ലുലു ഗ്രൂപ്പിനെ ഞങ്ങള്‍ക്ക് വേണം; യൂസഫ് അലിയെ നേരിട്ട് ക്ഷണിച്ച് ആല്‍ബനീസ്; 'ചിലർക്ക് പണികൊടുക്കാനുണ്ട്'

ലുലു ഗ്രൂപ്പിനെ ഓസ്ട്രേലിയയിലേക്ക് ക്ഷണിച്ച് ഓസ്‌ട്രേലിയൻ പ്രധാനമന്ത്രി ആന്റണി ആൽബനീസ്. ലുലു ഗ്രൂപ്പ് ചെയർമാൻ എംഎ യൂസഫ് അലിയുമായി യു എ ഇയില്‍ വെച്ച് നേരിട്ട് നടത്തിയ കൂടിക്കാഴ്ചയിലാണ് തങ്ങളുടെ രാജ്യത്തും ലുലു സുപ്പർ മാർക്കറ്റുകള്‍ ആരംഭിക്കണമെന്ന ആവശ്യം ആന്റണി ആൽബനീസ് മുന്നോട്ട് വെച്ചത്. കോൾസ്, വൂൾവർത്ത്സ് എന്നീ രണ്ട് പ്രമുഖ കമ്പനികൾക്ക് മാത്രമായി ചുരുങ്ങിയ ഓസ്‌ട്രേലിയയിലെ സൂപ്പർമാർക്കറ്റ് മേഖലയിൽ മത്സരം വർധിപ്പിക്കുകയാണ് ഇതിലൂടെ പ്രധാനമന്ത്രി ലക്ഷ്യമിടുന്നത്.

യു എ ഇയുമായുള്ള സ്വതന്ത്ര വ്യാപാര കരാർ (ഫ്രീ ട്രേഡ് അഗ്രിമെന്റ്) നിലവിൽ വന്നതിന്റെ ഭാഗമായി യു എ ഇയില്‍ നടത്തുന്ന സന്ദർശനത്തിനിടെയായിരുന്നു ആൽബനീസ് യൂസഫ് അലിയുമായി കൂടിക്കാഴ്ച നടത്തിയത്. "ലുലു ഗ്രൂപ്പിന്റെ 300-ലധികം സൂപ്പർമാർക്കറ്റുകൾ ഗൾഫ് രാജ്യങ്ങളിലും മറ്റിടങ്ങളിലും പ്രവർത്തിക്കുന്നുണ്ട്. ഓസ്‌ട്രേലിയയിലും അവർ പ്രവർത്തനം ആരംഭിക്കണമെന്നാ ഞാൻ ആവശ്യപ്പെട്ടിട്ടുണ്ട് നമ്മുടെ സൂപ്പർമാർക്കറ്റ് മേഖലയിൽ കൂടുതൽ മത്സരം ആവശ്യമാണ്," ആൽബനീസ് പറഞ്ഞു.

ലുലു ഗ്രൂപ്പിന് ഓസ്‌ട്രേലിയയിലെ കർഷകരുമായും ഉൽപ്പാദകരുമായും നേരിട്ട് ബന്ധപ്പെട്ട് പ്രവർത്തിക്കാൻ കഴിയുമെന്നും, മാംഗോ, ഓറഞ്ച്, ഹലാൽ സർട്ടിഫൈഡ് മാംസം തുടങ്ങിയ ഉൽപ്പന്നങ്ങൾ യു എ ഇ വിപണിയിലേക്ക് എത്തിക്കുന്നതിൽ അവർക്ക് പങ്കുവഹിക്കാൻ സാധിക്കുമെന്നും അദ്ദേഹം ചൂണ്ടിക്കാട്ടി.

സ്വതന്ത്ര വ്യാപാര കരാറിന്റെ പ്രാധാന്യം

യു എ ഇയുമായുള്ള സ്വതന്ത്ര വ്യാപാര കരാർ ഓസ്‌ട്രേലിയൻ കയറ്റുമതികളിൽ 99% ത്തിലധികം ഉൽപ്പന്നങ്ങൾക്കും തീരുവ ഇല്ലാതാക്കും. ഇത് ഓസ്‌ട്രേലിയൻ കർഷകർക്കും ഉൽപ്പാദകർക്കും വലിയ അവസരമാണ്. കൂടാതെ, യു എ ഇയിലെ വൻകിട സോവറിൻ വെൽത്ത് ഫണ്ടുകളിൽ നിന്ന് ഓസ്‌ട്രേലിയയിലേക്കുള്ള നിക്ഷേപം വർധിപ്പിക്കാനും ഈ കരാർ വഴിയൊരുക്കും. "ഈ കരാർ ഓസ്‌ട്രേലിയൻ ഉൽപ്പാദകർക്ക് പുതിയ വിപണികൾ തുറക്കും, ഒപ്പം ലുലു പോലുള്ള റീട്ടെയിൽ ശൃംഖലകൾക്ക് ഓസ്‌ട്രേലിയയിൽ പ്രവർത്തിക്കാനുള്ള അവസരവും നൽകും," ആൽബനീസ് വ്യക്തമാക്കി.

