കുത്തനെ ഇടിഞ്ഞ് വിമാന ടിക്കറ്റ് നിരക്ക്: 4000 രൂപക്ക് ദുബായില്‍ നിന്നും നാട്ടിലെത്താം; പക്ഷെ യാത്രക്ക് ആളില്ല

സമ്മർ വേക്കെഷന്‍ കഴിഞ്ഞതോടെ യു എ ഇ വിമാന ടിക്കറ്റ് നിരക്കുകള്‍ കുത്തനെ ഇടിഞ്ഞു. ഇന്ത്യയുടെ വിവിധ ഭാഗങ്ങളിലേക്കുള്ള ടിക്കറ്റ് ശരാശരി 220 ദിർഹത്തിന് വരെ ലഭിക്കുന്നുണ്ടെന്നാണ് ഗള്‍ഫ് ന്യൂസ് റിപ്പോർട്ട് ചെയ്യുന്നത്. ഏറ്റവും കൂടുതല്‍ യാത്രക്കാരുള്ള കേരളത്തിലെ 155 ദിർഹത്തിന് വരെ ടിക്കറ്റ് ലഭിക്കുന്ന അവസരങ്ങള്‍ ഉണ്ടായിട്ടുണ്ടെന്നും റിപ്പോർട്ടില്‍ പറയുന്നു. അതായത് ജി എസ് ടി അടക്കം 4000 രൂപക്ക് വരെ ടിക്കറ്റ് കിട്ടാനുണ്ടെന്ന്.

ടിക്കറ്റ് നിരക്ക് കുത്തനെ കുറഞ്ഞിട്ടും യാത്രക്കാരുടെ എണ്ണം നാമമാത്രമാണെന്നും ട്രാവല്‍ ഏജന്‍സികള്‍ വ്യക്തമാക്കുന്നു. സാധാരണയായി ഇത്ര കുറഞ്ഞ നിരക്കുകൾ ധാരാളം ബുക്കിംഗുകൾക്ക് കാരണമാകും, പക്ഷേ യുഎഇയിൽ നിന്ന് ഇന്ത്യയിലേക്കുള്ള യാത്രകൾ വളരെ അധികം കുറഞ്ഞിരിക്കുകയാണെന്ന് സ്മാർട്ട് ട്രാവൽസിന്റെ ചെയർമാൻ അഫി അഹമ്മദിനെ ഉദ്ധരിച്ച് ഗള്‍ഫ് ന്യൂസിന്റെ റിപ്പോർട്ടില്‍ പറയുന്നു.

"കേരളത്തിലെ കണ്ണൂരിലേക്ക് 155 ദിർഹത്തിന് ടിക്കറ്റുകൾ വിൽക്കുന്നുണ്ട്, പക്ഷേ വാങ്ങാന്‍ ആളുകളില്ല. യാത്രക്കാരുടെ ഡിമാൻഡ് വളരെ കുറവാണ്. സ്കൂളിൽ പോകുന്ന കുട്ടികളുള്ള കുടുംബങ്ങൾ ഇപ്പോൾ യാത്ര തീരെ ഒഴിവാക്കിയിരിക്കുകയാണ്. ദുബായിൽ നിന്നുള്ള വണ്‍വേ ടിക്കറ്റുകളെല്ലാം തന്നെ ചുരുങ്ങിയ വിലക്ക് ലഭിക്കും. മുംബൈ 295 ദിർഹം, കൊച്ചി 223 ദിർഹം, തിരുവനന്തപുരം 250 ദിർഹം, ചെന്നൈ 356 ദിർഹം. ദുബായ്-ബെംഗളൂരു പോലുള്ള ജനപ്രിയ റൂട്ടുകൾ 422 ദിർഹം എന്നിവയ്ക്കും ടിക്കറ്റ് ലഭിക്കും. ഈ സമയത്ത് സാധാരണയായി ധാരാളം യാത്രക്കാർ ഉണ്ടാകാറുണ്ട്, പക്ഷേ ഇപ്പോൾ ഡിമാൻഡ് തീരെ കുറഞ്ഞു," അഹമ്മദ് പറഞ്ഞു.

കുട്ടികളുള്ള കുടുംബങ്ങൾ ഇപ്പോൾ യാത്ര ചെയ്യാത്തതാണ് വില കുറയാന്‍ പ്രധാന കാരണം. ഇതുമൂലം ടിക്കറ്റുകളുടെ വിതരണം ഡിമാൻഡിനെക്കാൾ കൂടുതലാണ്. യു എ ഇയിൽ നിന്ന് ഇന്ത്യയിലേക്കുള്ള യാത്രാ ഡിമാൻഡ് കുറവാണ്, പക്ഷേ ഇന്ത്യയിൽ നിന്ന് യു എ ഇയിലേക്കുള്ള ഡിമാൻഡ് വർധിക്കുന്നുണ്ട്. അതായത് എന്നാൽ, തിരിച്ചുള്ള ടിക്കറ്റുകൾ ഇപ്പോഴും വില കൂടുതലാണ്. അതുകൊണ്ട് തന്നെ ചില യാത്രക്കാർക്ക് കുറഞ്ഞ വണ്‍വേ നിരക്കുകൾ പ്രയോജനപ്പെടുത്താൻ തടസ്സമാകുന്നു.

ഒക്ടോബറിൽ സ്കൂൾ അവധിയും ദീപാവലി ആഘോഷവും വരുന്നതോടെ യാത്രക്കാരുടെ എണ്ണം കൂടുമെന്ന് ട്രാവല്‍ ഏജന്റുമാർ പ്രതീക്ഷിക്കുന്നു. ദീപാവലി സമയത്തെ അവധി കാരണം ഒക്ടോബറിൽ യാത്രകൾ കൂടും. ദീപാവലിക്ക് ശേഷമുള്ള ബുക്കിംഗുകൾ ഇപ്പോൾ വരുന്നുണ്ടെന്നും അഹമ്മദ് ചൂണ്ടിക്കാട്ടുന്നു. ദുബായില്‍ നിന്നും മാത്രമല്ല അബുദാബിയില്‍ നിന്നും കുറഞ്ഞ നിരക്കില്‍ ടിക്കറ്റ് ലഭ്യമാണ്.