ഒരു വീട്ടിലേക്ക് വേണ്ടത് എന്തും ലുലു നല്‍കും; വില 19 ദിർഹത്തിന് താഴെ; 14-ാമത് ലോട്ട് സ്റ്റോർ തുറന്നു

Updated: Friday, May 23, 2025, 16:29 [IST]

വാല്യു കോൺസെപ്റ്റ് സ്റ്റോറായ ലോട്ടിന്റെ പ്രവർത്തനം യു എ ഇയില്‍ ഉടനീളം വ്യാപിപ്പിക്കാനൊരുങ്ങി ലുലു ഗ്രൂപ്പ്. ഷാർജയിലെ അൽ വഹ്ദാ സ്ട്രീറ്റിലുള്ള ലുലു ഹൈപ്പർമാർക്കറ്റിൽ യു എ ഇയിലെ തന്റെ ഏറ്റവും വലിയ ലോട്ട് സ്റ്റോറാണ് തുറന്നിരിക്കുന്നത്. ജി സി സി യിലെ 14-ാമത്തേയും യു എ ഇയിലെ 7-ാമത്തേയും ലോട്ട് സ്റ്റോറാണ് അൽ വഹ്ദായിലേത്. ലുലു ഗ്രൂപ്പിന്റെ ചെയർമാൻ യൂസഫലി എം.എ, ലുലുവിന്റെ മുതിർന്ന ഉദ്യോഗസ്ഥരുടെ സാന്നിധ്യത്തിൽ പുതിയ ലോട്ട് സ്റ്റോർ ഉദ്ഘാടനം ചെയ്തു.

47000 ചതുരശ്ര അടി വിസ്തീർണമുള്ള ഈ സ്റ്റോർ ഉദ്ഘാടനത്തിന് പിന്നാലെ ജനങ്ങള്‍ ഏറ്റെടുത്ത് കഴിഞ്ഞു. 'ഗുണനിലവാരമുള്ള ഉൽപ്പന്നങ്ങൾ ബജറ്റിന് അനുയോജ്യമായ വിലയിൽ ഉപഭോക്താക്കൾക്ക് നൽകുക എന്നതാണ് ഞങ്ങളുടെ ലക്ഷ്യം. ഷാർജയിലെ ഈ വളർച്ച, മൂല്യാധിഷ്ഠിത ഷോപ്പിംഗ് അനുഭവത്തിനുള്ള വർദ്ധിച്ചുവരുന്ന ആവശ്യം പ്രതിഫലിപ്പിക്കുന്നു. 2025-ഓടെ 50 ലോട്ട് സ്റ്റോറുകൾ പ്രവർത്തിപ്പിക്കാനുള്ള പാതയിലാണ് ഞങ്ങൾ' ലുലു ഗ്രൂപ്പിന്റെ ചെയർമാൻ യൂസഫലി എം.എ പറഞ്ഞു.

ലുലുവിന്റെ സി ഇ ഒ സൈഫി രൂപവാല, ഗ്ലോബൽ ഓപ്പറേഷൻസ് ഡയറക്ടർ സലിം എം എ, ലുലു ഇന്റർനാഷണൽ ഹോൾഡിംഗ്സിന്റെ ഡയറക്ടർ അനന്ത് എ വി, ബൈയിംഗ് ഡയറക്ടർ മുജീബ് റഹ്മാൻ തുടങ്ങിയവരും ഉദ്ഘാടന ചടങ്ങിൽ പങ്കെടുത്തു.

എന്താണ് ലോട്ട്

ഉയർന്ന ഗുണനിലവാരമുള്ള ഉൽപ്പന്നങ്ങൾ താങ്ങാവുന്ന വിലയിൽ കൂടുതൽ ഉപഭോക്താക്കൾക്ക് ലഭ്യമാക്കുക എന്ന ലക്ഷ്യത്തോടെയാണ് ലോട്ട് സ്റ്റോറുകള്‍ ലുലു ഗ്രൂപ്പ് ആരംഭിച്ചത്. ഖത്തറിലെ ബർവ മദീനത്‌നയില്‍ ജനുവരിയാണ് ആദ്യ ലോട്ട് സ്റ്റോർ തുറക്കുന്നത്. ഒരു ദിർഹം മുതല്‍ 19 ദിർഹം വരെ നിരക്കിലുള്ള ഉത്പന്നങ്ങളാണ് ലോട്ടിന്റെ പ്രത്യേകത.

