200 കിലോ സ്വർണം യുഎഇയില് നിന്നും ഇന്ത്യയിലേക്ക്: പക്ഷെ പഴയത് പോലെയല്ല, നടപടിക്രമങ്ങളില് മാറ്റം വരുത്തി
ലോകത്ത് ഏറ്റവും കൂടുതല് സ്വർണ ഉപഭോഗമുള്ള രാജ്യമാണ് ഇന്ത്യ. സ്വന്തമായുള്ള ഉത്പാദനം നാമമാത്രമായതിനാല് ഇതില് മഹാഭൂരിപക്ഷം ഇറക്കുമതി ചെയ്യുകയാണ്. യു എ ഇ, സ്വിറ്റ്സർലന്ഡ് എന്നിവിടങ്ങളില് നിന്നാണ് ഇന്ത്യയിലേക്ക് പ്രധാനമായും സ്വർണം എത്തുന്നത്. രണ്ട് രാജ്യങ്ങളിലും കാര്യമായ ഖനികള് ഒന്നും തന്നെയെങ്കിലും ലോകത്തിലെ സ്വർണ വ്യാപാരത്തിന്റെ ഹബ്ബ് എന്ന നിലയിലാണ് ഇവർ ലോകത്തിലെ സ്വർണ കയറ്റുമതിയില് നിർണ്ണായക സ്വാധീനം വഹിക്കുന്നത്.
യു എ ഇയില് നിന്നും സ്വർണം ഇറക്കുമതി ചെയ്യുന്നതില് നേരത്തേയുള്ള പല നിയന്ത്രണങ്ങളും അടുത്തിടെ കേന്ദ്ര സർക്കാർ പ്രഖ്യാപിച്ചിരുന്നു. ഇതിന്റെ തുടർച്ചയായി ഇപ്പോഴിതാ ഇന്ത്യ-യുഎഇ സമഗ്ര സാമ്പത്തിക സഹകരണ കരാർ (CEPA) പ്രകാരം സ്വർണ്ണത്തിന്റെ താരിഫ് റേറ്റ് ക്വോട്ട (TRQ) വിതരണം മത്സരാധിഷ്ഠിത ഓൺലൈൻ ലേല/ടെൻഡർ പ്രക്രിയയിലൂടെ നടപ്പാക്കുമെന്ന് കേന്ദ്ര സർക്കാർ പ്രഖ്യാപിച്ചിരിക്കുകയാണ്. വലിയ തോതില് സ്വർണം ഇറക്കുമതി ചെയ്യുന്ന കമ്പനികള്ക്കും ജ്വല്ലറികള്ക്കും വേണ്ടിയാണ് ഈ പരിഷ്കരണം.
പുതിയ നടപടിക്രമത്തിലൂടെ സ്വർണ്ണ ഇറക്കുമതിയുടെ സുതാര്യതയും കാര്യക്ഷമതയും ഉറപ്പാക്കാൻ ലക്ഷ്യമിടുന്നതായി വിദേശ വ്യാപാര ഡയറക്ടറേറ്റ് ജനറൽ (DGFT) പുറപ്പെടുവിച്ച ട്രേഡ് നോട്ടീസില് വ്യക്തമാക്കുന്നു. 2022-ൽ ഒപ്പുവെച്ച ഇന്ത്യ-യുഎഇ കരാർ പ്രകാരംവർഷംതോറും യുഎഇയിൽ നിന്ന് 200 മെട്രിക് ടൺ സ്വർണ്ണം ഒരു ശതമാനം ഇറക്കുമതി തീരുവ കുറവോടെ (TRQ) ഇറക്കുമതി ചെയ്യാനാണ് കേന്ദ്ര സർക്കാറിന്റെ അനുമതിയുള്ളത്.
ഈ ആനുകൂല്യം, ഇന്ത്യയിലെ സ്വർണ്ണ വ്യവസായത്തിന് കുറഞ്ഞ ചെലവിൽ ഗുണനിലവാരമുള്ള സ്വർണ്ണം ലഭ്യമാക്കുന്നതിനും, ഇന്ത്യ-യുഎഇ വ്യാപാര ബന്ധം ശക്തിപ്പെടുത്തുന്നതിനും ലക്ഷ്യമിടുന്നതായും കേന്ദ്രം പറയുന്നു. എന്നാൽ, ഈ ക്വോട്ടയുടെ വിതരണം ഇതുവരെ കൃത്യമായ മാനദണ്ഡങ്ങൾക്ക് വിധേയമായിരുന്നില്ല. പുതിയ പ്രഖ്യാപനത്തോടെ വിദേശ വ്യാപാര ഡയറക്ടറേറ്റ് ജനറൽ ഈ പ്രക്രിയയെ കൂടുതൽ സുതാര്യവും മത്സരാധിഷ്ഠിതവുമാക്കാൻ ശ്രമിക്കുന്നു.
എന്താണ് പുതിയ നടപടി ക്രമം
വിദേശ വ്യാപാര ഡയറക്ടറേറ്റ് ജനറൽ ന്റെ ട്രേഡ് നോട്ടീസ് അനുസരിച്ച് താരിഫ് റേറ്റ് ക്വോട്ടക്ക് കീഴിലുള്ള സ്വർണ്ണ ഇറക്കുമതി ക്വോട്ട വിതരണം ഇനി മത്സരാധിഷ്ഠിത ലേല/ടെൻഡർ പ്രക്രിയയിലൂടെ നടക്കും. ഈ പ്രക്രിയയിൽ പങ്കെടുക്കാൻ അർഹതയുള്ള അപേക്ഷകർ ഇനിപ്പറയുന്ന മാനദണ്ഡങ്ങൾ പാലിച്ചിരിക്കണം.
