ദുബായില്‍ സ്വര്‍ണവില ഇടിഞ്ഞുവീഴും.. ഒരു പവന് 2000 രൂപയുടെ കുറവ്! സംഭവിക്കാന്‍ പോകുന്നത് ഇത്...

ദുബായ്: സ്വര്‍ണവില സമ്മര്‍ദ്ദത്തിലാണ് ഈ ആഴ്ച ആരംഭിച്ചത്. ആഗോള വിപണികള്‍ക്കും ബുള്ളിയന്‍ വിപണികള്‍ക്കും ഇത് നിര്‍ണായകമായ ഏതാനും ദിവസമായിരിക്കും എന്നതില്‍ സംശയമില്ല. കാരണം, പ്രധാന വ്യാപാര പങ്കാളികള്‍ക്ക് ഒരു കരാറില്‍ എത്താന്‍ അല്ലെങ്കില്‍ ഇറക്കുമതി തീരുവകളുടെ മുഴുവന്‍ ഭാരവും നേരിടാന്‍ യുഎസ് പ്രസിഡന്റ് ട്രംപ് നല്‍കിയ കാലാവധി ജൂലൈ 9 ന് അവസാനിക്കുകയാണ്.

പ്രധാന യുഎസ് പങ്കാളികള്‍ യു എസുമായി എന്തെങ്കിലും ധാരണയിലെത്തുകയാണെങ്കില്‍ അത് സ്വര്‍ണ വിലയെ തണുപ്പിച്ചേക്കാം. അല്ലെങ്കില്‍, കൂടുതല്‍ ചാഞ്ചാട്ടം പ്രതീക്ഷിക്കേണ്ടി വരും. ഈ വര്‍ഷം ആദ്യം യുഎസ് വ്യാപാര താരിഫുകള്‍ പ്രഖ്യാപിച്ചതാണ് 2025 ലെ ആദ്യ ആറ് മാസത്തിനുള്ളില്‍ സ്വര്‍ണം ഔണ്‍സിന് 3,300 ഡോളറിനും 3,400 ഡോളറിനും ഇടയിലേക്കും ഒരുവേള 3,500 ഡോളറിലേക്കും ഉയരാന്‍ കാരണമായത്.

അതിനാല്‍ തന്നെ വരും ദിവസങ്ങള്‍ ട്രംപിന് എന്താണ് പറയാനുള്ളത് എന്നതിനെ ആശ്രയിച്ചിരിക്കും സ്വര്‍ണ വില. സ്വര്‍ണ, ആഭരണ വ്യാപാരത്തിനും ഉപഭോക്താക്കള്‍ക്കും ഈ തീരുമാനം ഒരുപോലെ പ്രധാനമാണ്. ബ്രിക്‌സ് ഗ്രൂപ്പുമായി കരാറുകളില്‍ ഏര്‍പ്പെടുന്ന രാജ്യങ്ങള്‍ക്ക് '10% അധിക താരിഫ്' ഏര്‍പ്പെടുത്തുമെന്ന് ട്രംപ് ഇതിനകം മുന്നറിയിപ്പ് നല്‍കിയിട്ടുണ്ട്.

ദുബായ് സ്വര്‍ണ്ണ വില 22 കാരറ്റിന് ഗ്രാമിന് നിലവിലുള്ള ദിര്‍ഹം 372.25 ല്‍ നിന്ന് കുറയും. ഇന്ന് രാവിലെയുള്ള ട്രെന്‍ഡുകള്‍ ശരിയായ ദിശയിലാണെങ്കില്‍ വാങ്ങുന്നവര്‍ 370 ദിര്‍ഹത്തില്‍ താഴെയുള്ള എന്തെങ്കിലും പ്രതീക്ഷിക്കുന്നുണ്ടെന്ന് വിപണി വൃത്തങ്ങള്‍ പറയുന്നു. വ്യാപാര ഇടപാടുകള്‍ നിലനില്‍ക്കുകയാണെങ്കില്‍ കുറഞ്ഞത് 10 ദിര്‍ഹമെങ്കിലും സ്വര്‍ണത്തിന് വില കുറയും.

''ഒരു കരാര്‍ ഒപ്പിട്ടതായി യുഎസ് പറഞ്ഞാല്‍, ദുബായ് സ്വര്‍ണ്ണ വില ഗ്രാമിന് 365 ദിര്‍ഹമായി കുറയും,'' ഒരു സ്വര്‍ണ്ണ റീട്ടെയിലര്‍ പറഞ്ഞു. അല്ലെങ്കില്‍ ഇതിലും കുറവ് പ്രതീക്ഷിക്കാം എന്നും അദ്ദേഹം പറഞ്ഞു. കാരണം സ്വര്‍ണം 350 ദിര്‍ഹമില്‍ കൂടുതലുള്ള നിലവാരത്തില്‍ തന്നെ തുടരുന്നതിന്റെ പ്രധാന കാരണങ്ങള്‍ അമേരിക്കന്‍ സമ്പദ്വ്യവസ്ഥയെക്കുറിച്ചുള്ള അനിശ്ചിതത്വവും, താരിഫ് സാഹചര്യവുമാണ്.

താരിഫ് പ്രതിസന്ധി ലഘൂകരിക്കപ്പെട്ടാല്‍, അത് സ്വര്‍ണ വിലയില്‍ കുറഞ്ഞത് 10 ദിര്‍ഹമെങ്കിലും കുറവുണ്ടാക്കും. 372.25 ദിര്‍ഹത്തിന്റെ വില കണക്കിലെടുത്ത് ഈ വാരാന്ത്യത്തില്‍ ജ്വല്ലറി സ്റ്റോറുകളില്‍ വില്‍പ്പനയില്‍ ഇടിവ് ഉണ്ടായതായി വൃത്തങ്ങള്‍ പറയുന്നു. വേനല്‍ക്കാല പ്രമോഷനുകളും ദുബായ് സമ്മര്‍ സര്‍പ്രൈസ് സ്വര്‍ണ റാഫിളുകളും പോലും വേണ്ടത്ര പ്രലോഭനകരമായിരുന്നില്ല എന്ന് അവര്‍ കൂട്ടിച്ചേര്‍ക്കുന്നു.

'മുന്‍ വാരാന്ത്യത്തില്‍ ഗ്രാമിന് 365 ദിര്‍ഹമായിരുന്നു വില. അവര്‍ എപ്പോഴും വില താരതമ്യം ചെയ്യും,' ഒരു റീട്ടെയിലര്‍ പറഞ്ഞു. 370 ദിര്‍ഹമില്‍ കൂടുതലുള്ള വില യുഎഇ സ്വര്‍ണ്ണ വാങ്ങുന്നവര്‍ക്ക് ഒരു മാനസിക തടസ്സമായി തുടരുന്നു എന്നും അദ്ദേഹം കൂട്ടിച്ചേര്‍ത്തു. അതുകൊണ്ടാണ് ഒരു യുഎസ് വ്യാപാര കരാര്‍, അല്ലെങ്കില്‍ കുറഞ്ഞത് അതിന്റെ ഏതെങ്കിലും രൂപമെങ്കിലും, ഇപ്പോള്‍ സ്വര്‍ണ്ണത്തിന് ആവശ്യമുള്ളത് എന്നും അദ്ദേഹം പറഞ്ഞു.