ഗര്ഭിണികള്ക്ക് 2 മണിക്കൂര് ജോലി സമയം കുറച്ചു; അംഗപരിമിതര്ക്കും ഇളവ്, അജ്മാനില് പുതിയ നിയമം
അജ്മാൻ സർക്കാർ വകുപ്പുകളിൽ ലീവുകൾ, ജീവനക്കാർക്ക് മെച്ചപ്പെട്ട ആനുകൂല്യങ്ങൾ, കുറഞ്ഞ പ്രവൃത്തി സമയം എന്നിവ ഉൾക്കൊള്ളുന്ന സുപ്രധാനമായ ഒരു പുതിയ നിയമം പ്രഖ്യാപിച്ചു. അജ്മാൻ ഭരണാധികാരി ഷെയ്ഖ് ഹുമൈദ് ബിൻ റാഷിദ് അൽ നുഐമിയുടെ ഉത്തരവനുസരിച്ച് ഇന്ന് പുറത്തിറക്കിയ ഈ ഭേദഗതി, 2026 സെപ്റ്റംബർ 1 മുതൽ പ്രാബല്യത്തിൽ വരും.
കുടുംബ പരിചരണം, സ്വയംതൊഴിൽ/സംരംഭകത്വം, ഭിന്നശേഷിക്കാർക്കുള്ള പ്രത്യേക അവധികൾ, കൂടാതെ വിവാഹ അവധി എന്നിവ ഈ പുതിയ നിയമത്തിലെ പ്രധാന അവധികളിൽപ്പെടുന്നു. ഭിന്നശേഷിക്കാരായ ജീവനക്കാർക്ക് ദിവസേന 2 മണിക്കൂറും, ക്ഷീണമുള്ള ഗർഭിണികൾക്ക് (അംഗീകൃത മെഡിക്കൽ റിപ്പോർട്ടിന്റെ അടിസ്ഥാനത്തിൽ) ദിവസേന 2 മണിക്കൂറും പ്രവൃത്തി സമയത്തിൽ ഇളവ് ലഭിക്കും.
18 വയസ്സിൽ താഴെയുള്ള അഞ്ചോ അതിലധികമോ കുട്ടികളെ പരിപാലിക്കുന്ന ജീവനക്കാർക്ക് പ്രതിദിനം ഒരു മണിക്കൂറിന്റെ കുറവ് ലഭിക്കും. ഈ വ്യവസ്ഥകൾ അജ്മാനിലെ എല്ലാ സിവിൽ സർക്കാർ ജീവനക്കാർക്കും ബാധകമാണ്. കൂടാതെ, തൊഴിൽ കാര്യങ്ങളെക്കുറിച്ച് പ്രത്യേക വ്യവസ്ഥകളില്ലാത്ത സന്ദർഭങ്ങളിൽ ഉന്നത ഉദ്യോഗസ്ഥർക്കും ഇത് ബാധകമാകും.
സർക്കാരിന്റെ പ്രവർത്തനക്ഷമത വർദ്ധിപ്പിക്കാനും കഴിവ്, യോഗ്യത, സുസ്ഥിരത എന്നിവയിൽ അധിഷ്ഠിതമായ ഒരു തൊഴിൽ അന്തരീക്ഷം വളർത്താനും ഈ നിയമം ലക്ഷ്യമിടുന്നു. അസാധാരണ കഴിവുള്ളവർക്കും മികച്ച പ്രകടനം കാഴ്ചവയ്ക്കുന്നവർക്കും മൂന്ന് തസ്തിക വരെ സ്ഥാനക്കയറ്റം ലഭിക്കാം. എമിറാത്തി ജീവനക്കാർക്കായി പുതിയ 'മികച്ച സേവനത്തിനുള്ള അവാർഡും' നിയമം വ്യവസ്ഥ ചെയ്യുന്നു.
കുടുംബ ഭദ്രതയ്ക്കും സമൂഹവികസനത്തിൽ കുടുംബത്തിന്റെ നിർണായക പങ്കിനും ഊന്നൽ നൽകുന്ന 'കുടുംബ വർഷം' എന്ന പദ്ധതിയുടെ ഭാഗം കൂടിയാണ് പുതിയ നിയമം. മാനവ വിഭവശേഷി നിയമനിർമ്മാണങ്ങൾ അവലോകനം ചെയ്യുക, അവയുടെ ഫലപ്രാപ്തി വിലയിരുത്തുക, നയങ്ങൾ നടപ്പാക്കുന്നത് നിരീക്ഷിക്കുക, സാങ്കേതിക സഹായം നൽകുക എന്നിവ അജ്മാൻ സർക്കാർ മാനവ വിഭവശേഷി വകുപ്പിന്റെ പ്രധാന ഉത്തരവാദിത്തങ്ങളാണ്.
Click it and Unblock the Notifications
Sign in with Google