ഗള്ഫ് യാത്രികരുടെ ശ്രദ്ധയ്ക്ക്..; പല വിമാനങ്ങളും റദ്ദാക്കി, ഇക്കാര്യം ശ്രദ്ധിക്കണം
യുഎസ്-ഇറാന് സംഘര്ഷത്തിന്റെ പശ്ചാത്തലത്തില് സുരക്ഷാ ആശങ്കകള് നിലനില്ക്കുന്നതിനാല് ഗള്ഫ് മേഖലയിലുടനീളം വിമാന സര്വീസുകള് റദ്ദാക്കുന്നത് വിമാനക്കമ്പനികള് നീട്ടിക്കൊണ്ടുപോകുന്നു. യുഎഇ, ബഹ്റൈന്, കുവൈത്ത്, ഖത്തര്, സൗദി അറേബ്യ തുടങ്ങിയ സ്ഥലങ്ങളിലേക്കുള്ള സര്വീസുകള് പല അന്താരാഷ്ട്ര, പ്രാദേശിക വിമാനക്കമ്പനികളും റദ്ദാക്കുകയോ ക്രമീകരിക്കുകയോ ചെയ്തിട്ടുണ്ട്.
അതേസമയം, വിമാനത്താവളത്തിലേക്ക് പുറപ്പെടുന്നതിന് മുന്പ് വിമാനങ്ങളുടെ ഏറ്റവും പുതിയ വിവരങ്ങള് പരിശോധിക്കണമെന്ന് എയര്ലൈന് അധികൃതര് യാത്രക്കാരോട് നിര്ദ്ദേശിച്ചു. രണ്ട് ബാലിസ്റ്റിക് മിസൈലുകളെ വ്യോമപ്രതിരോധ സംവിധാനങ്ങള് തടഞ്ഞതിനെത്തുടര്ന്ന്, ഇറാനുമായുള്ള എല്ലാ വ്യാപാര-സാമ്പത്തിക ഇടപാടുകളും യുഎഇ നിര്ത്തിവെച്ചിരിക്കുകയാണ്.
ഇതിനിടെ, യുഎസും ഇറാനും തമ്മിലുള്ള ചര്ച്ചകളും സ്തംഭിച്ചിരിക്കുന്നു. വെടിനിര്ത്തല് കരാറിനായുള്ള പദ്ധതികള് അനിശ്ചിതകാലത്തേക്ക് നിര്ത്തിവെച്ചതായി യുഎസ് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ചിരുന്നു. പുതിയ സംഭവവികാസങ്ങളുടെ പശ്ചാത്തലത്തിലാണ് എയര്ലൈന് അധികൃതരുടെ നടപടി.
ഇത്തിഹാദ്
അബുദാബിക്കും ബഹ്റൈനും ഇടയിലുള്ള ചില ഇത്തിഹാദ് വിമാനങ്ങള് നിശ്ചയിച്ച പ്രകാരം തന്നെ സര്വീസ് നടത്തുമെന്ന് കമ്പനി അറിയിച്ചു. എന്നിരുന്നാലും, EY641-EY642, EY645-EY646, EY647-EY648 എന്നീ വിമാനങ്ങള് ഓഗസ്റ്റ് 21 വരെ റദ്ദാക്കിയിട്ടുണ്ട്. 'ഉണ്ടായ ബുദ്ധിമുട്ടില് ഞങ്ങള് ക്ഷമ ചോദിക്കുന്നു. യാത്രക്കാര്ക്ക് ആവശ്യമായ സഹായങ്ങള് നല്കാനും, ബദല് സര്വീസുകളില് യാത്രാ സൗകര്യം ഒരുക്കാനും ഞങ്ങളുടെ സംഘം പരമാവധി ശ്രമിക്കുന്നുണ്ട്', കമ്പനി അറിയിച്ചു.
എമിറേറ്റ്സ്
കുവൈത്തിലേക്കും ബഹ്റൈനിലേക്കുമുള്ള വിമാന സര്വീസുകള് തടസ്സപ്പെട്ട നിലയിലാണ് തുടരുന്നത്. എമിറേറ്റ്സിന്റെ ഫ്ലൈറ്റ് സ്റ്റാറ്റസ് പരിശോധിക്കുമ്പോള് ഇതുമായി ബന്ധപ്പെട്ട വിവരങ്ങളൊന്നും ലഭ്യമല്ല.
എയര് അസ്താന
കസാക്കിസ്ഥാന്റെ ദേശീയ വിമാനക്കമ്പനിയായ എയര് അസ്താന ദുബായിലേക്കുള്ള സര്വീസുകള് റദ്ദാക്കുന്നത് തുടരുകയാണ്. അല്മാറ്റിയില് നിന്ന് ദുബായിലേക്കുള്ള വിമാനങ്ങള് വരും ദിവസങ്ങളില് സര്വീസ് നടത്തില്ല. അല്മാറ്റിയില് നിന്ന് ദോഹയിലേക്കുള്ള വിമാനങ്ങളും റദ്ദാക്കിയിട്ടുണ്ട്.