ബി ഐ എ രജിസ്ട്രേഷൻ: അപേക്ഷകർ ബ്യൂറോ ഓഫ് ഇന്ത്യൻ സ്റ്റാൻഡേർഡ്സിൽ (BIS) ഹാൾമാർക്കിംഗിനായി രജിസ്റ്റർ ചെയ്തിരിക്കണം. ഇത് സ്വർണ്ണത്തിന്റെ ഗുണനിലവാരവും ആധികാരികതയും ഉറപ്പാക്കാൻ സഹായിക്കുന്നു.
ജി എസ് ടി രജിസ്ട്രേഷൻ: അപേക്ഷകർ ജിഎസ്ടി (ഗുഡ്സ് ആൻഡ് സർവീസസ് ടാക്സ്) രജിസ്റ്റർ ചെയ്തിരിക്കണം, ഇത് നിയമപരമായ വ്യാപാര പ്രവർത്തനങ്ങൾ ഉറപ്പാക്കുന്നു.
ഗോൾഡ് ഡോർ ഇറക്കുമതി അനുവദനീയമല്ല: താരിഫ് റേറ്റ് ക്വോട്ടക്ക് കീഴിൽ ഗോൾഡ് ഡോർ (അപരിഷ്കൃത സ്വർണ്ണം) ഇറക്കുമതി ചെയ്യാൻ അനുവദിക്കില്ല. അതായത് താരിഫ് ക്വാട്ടയിലൂടെ ശുദ്ധീകരിച്ച സ്വർണ്ണത്തിന്റെ ഇറക്കുമതിയെ മാത്രം പ്രോത്സാഹിപ്പിക്കുന്നു.
പുതിയ നിലപാട് ഇന്ത്യയിലെ സ്വർണ്ണ വ്യവസായത്തിന് നിരവധി ഗുണങ്ങൾ വാഗ്ദാനം ചെയ്യുന്നു. പ്രധാനമായും മത്സരാധിഷ്ഠിത ലേല പ്രക്രിയ ക്വോട്ട വിതരണത്തിൽ സുതാര്യത ഉറപ്പാക്കും, ഇത് അനാവശ്യ മധ്യസ്ഥർക്കും അഴിമതിക്കും സാധ്യത കുറയ്ക്കും. അതോടൊപ്പം തന്നെ എല്ലാ അർഹരായ വ്യവസായികൾക്കും തുല്യ അവസരം ലഭിക്കും, ഇത് വിപണിയിലെ മത്സരാത്മകത വർധിപ്പിക്കും. ബി ഐ എസ്, ജി എസ് ടി രജിസ്ട്രേഷൻ മാനദണ്ഡങ്ങൾ പാലിക്കുന്നതിലൂടെ, ഗുണനിലവാരമുള്ള സ്വർണ്ണം മാത്രമേ വിപണിയിൽ എത്തുകയുമുള്ളു.
കേന്ദ്ര സർക്കാറിന്റെ പുതിയ നീക്കത്തെ വ്യവസായികളും സന്തോഷത്തോടെ സ്വാഗതം ചെയ്യുന്നു. "മത്സരാധിഷ്ഠിത ലേലം സ്വർണ്ണ ഇറക്കുമതി പ്രക്രിയയെ കൂടുതൽ കാര്യക്ഷമവും നീതിപൂർവകവുമാക്കും. ഇത് ചെറുകിട, ഇടത്തരം വ്യവസായികൾക്ക് പോലും താരിഫ് റേറ്റ് ക്വാട്ടയുടെ ആനുകൂല്യങ്ങൾ ലഭിക്കാൻ അവസരമൊരുക്കും," ഒരു പ്രമുഖ ആഭരണ നിർമ്മാതാവ് അഭിപ്രായപ്പെട്ടു. യുഎഇയിൽ നിന്നുള്ള കുറഞ്ഞ തീരുവയുള്ള ഇറക്കുമതി, ഇന്ത്യൻ വിപണിയിൽ സ്വർണ്ണത്തിന്റെ വില കുറയ്ക്കാനും, ഉപഭോക്താക്കൾക്ക് ആനുകൂല്യം നൽകാനും സാധ്യതയുണ്ട്. കൂടാതെ, ഇന്ത്യ-യുഎഇ വ്യാപാര ബന്ധം കൂടുതൽ ശക്തമാക്കാനും ഈ കരാർ സഹായിക്കും.
വിദേശ വ്യാപാര ഡയറക്ടറേറ്റ് ലേല പ്രക്രിയയുടെ വിശദമായ മാർഗ്ഗനിർദ്ദേശങ്ങൾ ഉടൻ പുറത്തിറക്കുമെന്നാണ് പ്രതീക്ഷിക്കുന്നത്. ഓൺലൈൻ പ്ലാറ്റ്ഫോം വഴി നടക്കുന്ന ഈ ലേലം, സാങ്കേതികവിദ്യയുടെ സഹായത്തോടെ കാര്യക്ഷമവും വേഗതയേറിയതുമായ വിതരണം ഉറപ്പാക്കും. വ്യവസായ പ്രതിനിധികൾ, ഈ പ്രക്രിയയുടെ നടത്തിപ്പിനെക്കുറിച്ച് കൂടുതൽ വിവരങ്ങൾക്കായി കാത്തിരിക്കുകയാണ്.
Click it and Unblock the Notifications
Sign in with Google