പ്രവാസികൾക്ക് വൻ ആശ്വാസം! തിങ്കളാഴ്ച ദുബായിൽ പാർക്കിംഗ് ഫ്രീ; പക്ഷേ ഈ ഒരൊറ്റ സ്ഥലത്ത് കാശ് കൊടുക്കണം

ഹിജ്‌റ പുതുവത്സര പൊതുഅവധിയോട് അനുബന്ധിച്ച് ജൂൺ 15 തിങ്കളാഴ്ച ദുബായിലെ പൊതു പാർക്കിംഗ് കേന്ദ്രങ്ങൾ പൂർണ്ണമായും സൗജന്യമായിരിക്കുമെന്ന് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി ഔദ്യോഗികമായി അറിയിച്ചു. ശനിയാഴ്ചയാണ് ആർടിഎ ഇത് സംബന്ധിച്ച പ്രഖ്യാപനം നടത്തിയത്. അവധിക്ക് ശേഷം ജൂൺ 16 ചൊവ്വാഴ്ച മുതൽ സാധാരണ നിലയിലുള്ള പാർക്കിംഗ് നിരക്കുകൾ പുനരാരംഭിക്കും. ദുബായിലെ പ്രവാസികൾക്കും സ്വദേശികൾക്കും വലിയ ആശ്വാസം നൽകുന്നതാണ് ഈ പ്രഖ്യാപനം. എന്നാൽ ഈ പാർക്കിംഗ് ഇളവുകൾ നൽകുമ്പോഴും ചില പ്രധാന നിയന്ത്രണങ്ങളും യാത്രാ ഷെഡ്യൂളുകളിൽ മാറ്റങ്ങളും അതോറിറ്റി വരുത്തിയിട്ടുണ്ട്.

മൾട്ടി സ്റ്റോറി പാർക്കിംഗുകൾക്ക് ഇളവില്ല

ദുബായിലെ തെരുവുകളിലുള്ള സാധാരണ പൊതു പാർക്കിംഗ് കേന്ദ്രങ്ങൾക്കെല്ലാം ഈ സൗജന്യം ബാധകമാണെങ്കിലും, ആർടിഎയുടെ കീഴിലുള്ള മൾട്ടി-സ്റ്റോറി പാർക്കിംഗ് സൗകര്യങ്ങൾക്ക് ഈ ഇളവ് ലഭിക്കില്ല. ഇവിടെ പാർക്ക് ചെയ്യുന്ന വാഹനങ്ങൾക്ക് സാധാരണ നിലയിലുള്ള നിരക്കുകൾ തന്നെ നൽകേണ്ടി വരും.

ദുബായ് മെട്രോ, ട്രാം സമയക്രമം

അവധിക്കാലത്തെ യാത്രക്കാരുടെ തിരക്ക് നിയന്ത്രിക്കുന്നതിനായി ദുബായ് മെട്രോയുടെയും ട്രാമിന്റെയും പ്രവർത്തന സമയത്തിൽ മാറ്റം വരുത്തിയിട്ടുണ്ട്.

ദുബായ് മെട്രോ: മെട്രോയുടെ റെഡ്, ഗ്രീൻ ലൈനുകൾ ജൂൺ 15 തിങ്കളാഴ്ച രാവിലെ 5:00 മണി മുതൽ അർദ്ധരാത്രി 12:00 മണി വരെ തുടർച്ചയായി സർവീസ് നടത്തും.

ദുബായ് ട്രാം: ട്രാമിന്റെ സർവീസ് തിങ്കളാഴ്ച രാവിലെ 5:00 മണിക്ക് ആരംഭിച്ച് പിറ്റേന്ന് പുലർച്ചെ 1:00 മണി വരെ നീളും.