എയര് ഫ്രാന്സ്
സംഘര്ഷം ആരംഭിച്ചതുമുതല് യുഎഇയിലേക്കും മേഖലയിലെ മറ്റ് ഭാഗങ്ങളിലേക്കുമുള്ള എയര് ഫ്രാന്സ് വിമാനങ്ങള് റദ്ദാക്കിയിട്ടുണ്ട്. ജിസിസി രാജ്യങ്ങളിലേക്കുള്ള സര്വീസുകള് നിര്ത്തിവെക്കുന്നത് നീട്ടുന്നതായി ജൂലൈയില് തന്നെ കമ്പനി പ്രഖ്യാപിച്ചിരുന്നു. പാരീസിലെ ചാള്സ് ഡി ഗല്ലെ വിമാനത്താവളത്തില് നിന്ന് ദുബായിലേക്ക് നിശ്ചയിച്ചിരുന്ന AF 0662 വിമാനം ഉള്പ്പെടെ, ഫ്രഞ്ച് തലസ്ഥാനത്ത് നിന്ന് ദുബായിലേക്കുള്ള സര്വീസുകള് ഓഗസ്റ്റ് 25 വരെ നിര്ത്തിവെച്ചിരിക്കുന്നു.
ബെയ്റൂട്ടിലേക്കുള്ള സര്വീസ് നിര്ത്തിവെക്കുന്നത് 2026 സെപ്റ്റംബര് 1 വരെ നീട്ടിയിരിക്കുന്നു. റിയാദിലേക്കുള്ള സര്വീസ് നിര്ത്തിവെക്കുന്നത് 2026 ഓഗസ്റ്റ് 25 വരെ നീട്ടിയിരിക്കുന്നു. 'വേഗത്തില് മാറിക്കൊണ്ടിരിക്കുന്ന പ്രാദേശിക സുരക്ഷാ സാഹചര്യം വിലയിരുത്തിയ ശേഷമേ സര്വീസുകള് പുനരാരംഭിക്കുന്നത് സംബന്ധിച്ച് തീരുമാനമെടുക്കൂ,' എന്ന് എയര് ഫ്രാന്സ് പ്രസ്താവനയില് അറിയിച്ചു.
ബ്രിട്ടീഷ് എയര്വേയ്സ്
അബുദാബി, അമ്മാന്, ബഹ്റൈന്, ദോഹ, ദുബായ്, ടെല് അവീവ്, റിയാദ് എന്നിവിടങ്ങളിലേക്കും തിരിച്ചുമുള്ള വിമാന സര്വീസുകള് അനിശ്ചിതത്വം തുടരുന്ന സാഹചര്യത്തില് റദ്ദാക്കുകയോ താല്ക്കാലികമായി നിര്ത്തിവയ്ക്കുകയോ ചെയ്തിരിക്കുകയാണ്.
ഒക്ടോബര് 31 വരെയുള്ള ബുക്കിംഗുകള്ക്ക് മുഴുവന് തുകയും തിരികെ നല്കുകയോ അധിക ഫീസില്ലാതെ യാത്ര മാറ്റാന് അനുവദിക്കുകയോ ചെയ്യുന്നതുള്പ്പെടെയുള്ള ഇളവുകള് നല്കുമെന്ന് എയര്ലൈന് അറിയിച്ചു. പരാമര്ശിച്ച സ്ഥലങ്ങളിലേക്കോ അവിടെനിന്നോ ഉള്ള വിമാനങ്ങളും ഇതില് ഉള്പ്പെടുന്നു.
എയര് കാനഡ
ദുബായ്, ടെല് അവീവ് എന്നിവിടങ്ങളിലേക്കുള്ള വിമാന സര്വീസുകള് 2027 ജനുവരി പകുതി വരെ റദ്ദാക്കിയ നിലയില് തുടരും. ആദ്യം ഈ വര്ഷം ഒക്ടോബര് 24 വരെയായിരുന്നു സര്വീസുകള് നിര്ത്തിവച്ചിരുന്നത്, എന്നാല് മേഖലയിലെ സംഘര്ഷാവസ്ഥ വര്ധിച്ച സാഹചര്യത്തില് കനേഡിയന് എയര്ലൈന് ഈ കാലാവധി നീട്ടുകയായിരുന്നു. ദോഹ, റിയാദ് എന്നിവയുള്പ്പെടെ മേഖലയിലെ മറ്റ് സ്ഥലങ്ങളിലേക്ക് എയര്ലൈന് സര്വീസ് തുടരുന്നുണ്ട്.
കെഎല്എം
കെഎല്എം റോയല് ഡച്ച് എയര്ലൈന്സ് ദുബായ്, റിയാദ്, ദമ്മാം എന്നിവിടങ്ങളിലേക്കുള്ള വിമാന സര്വീസ് നിര്ത്തിവച്ച കാലാവധി ഒക്ടോബര് 24 വരെ നീട്ടി. ആംസ്റ്റര്ഡാമിനും ടെല് അവീവിനും ഇടയിലുള്ള വിമാന സര്വീസുകള് ഓഗസ്റ്റ് 25 മുതല് പുനരാരംഭിക്കും.
Click it and Unblock the Notifications
Sign in with Google