ആയുര്‍വേദത്തെ ദുരുപയോഗം ചെയ്യുന്നു

ആയുര്‍വേദത്തെ ദുരുപയോഗം ചെയ്യുന്നു

ചില ആയുര്‍വേദ-മസാജ് പാര്‍ലറുകള്‍ കേന്ദ്രീകരിച്ച് അനാശാസ്യ പ്രവര്‍ത്തനങ്ങള്‍ നടന്നു വരുന്നതായി നാട്ടുകാരും ആരോപിക്കുന്നു. വിനോദസഞ്ചാരത്തെ പ്രോത്സാഹിപ്പിക്കാന്‍ ആയുര്‍വേദത്തെ ദുരുപയോഗം ചെയ്യുന്ന പ്രവണതയോടെ പാരമ്പരാഗത രീതിയില്‍ ആയുര്‍വേദ പരിശീലനം നേടി ചികിത്സ നടത്തുന്നവര്‍ക്കും കടുത്ത എതിര്‍പ്പാണുള്ളത്. ഒരാഴ്ച കൊണ്ടോ ഒരു മാസം കൊണ്ടോ ധൃതി പിടിച്ച് ആയുര്‍വേദ ചികിത്സ നടത്തുന്ന രീതി ശരിയല്ലെന്ന് പ്രമുഖ ആയുര്‍വേദ ചികിത്സകര്‍ ചൂണ്ടിക്കാട്ടുന്നു.

ഒരു തവണ മസാജ് പാര്‍ലറുകളില്‍ പുനരുജ്ജീവന ചികിത്സയ്ക്കു വിധേയമാകുന്ന ഒരു വിദേശവിനോദ സഞ്ചാരിയും രണ്ടാമതൊരിക്കല്‍ കൂടി ഇതിനു തയ്യാറാവാത്ത വിധം ഭീകരമാണ് ഇത്തരം അനധികൃത കേന്ദ്രങ്ങളിലെ ചികിത്സാരീതികളെന്ന് ചൂണ്ടിക്കാണിക്കപ്പെടുന്നു. എല്ലാ വിധ ആയുര്‍വേദ ചികിത്സാവിധികള്‍ക്കും ശരിയായ വിശ്രമം, സൂര്യപ്രകാശം ഏല്‍ക്കാതിരിക്കല്‍, ചില ഭക്ഷണ-പാനീയങ്ങള്‍ ഒഴിവാക്കല്‍ തുടങ്ങിയ കാര്യങ്ങള്‍ ശ്രദ്ധിയ്ക്കേണ്ടതുണ്ട്. എന്നാല്‍, മസാജ് പാര്‍ലറുകളില്‍ ചികിത്സ നടത്തുന്ന വിനോദസഞ്ചാരികള്‍ സണ്‍-ബാത്തിനിറങ്ങുന്നതും കടലില്‍ കുളിയ്ക്കാനിറങ്ങുന്നതും മറ്റും വിനയാകുകയേയുള്ളൂ. അതൊന്നും ചെയ്യാനാവില്ലെന്ന് വിനോദസഞ്ചാരികളെ ആയുര്‍വേദ ചികിത്സകരെന്ന് നടിയ്ക്കുന്നവര്‍ പറഞ്ഞു മനസിലാക്കുന്നതുമില്ല.

എന്നാല്‍, വിനോദസഞ്ചാരികള്‍ക്കുള്ള ആയുര്‍വേദ ചികിത്സ ഗുണകരമാക്കാന്‍ വേണ്ട മുന്‍കരുതലുകളെടുക്കുന്നുണ്ടെന്ന് സംസ്ഥാന ടൂറിസം വകുപ്പ് അധികൃതര്‍ അവകാശപ്പെടുന്നു. ഇതിന്റെ ഭാഗമായി ആയുര്‍വേദ കേന്ദ്രങ്ങള്‍ക്ക് അക്രഡിറ്റേഷന്‍ സമ്പ്രദായം ഏര്‍പ്പെടുത്തിയിട്ടുണ്ടെന്നും , ഇന്ത്യന്‍ സിസ്റ്റംസ് ഓഫ് മെഡിസിന്‍ കേന്ദ്രം ഡയറക്ടര്‍ തലവനായുള്ള കമ്മിറ്റിയാണ് ഈ അംഗീകാരം നല്‍കുന്നതെന്നും കേരള ടൂറിസം വകുപ്പ് സെക്രട്ടറി അമിതാഭ് കാന്ത് പറഞ്ഞു.

2