നഷ്ടപ്പെടുവാനുളളതല്ല, രവീന്ദ്രന് പട്ടയങ്ങള്.
ആര്പ്പുവിളിയും ആരവങ്ങളും നിലച്ചു. ഇന്നലെ വരെ നെറ്റിപ്പട്ടം കെട്ടിയ ഗജവീരന്മാരുടെ തലയെടുപ്പുണ്ടായിരുന്നവര്ക്ക് ഇന്ന് പെരുവഴിയില് ഉടുമുണ്ടഴിഞ്ഞ ജാള്യം. വിഎസ് അച്യുതാനന്ദന്റെ ആദര്ശ പരിവേഷത്തില് അവസാന ആണിയും അടിച്ചു കയറ്റി സിപിഐ ചിരിക്കുന്നു. രവീന്ദ്രന് പട്ടയം സാധുവായി പ്രഖ്യാപിക്കാന് സര്ക്കാരിനോട് ആവശ്യപ്പെട്ട ഇടതു മുന്നണി യോഗത്തില് അധ്യക്ഷന് സാക്ഷാല് സഖാവ് വി എസ് അച്യുതാനന്ദന്.
കെ സുരേഷ് കുമാറിന്റെ നേതൃത്വത്തില് ദൗത്യസംഘം മൂന്നാറിലെത്തിയതു മുതല് കേരളം ആവേശത്തിമിര്പ്പിലായിരുന്നു. കയ്യേറ്റക്കാരുടെയും റിസോര്ട്ട് മാഫിയയുടെയും കൂട്ടിക്കൊടുപ്പുകാരുടെ വേഷമാണ് മൂന്നാറിലെ പുതിയ രാഷ്ട്രീയ നേതൃത്വത്തിനെന്ന് കേരളം തിരിച്ചറിഞ്ഞതും ദൗത്യസംഘം എത്തിയതോടെയാണ്.
വ്യാജപട്ടയങ്ങള്ക്ക് മേല് കെട്ടിപ്പൊക്കിയ റിസോര്ട്ടുകളിലിരുന്ന് മൂന്നാര് രാഷ്ട്രീയത്തിന്റെ ചരടു വലിക്കുന്നതാരൊക്കെയെന്ന് കേരളം അറിഞ്ഞു. ആ ചരടിന്റെ അറ്റത്തു കെട്ടിയ പാവകളായി, ആദര്ശരാഷ്ട്രീയത്തിന്റെ കുഞ്ചിരോമങ്ങളിളക്കി ചാടിക്കളിക്കുന്ന വിപ്ലവസിംഹവാലന്മാരെക്കണ്ട് സമൂഹം പൊട്ടിച്ചിരിച്ചു. ഈ സര്ക്കാര് അധികാരത്തില് വന്നിട്ടാദ്യമായി കോടതിയുടെ സര്വ പിന്തുണയും കിട്ടുന്ന ഓപ്പറേഷനായി മൂന്നാറിലേത്.