കൊണ്ടോട്ടിയില്‍ തിളച്ചത് 'സാമ്പാര്‍'.... എന്താണ് സാമ്പാര്‍ മുന്നണി?

സാമ്പാര്‍ മുന്നണി എന്ന് മുസ്ലീം ലീഗുകാര്‍ പരിഹസിച്ചുകൊണ്ട് വിളിച്ചതാണ്. എന്നാല്‍ തിരഞ്ഞെടുപ്പ് ഫലം വന്നപ്പോള്‍ നന്നായി തിളച്ച് പാകമായത് ആ സാമ്പാര്‍ മുന്നണി തന്നെ ആയിരുന്നു.

ലീഗിന്റെ ശക്തി കേന്ദ്രങ്ങളായ കൊണ്ടോട്ടി, പരപ്പനങ്ങാടി നഗരസഭകളിലും, വാഴക്കാട്, ചേലേമ്പ്ര, മാറാക്കര, കണ്ണമംഗലം, വേങ്ങര, നന്നമ്പ്ര, തെന്നല തുടങ്ങിയ ഗ്രാമപ്പഞ്ചായത്തുകളിലും ആയിരുന്നു 'സാമ്പാര്‍' മുന്നണി മത്സരിച്ചിരുന്നത്. ഇതില്‍ പാതിയിലധികവും അവര്‍ സ്വന്തമാക്കുകയും ചെയ്തു.

സിപിഎം, കോണ്‍ഗ്രസ്, സിപിഐ, എസ്ഡിപിഐ, ഐഎന്‍എല്‍, പിഡിപി, വെല്‍ഫെയര്‍ പാര്‍ട്ടി തുടങ്ങിയവയുടെ കൂട്ടായ്മയെ ആണ് മുസ്ലീം ലീഗ് 'സാമ്പാര്‍ മുന്നണി' എന്ന് പരിഹസിച്ചത്. മുസ്ലീം ലീഗിനെതിരെയുള്ള കൂട്ടായ്മ എന്ന രീതിയിലാണ് മറ്റ് പാര്‍ട്ടികള്‍ ഒരുമിച്ചത്.

സീറ്റ് വിഭജനത്തിലെ പ്രശ്‌നങ്ങളാണ് പലയിടത്തും കോണ്‍ഗ്രസ്സിനെ ചൊടിപ്പിച്ചത്. ഒത്തുതീര്‍പ്പിന് ലീഗ് തയ്യാറാകാതെ വന്നതോടെയാണ് പലയിടത്തും നേര്‍ക്കുനേര്‍ മത്സരങ്ങള്‍ അരങ്ങേറിയത്.

സിപിഎം ആയാലും കോണ്‍ഗ്രസ്സ് ആയാലും സ്വന്തം ചിഹ്നങ്ങളില്‍ മത്സരിയ്ക്കാന്‍ തയ്യാറായിരുന്നില്ല. സ്വതന്ത്ര സ്ഥാനാര്‍ത്ഥികളായാണ് മിക്കവരും മത്സരിച്ചത്.

ലീഗിന്റെ എക്കാലത്തേയും വലിയ ശക്തി കേന്ദ്രമായ കൊണ്ടോട്ടി പോലും ഇത്തവണ മറിഞ്ഞു എന്നതാണ് ശ്രദ്ധേയം. പരപ്പനങ്ങാടി നഗരസഭയിലും 'സാമ്പാര്‍ മുന്നണി' തന്നെ ഭരിയ്ക്കും. വാഴക്കാട്, ചേലേമ്പ്ര, മാറാക്കര പഞ്ചായത്തുകളും ലീഗിന് നഷ്ടമായി.

English summary

Panchayath Election Result: Muslim League faced major set back in Malappuram. LDF makes good progress.