ആധിപത്യം

ഓസ്‌ട്രേലിയയിലെ സൂപ്പർമാർക്കറ്റ് മേഖലയിൽ കോൾസിനും വൂൾവർത്ത്സിനും ഉള്ള ആധിപത്യം വിലക്കയറ്റത്തിനും മത്സരക്കുറവിനും കാരണമാകുന്നുവെന്ന വിമർശനം ശക്തമാണ്. ജീവിതച്ചെലവ് വർധനവിന്റെ പശ്ചാത്തലത്തിൽ, ഈ രണ്ട് കമ്പനികളുടെ വിപണി ആധിപത്യം ഉപഭോക്താക്കൾക്ക് ദോഷകരമാണെന്ന് വിമർശകർ ചൂണ്ടിക്കാട്ടുന്നു. ഗ്രീൻസ്, നാഷണൽസ് പാർട്ടികൾ ഈ കമ്പനികളെ 'ഡിവസ്റ്റിചർ' (വിഘടിപ്പിക്കൽ) നിയമങ്ങളിലൂടെ നിയന്ത്രിക്കണമെന്ന നിർദേശം നേരത്തെ മുന്നോട്ടുവെച്ചിരുന്നു. എന്നാൽ, ഇത്തരം നിയമങ്ങൾ "പഴയ സോവിയറ്റ് യൂണിയന്റെ രീതിയല്ല" എന്ന് പറഞ്ഞ് ആൽബനീസ് ഇതിനെ എതിർത്തിരുന്നു. പകരം, മത്സരം വർധിപ്പിക്കുന്നതിനുള്ള നടപടികളാണ് സർക്കാർ പിന്തുടരുന്നത്.

സൂപ്പർമാർക്കറ്റ് മേഖലയിൽ മത്സരം വർധിപ്പിക്കുന്നതിനായി, പ്രാദേശിക ഭരണകൂടങ്ങളുമായി ചേർന്ന് സോണിംഗ്, പ്ലാനിംഗ് നിയമങ്ങൾ പരിഷ്കരിക്കാനുള്ള ശ്രമങ്ങൾ സർക്കാർ ആരംഭിച്ചിട്ടുണ്ട്. വിദേശ റീട്ടെയിൽ ശൃംഖലകൾക്ക് ഓസ്‌ട്രേലിയയിൽ പ്രവേശിക്കുന്നതിന് തടസ്സമായി നിലനിൽക്കുന്ന ഭൂമി ഏറ്റെടുക്കൽ തന്ത്രങ്ങൾ (കോൾസും വൂൾവർത്ത്സും സാധ്യതയുള്ള സൈറ്റുകൾ വാങ്ങി വികസിപ്പിക്കാതെ വയ്ക്കുന്നു) പരിഹരിക്കാനാണ് ഈ നീക്കം.

2025 മാർച്ചിൽ, ഓസ്‌ട്രേലിയൻ കോംപറ്റീഷൻ ആൻഡ് കൺസ്യൂമർ കമ്മിഷൻ (ACCC) നടത്തിയ പരിശോധനയിൽ, കോൾസിന്റെയും വൂൾവർത്ത്സിന്റെയും വിപണി ആധിപത്യം വില മത്സരത്തിനുള്ള പ്രോത്സാഹനം കുറയ്ക്കുന്നതായി കണ്ടെത്തി. എന്നിരുന്നാലും, വില വർധനവ് അമിതമാണെന്ന് റിപ്പോർട്ട് കണ്ടെത്തിയില്ല.

വില വർധനവിനെ നിയന്ത്രിക്കാൻ "അമിത വില നിയന്ത്രണ റെജിം" (excessive pricing regime) പരിശോധിക്കുമെന്ന് ആൽബനീസ് പ്രഖ്യാപിച്ചിരുന്നു. ഈ നിയന്ത്രണം ACCC-യുടെ മേൽനോട്ടത്തിൽ നടപ്പാക്കും, അന്യായമായ വില വർധനവ് (price gouging) നടത്തുന്ന സൂപ്പർമാർക്കറ്റുകൾക്കെതിരെ നടപടി സ്വീകരിക്കാൻ ഇത് ലക്ഷ്യമിടുന്നു. ലുലു ഗ്രൂപ്പിന്റെ ഓസ്‌ട്രേലിയൻ വിപണിയിലേക്കുള്ള പ്രവേശനം ഈ ശ്രമങ്ങളുടെ ഭാഗമായാണ് കാണപ്പെടുന്നത്.

ലുലു ഗ്രൂപ്പിന്റെ വരവ് ഓസ്‌ട്രേലിയയിലെ ഉപഭോക്താക്കൾക്ക് കൂടുതൽ ഓപ്ഷനുകളും മെച്ചപ്പെട്ട വിലനിലവാരവും നൽകുമെന്നാണ് പ്രതീക്ഷ. ഗൾഫ് രാജ്യങ്ങളിൽ 250-ലധികം ഔട്ട്‌ലെറ്റുകളുള്ള ലുലു, ഓസ്‌ട്രേലിയയിലെ റീട്ടെയിൽ മേഖലയിൽ വലിയ മാറ്റങ്ങൾ കൊണ്ടുവരാൻ സാധ്യതയുണ്ട്. "ലുലുവിന്റെ പ്രവർത്തന ശൈലിയും ഗുണമേന്മയും ഓസ്‌ട്രേലിയയിൽ വിജയിക്കുമെന്ന് ഞാൻ വിശ്വസിക്കുന്നു," ആൽബനീസ് കൂട്ടിച്ചേർത്തു.

English summary

Lulu Group invited to Australia: Antony Albanese meets with MA Yusuf Ali.