ഗള്‍ഫ് നിവാസികള്‍ക്ക് സന്തോഷ വാർത്ത; എണ്ണ വില ഇടിവിലേക്ക്; ചിലവുകള്‍ കുറയും

എണ്ണ ഉത്പാദക രാജ്യങ്ങളുടെ കൂട്ടായ്മയായ ഒപെക്+ (OPEC+) സഖ്യം നവംബറിൽ എണ്ണ ഉൽപാദനം വർധിപ്പിക്കാൻ തീരുമാനിച്ചത് ഗള്‍ഫ് നിവാസികളുടേയും സന്തോഷം വർധിപ്പിക്കുന്നു. പുതിയ തീരുമാനത്തോടെ ആഗോള എണ്ണ വിലയിൽ 3%ലധികം ഇടിവ് രേഖപ്പെടുത്തി, ഇത് ഗൾഫിലെ ഇന്ധന വിലയിൽ നേരിട്ട് പ്രതിഫലിക്കുമെന്നാണ് പ്രതീക്ഷിക്കപ്പെടുന്നത്. സൗദി അറേബ്യ, യുഎഇ, കുവൈറ്റ് തുടങ്ങിയ പ്രധാന ഗൾഫ് എണ്ണ ഉൽപ്പാദക രാജ്യങ്ങൾ അടങ്ങുന്ന ഒപെക്+ സഖ്യം, റഷ്യ പോലുള്ള സഖ്യകക്ഷികളുമായി ചേർന്നാണ് ഉത്പാദന വർധനവ് പ്രഖ്യാപിച്ചിരിക്കുന്നത്.

എണ്ണ വില കുറയന്നത് ഗൾഫിലെ ദൈനംദിന ജീവിതച്ചെലവ് കുറയ്ക്കുകയും, ഗതാഗതം, വ്യവസായം തുടങ്ങിയ മേഖലകളെ പോസിറ്റീവായി സ്വാധീനിക്കുകയും ചെയ്യുമെന്ന് വിദഗ്ധർ വിലയിരുത്തുന്നു. ഒപെക്+യുടെ ഔദ്യോഗിക പ്രസ്താവന പ്രകാരം, നവംബറിൽ പ്രതിദിനം 137,000 ബാരൽ എണ്ണ ഉൽപാദനം വർധിപ്പിക്കാനാണ് തീരുമാനം. ഈ വർധന 2023 ഏപ്രിലിൽ പ്രഖ്യാപിച്ച 1.65 മില്യൺ ബാരൽ അധിക സ്വമേധയാ ഉൽപാദന കുറവില്‍ നിന്നുള്ള പടിപടിയായുള്ള മടങ്ങി വരവ് കൂടിയാണ്.

2025-ൽ മാത്രം ഒപെക്+ സഖ്യം 2.7 മില്യൺ ബാരലിലധികം ഉൽപാദന ക്വോട്ട വർധിപ്പിച്ചിട്ടുണ്ട്, ഇത് ആഗോള ഡിമാൻഡിന്റെ ഏകദേശം 2.5% വരും. ഈ നീക്കം വിതരണം സന്തുലിതമാക്കി മാർക്കറ്റ് സ്ഥിരത ഉറപ്പാക്കാൻ ലക്ഷ്യമിട്ടുള്ളതാണ്, പ്രത്യേകിച്ച് ഭൗമരാഷ്ട്രീയ പിരിമുറുക്കങ്ങൾ, സാമ്പത്തിക ഏറ്റക്കുറച്ചിലുകൾ, വിതരണ ശൃംഖല പ്രശ്നങ്ങൾ എന്നിവയ്ക്കിടയിൽ.

ഒപെക്+യുടെ പ്രഖ്യാപനത്തോടെ ആഗോള എണ്ണ വിലയിൽ 3%ലധികം ഇടിവുണ്ടായി. ഈ ഇടിവ് നേരിട്ട് ഇന്ധന ചെലവുകളിൽ പ്രതിഫലിക്കുമെന്നാണ് പ്രതീക്ഷ. മാർക്കറ്റ് സെൻസിറ്റീവ് ആയിരിക്കുമ്പോഴും, ഈ തീരുമാനം ഹ്രസ്വകാല ആശ്വാസം നൽകുമെന്നാണ് വിദഗ്ധർ പറയുന്നത്. എന്നാൽ, ദീർഘകാലത്തിൽ ഭൗമരാഷ്ട്രീയ ടെൻഷനുകളും സാമ്പത്തിക ഏറ്റക്കുറച്ചിലുകളും വിലയെ സ്വാധീനിക്കുമെന്ന് മുന്നറിയിപ്പ് നൽകുന്നു.

തുടക്കത്തില്‍ പറഞ്ഞത് ഗൾഫ് നിവാസികൾക്ക് ഈ തീരുമാനം "കാര്യമായ സാമ്പത്തിക നേട്ടങ്ങൾ" നൽകുമെന്നാണ് റിപ്പോർട്ടുകൾ സൂചിപ്പിക്കുന്നത്. ഇന്ധന വിലയിലെ ഇടിവ് ദൈനംദിന ചെലവുകളെ കുറയ്ക്കും, പ്രത്യേകിച്ച് ഗതാഗതം, വ്യവസായം, ഗാർഹിക ബജറ്റ് എന്നിവയിൽ. നവംബറിൽ തന്നെ ഇത് വ്യക്തമാകുമെന്നാണ് പ്രതീക്ഷ. വില ഈ നിലയില്‍ തുടർന്നാല്‍ സൗദി അറേബ്യയില്‍ കാർ ഉടമകൾക്ക് പ്രതിമാസം ശരാശരി 50-70 സൗദി റിയാൽ ലാഭം നേടാനാകും.

യു എ ഇയില്‍ യാത്ര ദൂരത്തെ ആശ്രയിച്ച് ദൈനംദിന യാത്രക്കാർക്ക് പ്രതിവാരം 30-50 യുഎഇ ദിർഹം വരെ ലാഭിക്കാം. ബസുകൾ, ടാക്സികൾ, ഡെലിവറി സേവനങ്ങൾ എന്നിവയുടെ ചെലവ് കുറയും. ഭക്ഷണം, സാധനങ്ങൾ എന്നിവയുടെ വിലയിലും ഇടിവ് പ്രതീക്ഷിക്കാം. ടൂറിസം, ഹോസ്പിറ്റാലിറ്റി മേഖലകളിൽ പ്രവർത്തന ചെലവ് കുറയുമെന്നും വിദഗ്ധർ പറയുന്നു.