യുദ്ധം വില്ലനായി; സ്പെയിൻ - അർജന്റീന ഫൈനലിസിമ പോരാട്ടം റദ്ദാക്കി.

ഫുട്ബോൾ ലോകം ആകാംക്ഷയോടെ കാത്തിരുന്ന സ്പെയിൻ - അർജന്റീന 'ഫൈനലിസിമ' (Finalissima 2026) മത്സരം ഔദ്യോഗികമായി റദ്ദാക്കി. ഗൾഫ് മേഖലയിൽ നിലനിൽക്കുന്ന രാഷ്ട്രീയ സംഘർഷങ്ങളും സുരക്ഷാ ഭീഷണികളും കണക്കിലെടുത്താണ് മത്സരത്തിൽ നിന്ന് പിന്മാറാൻ സംഘാടകരായ യുവേഫ തീരുമാനിച്ചത്. യൂറോപ്യൻ ചാമ്പ്യന്മാരായ സ്പെയിനും കോപ്പ അമേരിക്ക ജേതാക്കളായ അർജന്റീനയും തമ്മിലുള്ള ഈ വമ്പൻ പോരാട്ടം മാർച്ച് 27-ന് ഖത്തറിലെ ലുസൈൽ സ്റ്റേഡിയത്തിൽ നടക്കാനായിരുന്നു നിശ്ചയിച്ചിരുന്നത്.

കാരണം പശ്ചിമേഷ്യയിലെ സംഘർഷം

ഇറാനും അമേരിക്കയും ഇസ്രായേലും തമ്മിലുള്ള സൈനിക സംഘർഷം ഗൾഫ് മേഖലയെ യുദ്ധഭീതിയിലാഴ്ത്തിയതാണ് മത്സരത്തെ ബാധിച്ചത്. ഖത്തറിലടക്കം ഉണ്ടായ മിസൈൽ ആക്രമണങ്ങളും സുരക്ഷാ മുന്നറിയിപ്പുകളും കണക്കിലെടുത്ത് ഖത്തർ ഫുട്ബോൾ അസോസിയേഷൻ നേരത്തെ തന്നെ എല്ലാ ടൂർണമെന്റുകളും താൽക്കാലികമായി നിർത്തിവെച്ചിരുന്നു. ഈ പശ്ചാത്തലത്തിൽ, താരങ്ങളുടെയും ആരാധകരുടെയും സുരക്ഷ ഉറപ്പാക്കാൻ കഴിയില്ലെന്ന് ബോധ്യപ്പെട്ടതോടെ യുവേഫയും ലാറ്റിൻ അമേരിക്കൻ ഫുടബോൾ സംഘടനയായ കോൺമെബോളും സംയുക്തമായി മത്സരം റദ്ദാക്കാൻ തീരുമാനിക്കുകയായിരുന്നു.

വേദിക്കായി നടന്ന ചർച്ചകൾ പരാജയപ്പെട്ടു

ഖത്തറിൽ മത്സരം നടത്താൻ കഴിയില്ലെന്ന് ഉറപ്പായതോടെ മറ്റ് വേദികളെക്കുറിച്ച് യുവേഫ ചർച്ചകൾ നടത്തിയിരുന്നു. സ്പെയിനിലെ റയൽ മാഡ്രിഡിന്റെ മൈതാനമായ സാന്റിയാഗോ ബെർണബ്യൂവിൽ മത്സരം നടത്താൻ നിർദ്ദേശം ഉയർന്നുവെങ്കിലും അർജന്റീന ഫുട്ബോൾ അസോസിയേഷൻ (AFA) അത് നിരസിച്ചു. സ്പെയിനിൽ മത്സരം നടക്കുന്നത് അവർക്ക് ഹോം ഗ്രൗണ്ട് ആനുകൂല്യം നൽകുമെന്നതായിരുന്നു അർജന്റീനയുടെ എതിർപ്പിന് കാരണം.

രണ്ട് പാദങ്ങളിലായി (ഒരു മത്സരം മാഡ്രിഡിലും മറ്റൊന്ന് ബ്യൂണസ് ഐറിസിലും) മത്സരം നടത്താനുള്ള നിർദ്ദേശവും മുന്നോട്ട് വെച്ചിരുന്നു. എന്നാൽ ഇത് സ്പെയിനിന് സ്വീകാര്യമായിരുന്നില്ല. ഒടുവിൽ മാർച്ച് 31-ന് മത്സരം നടത്താൻ അർജന്റീന സന്നദ്ധത പ്രകടിപ്പിച്ചെങ്കിലും സ്പെയിനിന്റെ മറ്റ് മത്സരക്രമങ്ങൾ കാരണം ആ തീയതിയും മാറ്റിവെക്കാൻ സാധിച്ചില്ല. ഇതോടെ ചർച്ചകൾ പരാജയപ്പെടുകയും ഫൈനലിസിമ ഈ വർഷം വേണ്ടെന്ന് വെക്കുകയും ചെയ്തു.

നഷ്ടമായത് സ്വപ്ന പോരാട്ടം

ഫുട്ബോൾ ഇതിഹാസം ലയണൽ മെസ്സിയും ബാഴ്സലോണയുടെ കൗമാര വിസ്മയം ലാമിൻ യമാലും നേർക്കുനേർ വരുന്നു എന്നതായിരുന്നു ഈ മത്സരത്തിന്റെ ഏറ്റവും വലിയ ആകർഷണം. കഴിഞ്ഞ ലോകകപ്പ് ഫൈനൽ നടന്ന അതേ മൈതാനത്ത് മെസ്സിയും യമാലും ഏറ്റുമുട്ടുന്നത് കാണാൻ കാത്തിരുന്ന ആരാധകർക്ക് ഈ വാർത്ത വലിയ ആഘാതമായി. 2022-ൽ നടന്ന ആദ്യ ഫൈനലിസിമയിൽ ഇറ്റലിയെ തോൽപ്പിച്ച് അർജന്റീന കിരീടം നേടിയിരുന്നു.

നിലവിലെ സാഹചര്യത്തിൽ ഈ വർഷം ഫൈനലിസിമ പുനരാരംഭിക്കാൻ സാധ്യതയില്ലെന്നാണ് റിപ്പോർട്ടുകൾ. 2026 ലോകകപ്പ് വരാനിരിക്കെ, ടീമുകളുടെ തിരക്കേറിയ ഷെഡ്യൂൾ മറ്റൊരു തീയതി കണ്ടെത്തുന്നതിന് തടസ്സമാവുന്നു. ഫുട്ബോൾ ആരാധകരെ സംബന്ധിച്ചിടത്തോളം വലിയൊരു ആഘോഷമാണ് യുദ്ധസാഹചര്യങ്ങൾ മൂലം ഇല്ലാതായത്.