ്റ് എഞ്ചിനും അതിസങ്കീര്ണ്ണമായ ഇന്ധന ടാങ്കുകളും വികസിപ്പിച്ചെടുക്കാന് കെല്ടെകിന് വെളിയില് നിന്ന് സാങ്കേതിക സഹായം പ്രയോജനപ്പെടുത്തേണ്ടി വന്നിട്ടില്ലെന്നത് സുപ്രധാനമായ ഒരു നേട്ടമാണ്. പദ്ധതിയുടെ സൂത്രധാരനായ സുധാകറിന്റെയും മറ്റ് എഞ്ചിനീയര്മാരുടെയും അഭിമാനകരമായ നേട്ടമാണ് ഇവയെല്ലാം.
3