ആർടിഎ ബസ്, മെറൈൻ ട്രാൻസ്‌പോർട്ട് മാറ്റങ്ങൾ

പൊതുഅവധിയോടനുബന്ധിച്ച് ആർടിഎ ബസ് ഷെഡ്യൂളുകളിലും ചില താല്ക്കാലിക മാറ്റങ്ങൾ ഉണ്ട്. പ്രധാനമായും ദുബായിൽ നിന്ന് അബുദാബിയിലേക്ക് സർവീസ് നടത്തുന്ന E100 ബസ് റൂട്ട് ജൂൺ 13 ശനിയാഴ്ച മുതൽ ജൂൺ 15 തിങ്കളാഴ്ച വരെ അൽ ഗുബൈബ ബസ് സ്റ്റേഷനിൽ നിന്ന് സർവീസ് നടത്തില്ല. ഈ ദിവസങ്ങളിൽ അബുദാബിയിലേക്ക് പോകേണ്ട യാത്രക്കാർ ഇബ്ൻ ബത്തൂത്ത ബസ് സ്റ്റേഷനിൽ നിന്നുള്ള E101 റൂട്ട് ബസുകൾ ഉപയോഗിക്കേണ്ടതാണ്. അവധി ദിവസങ്ങളിലെ കൃത്യമായ ബസ് സമയവിവരങ്ങൾ അറിയാൻ യാത്രക്കാർ 'എസ് ഹെയ്ൽ' (S'hail) ആപ്പ് പരിശോധിക്കണമെന്ന് ആർടിഎ നിർദ്ദേശിച്ചു. ജലഗതാഗത സർവീസുകളുടെ പുതുക്കിയ സമയക്രമം ആർടിഎയുടെ ഔദ്യോഗിക ചാനലുകൾ വഴി ലഭ്യമാണ്.

ജൂൺ 15 തിങ്കളാഴ്ച ദുബായിലെ എല്ലാ ആർടിഎ കസ്റ്റമർ ഹാപ്പിനസ് സെന്ററുകളും അടഞ്ഞുകിടക്കും. എന്നാൽ ഉം റമൂലിലെ കസ്റ്റമർ ഹാപ്പിനസ് സെന്ററും, ഒപ്പം ദേര, അൽ ബർഷ, അൽ തവാർ, അൽ കിഫാഫ്, ആർടിഎ ഹെഡ്ക്വാർട്ടേഴ്‌സ് എന്നിവിടങ്ങളിലെ സ്മാർട്ട് കിയോസ്കുകളും പതിവുപോലെ 24 മണിക്കൂറും പ്രവർത്തിക്കും. വാഹന പരിശോധന നടത്തുന്ന എല്ലാ സർവീസ് പ്രൊവൈഡർ സെന്ററുകളും തിങ്കളാഴ്ച പ്രവർത്തിക്കില്ല. ഇവയെല്ലാം ജൂൺ 16 ചൊവ്വാഴ്ച മുതൽ സാധാരണ രീതിയിൽ പ്രവർത്തിച്ചുതുടങ്ങും.

ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ
റിസോഴ്‌സും, മന്ത്രാലയവും സംയുക്തമായി പ്രഖ്യാപിച്ചതുപ്രകാരം ജൂൺ 15 തിങ്കളാഴ്ച യുഎഇയിലെ എല്ലാ സർക്കാർ ഓഫീസുകൾക്കും സ്വകാര്യ കമ്പനികൾക്കും സ്കൂളുകൾക്കും സർവ്വകലാശാലകൾക്കും ഹിജ്‌റ പുതുവത്സരത്തോടനുബന്ധിച്ച് ഔദ്യോഗിക അവധിയായിരിക്കും. ഇസ്ലാമിക ചാന്ദ്ര കലണ്ടറിന്റെ അടിസ്ഥാനത്തിൽ മുഹറം മാസത്തിലെ ഒന്നാം തീയതിയാണ് ഹിജ്‌റ പുതുവത്സരമായി ആചരിക്കുന്നത്. ഔദ്യോഗിക ചന്ദ്രദർശനത്തിന്റെ അടിസ്ഥാനത്തിലാണ് അവധി തീയതികൾ നിശ്ചയിച്ചിരിക്കുന്നത്.