ഇൻഫ്ലുവൻസർമാർക്ക് താക്കീതുമായി ദുബായ് പോലീസ്; വ്യാജ ഉൽപ്പന്നങ്ങൾ പ്രമോട്ട് ചെയ്താൽ ജയിൽ ശിക്ഷ!

സോഷ്യൽ മീഡിയ പ്ലാറ്റ്‌ഫോമുകൾ വഴി വ്യാജ ഉൽപ്പന്നങ്ങൾ വിൽക്കുന്നതിനും പരസ്യം ചെയ്യുന്നതിനുമെതിരെ കർശന മുന്നറിയിപ്പുമായി ദുബായ് പോലീസ്. ഇൻസ്റ്റാഗ്രാം, ഫേസ്ബുക്ക്, ടിക് ടോക് തുടങ്ങിയ മാധ്യമങ്ങളിലൂടെ വ്യാജ ബ്രാൻഡുകളുടെ ഉൽപ്പന്നങ്ങൾ പ്രൊമോട്ട് ചെയ്യുന്നത് ഗുരുതരമായ നിയമലംഘനമാണെന്നും ഇത് കടുത്ത നിയമനടപടികളിലേക്ക് നയിക്കുമെന്നും അധികൃതർ വ്യക്തമാക്കി.

യുവാക്കൾ, സോഷ്യൽ മീഡിയ ഇൻഫ്ലുവൻസർമാർ, ബിസിനസ് അക്കൗണ്ട് ഉടമകൾ എന്നിവർ അപരിചിതരിൽ നിന്നോ വ്യാജ സ്ഥാപനങ്ങളിൽ നിന്നോ എത്തുന്ന പരസ്യ ഓഫറുകളിൽ വീഴരുതെന്ന് ദുബായ് ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷന് കീഴിലുള്ള ആന്റി-ഇക്കണോമിക് ക്രൈംസ് ഡിപ്പാർട്ട്മെന്റ് മുന്നറിയിപ്പ് നൽകി. ഇ-മാർക്കറ്റിംഗ് എന്ന വ്യാജേനയുള്ള ഇത്തരം നിയമവിരുദ്ധ പ്രവർത്തനങ്ങളിൽ പെട്ടുപോകരുതെന്നാണ് നിർദ്ദേശം.

നിയമം അറിയില്ലെന്നത് ശിക്ഷയിൽ നിന്ന് ഒഴിവാക്കാനുള്ള കാരണമല്ല

പല യുവാക്കളും ഇൻഫ്ലുവൻസർമാരും വ്യാജ വാച്ചുകൾ, പെർഫ്യൂമുകൾ, വസ്ത്രങ്ങൾ, മറ്റ് ആക്സസറികൾ എന്നിവ സോഷ്യൽ മീഡിയയിലൂടെ പ്രൊമോട്ട് ചെയ്യുന്നത് ഒരു ലളിതമായ പാർട്ട് ടൈം ജോലിയായോ അധിക വരുമാനത്തിനുള്ള മാർഗ്ഗമായോ ആണ് കാണുന്നത്. എന്നാൽ ഇത് യുഎഇയിലെ ബൗദ്ധിക സ്വത്ത് അവകാശ നിയമങ്ങളുടെയും ട്രേഡ്മാർക്ക് നിയമങ്ങളുടെയും ലംഘനമാണെന്ന് ആന്റി-ഇക്കണോമിക് ക്രൈംസ് ഡിപ്പാർട്ട്മെന്റ് ഡയറക്ടർ മേജർ ഒമർ ഹസ്സൻ നാസർ ചൂണ്ടിക്കാട്ടി.