ഉപഭോക്താക്കളുടെ വൈവിധ്യമാർന്ന ഷോപ്പിംഗ് ആവശ്യങ്ങൾ നിറവേറ്റുന്നതിനായി ലോട്ട് സ്റ്റോറുകളില്‍ വിപുലമായ ഉൽപ്പന്ന ശ്രേണി ഒരുക്കിയിരിക്കുന്നു. പുരുഷന്മാർ, സ്ത്രീകൾ, കുട്ടികൾ എന്നിവർക്കുള്ള വസ്ത്രങ്ങൾ, പാദരക്ഷകൾ, ആഭരണങ്ങൾ, വനിതാ ബാഗുകൾ തുടങ്ങി നിരവധി ഉൽപ്പന്നങ്ങൾ ഇവിടെ ലഭ്യമാണ്. സ്റ്റൈലും ട്രെൻഡും പിന്തുടരാൻ ഇഷ്ടപ്പെടുന്നവർക്കായി, ഈ സ്റ്റോർ താങ്ങാവുന്ന വിലയിൽ വൈവിധ്യമുള്ള ഉൽപ്പന്നങ്ങൾ ഒരേ മേൽക്കൂരയ്ക്ക് കീഴില്‍ തയ്യാറാക്കി വെച്ചിരിക്കുന്നു.

സ്റ്റേഷനറി, വീട്ടുപകരണങ്ങൾ, ഫർണിച്ചർ, കളിപ്പാട്ടങ്ങൾ എന്നിവ ഉൾപ്പെടെ വൈവിധ്യമാർന്ന ഉൽപ്പന്നങ്ങൾ ഈ സ്റ്റോറിൽ ലഭ്യമാണ്. ഒരു കുടുംബത്തിന് ആവശ്യമായ എല്ലാ സാധനങ്ങളും താങ്ങാവുന്ന വിലയിൽ ഇവിടെ ഒരേ മേൽക്കൂരയിൽ ലഭിക്കും. ഗുണനിലവാരമുള്ള ഉൽപ്പന്നങ്ങൾ അവിശ്വസനീയമാംവിധം കുറഞ്ഞ വിലയിൽ നൽകുന്നതാണ് ഈ സ്റ്റോറിന്റെ പ്രധാന സവിശേഷത.

അതേസമയം, ലുലു റീട്ടെയ്ൽ 2025-ന്റെ ആദ്യ പാദത്തിൽ ശ്രദ്ധേയമായ സാമ്പത്തിക മുന്നേറ്റം നേടി. കമ്പനിയുടെ മൊത്തം ലാഭം 15.8 ശതമാനം വർധിച്ച് 69.7 മില്യൺ ഡോളറായി. പ്രോഫിറ്റ് മാർജിൻ 25 ബേസിസ് പോയിന്റ് ഉയർന്ന് 3.4 ശതമാനമായി. വരുമാനം 7.3 ശതമാനം വർധിച്ച് 2.1 ബില്യൺ ഡോളറിലെത്തി. റമദാൻ കാലയളവിലെ മികച്ച വിൽപ്പന പ്രകടനമാണ് ഈ വളർച്ചയ്ക്ക് പ്രധാന കാരണമായത്.

2025-ന്റെ ജനുവരി മുതൽ മാർച്ച് വരെയുള്ള ആദ്യ പാദത്തിൽ, ലുലു ഗ്രൂപ്പ് യുഎഇയിൽ അഞ്ച് പുതിയ സ്റ്റോറുകൾ തുറന്ന് വിപുലീകരണത്തിൽ ശ്രദ്ധേയമായ പുരോഗതി കൈവരിക്കുകയും ചെയ്തു. ഈ വർഷം 20 കേന്ദ്രങ്ങൾ കൂടി തുറക്കാനുള്ള പദ്ധതിയും കമ്പനി ആസൂത്രണം ചെയ്യുന്നു. ഈ വിപുലീകരണം നിരവധി വ്യക്തികൾക്ക് തൊഴിൽ അവസരങ്ങൾ സൃഷ്ടിക്കും, ഒപ്പം ഈ സ്റ്റോറുകളിലേക്കുള്ള ജീവനക്കാരുടെ റിക്രൂട്ട്മെന്റ് ഉടൻ ആരംഭിക്കുമെന്ന് പ്രതീക്ഷിക്കുന്നു. കൂടാതെ, ഓൺലൈൻ വ്യാപാര മേഖലയിൽ ശക്തമായ മുന്നേറ്റം കൈവരിക്കാനായതും ഈ പാദത്തിലെ പ്രധാന നേട്ടമാണ്.