വ്യാജ അക്കൗണ്ടുകൾ നടത്തുന്ന തട്ടിപ്പുകാർ എളുപ്പത്തിൽ പണമുണ്ടാക്കാൻ ആഗ്രഹിക്കുന്ന യുവാക്കളെയാണ് ലക്ഷ്യമിടുന്നത്. ഉൽപ്പന്നത്തിന്റെ യഥാർത്ഥ ഉറവിടം അറിയാതെ പരസ്യം ചെയ്താൽ പോലും നിയമനടപടികളിൽ നിന്ന് രക്ഷപ്പെടാൻ കഴിയില്ല. "നിയമത്തെക്കുറിച്ചുള്ള അറിവില്ലായ്മ ഒരാളെയും ശിക്ഷാർഹമായ ബാധ്യതകളിൽ നിന്ന് ഒഴിവാക്കുന്നില്ല," അദ്ദേഹം വ്യക്തമാക്കി.

സുരക്ഷിതമായിരിക്കാൻ കച്ചവടക്കാരും ഇൻഫ്ലുവൻസർമാരും ചെയ്യേണ്ടത്

ഉറവിടം പരിശോധിക്കുക: സോഷ്യൽ മീഡിയ വഴി ഒരു ഉൽപ്പന്നം പരസ്യം ചെയ്യുന്നതിനോ വിൽക്കുന്നതിനോ മുൻപ് അത് യഥാർത്ഥ ബ്രാൻഡിന്റേതാണെന്ന് ഉറപ്പുവരുത്തുക.

അപരിചിതരായ വിതരണക്കാരെ ഒഴിവാക്കുക: വിശ്വസനീയമല്ലാത്തതോ കൃത്യമായ വിവരങ്ങൾ ഇല്ലാത്തതോ ആയ വിതരണക്കാരുമായി ബിസിനസ് ഇടപാടുകൾ നടത്തരുത്.

രേഖകൾ സൂക്ഷിക്കുക: വിൽക്കുന്ന ഉൽപ്പന്നങ്ങൾക്ക് കൃത്യമായ നിയമപരമായ ലൈസൻസുകളും ഒറിജിനൽ ഇൻവോയ്‌സുകളും ഉണ്ടായിരിക്കണം.

വ്യാജ ഉൽപ്പന്നങ്ങളുടെ വിപണനം അത്തരം സാധനങ്ങൾ വാങ്ങുന്ന ഉപഭോക്താക്കളെ വഞ്ചിക്കുന്നതിന് തുല്യമാണ്. മാത്രമല്ല ഇത് വിപണിയുടെ സുതാര്യത തകർക്കുകയും രാജ്യത്തിന്റെ സമ്പദ്‌വ്യവസ്ഥയെ ദോഷകരമായി ബാധിക്കുകയും ചെയ്യും. ഉപഭോക്താക്കൾക്കും ബ്രാൻഡുകളുടെ യഥാർത്ഥ ഉടമകൾക്കും കൃത്യമായ സംരക്ഷണം ഉറപ്പാക്കാൻ യുഎഇയിൽ കർശനമായ നിയമസംവിധാനമാണ് നിലവിലുള്ളതെന്നും ദുബായ് പോലീസ് ഓർമ്മിപ്പിച്ചു.

യുഎഇയിൽ സോഷ്യൽ മീഡിയ വഴി വരുമാനമുണ്ടാക്കാൻ ശ്രമിക്കുന്ന ഇൻഫ്ലുവൻസർമാരും ഓൺലൈൻ ബിസിനസുകാരും ദുബായ് പോലീസിന്റെ ഈ മുന്നറിയിപ്പ് ഗൗരവമായി കാണേണ്ടതുണ്ട്. വൻകിട ബ്രാൻഡുകളുടെ വ്യാജ പതിപ്പുകൾ കുറഞ്ഞ വിലയ്ക്ക് വിൽക്കാൻ സഹായിക്കുന്നത് വഴി വലിയ നിയമക്കുരുക്കുകളിലേക്കാവും ഇവർ ചെന്നെത്തുക. ബിസിനസ്സ് ആവശ്യങ്ങൾക്കായി ഉൽപ്പന്നങ്ങൾ തിരഞ്ഞെടുക്കുമ്പോൾ ജാഗ്രത പാലിക്കുക എന്നതാണ് നിയമനടപടികളിൽ നിന്ന് രക്ഷപ്പെടാനുള്ള ഒരേയൊരു മാർഗ്ഗം.